IGIHE.com > Politiki > Amakuru
“Umubano w’u Rwanda n’u Bufaransa uzashingira ku iterambere n’ikoranabuhanga”

“Umubano w’u Rwanda n’u Bufaransa uzashingira ku iterambere n’ikoranabuhanga”


Yanditswe kuya 18-01-2013 - Saa 15:35' na Marie Chantal Nyirabera

Minisitiri w’Intebe Dr. Pierre Damien Habumuremyi yakiriye Ambasaderi w’u Bufaransa mu Rwanda, Michel Flesch, baganira ku bufatanye bw’ibihugu byombi mu bikorwa biganisha ku iterambere n’ikoranabuhanga, ntibibe ku muco n’ururimi gusa. Yanamusabye ko abakekwaho gukora Jenoside yakorewe Abatutsi bahungiye mu Bufaransa bakurikiranwa, n’imanza zikihutishwa.

Ambasaderi w’u Bufaransa mu Rwanda yagize ati « Twaganiriye ku buryo twashimangira umubano w’ibihugu byombi. Minisitiri w’intebe yansobanuriye icyerekezo cy’u Rwanda mu iterambere, ibizakorwa n’’iby’ingenzi ; twarebye ibyo u Bufaransa buzafatanya n’u Rwanda, ibihugu byombi bigateza imbere ubufatanye n’iterambere. Ntabwo twavuze cyane ku byo mu gihe cyahise, ahubwo twaganiriye ku biri imbere. »

Nkurunziza Innocent Umujyanama wa Minisitiri w’Intebe ushinzwe imibereho myiza, yagize ati « Ambasaderi w’u Bufaransa yagaragaje ubushake bwo kuvugurura umubano, bakareba imbere ari na wo murongo Perezida wa Repubulika yamusabye. Minisitriri w’Intebe yamugejejeho ikibazo cy’ubutabera, amusaba ko abantu bahungiye mu Bufaransa bakekwaho gukora Jenoside yakorewe Abatutsi bashyikirizwa inkiko, n’imanza zabo zikihutishwa. Yavuze ko uyu mwaka uzarangira imanza zimaze kunozwa zigashyirizwa inkiko. »

Nkurunziza yakomeje atangariza abanyamakuru ko Minisitiri w’Intebe yamusabye ko umubano n’ubufatanye bizashyingira ku bikorwa buri wese afitemo inyungu n’ijambo. Ukazanibanda ku bikorwa bifatika bijyanye n’icyerekezo cy’iterambere n’ikoranabuhanga, ntibibe ku muco n’ururimi gusa.

Yavuze ko Minisitiri w’Intebe yanamugejejeho ikibazo cy’abashaka ibyangombwa (VISA) byo kujya mu Bufaransa bikabagora, cyangwa ntibabibone kuko bitangwa n’u Bubiligi. Ambasaderi Flesch ngo yamwijeje ko iki kibazo igiye gukurikiranwa.

Yakomeje atangaza ko Minisititiri w’Intebe yanamusabye ko nk’igihugu gifite ijambo mu bigo bikomeye birimo banki zikomeye, nka Banki y’Isi na Banki Nyafurika Itsura Amajyambere, ko yavugana na bo ibyo bigega ntibibangamire ibikorwa by’iterambere ku banyarwanda.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO