IGIHE.com > Politiki > Amakuru
Perezida Kagame yatanze ikiganiro muri Kaminuza ya Peking

Perezida Kagame yatanze ikiganiro muri Kaminuza ya Peking


Yanditswe kuya 16-09-2012 - Saa 02:32' na Elisée Mpirwa

Ku munsi wa nyuma w’uruzinduko rwe mu Bushinwa, Perezida Kagame yahaye ikiganiro abanyeshuri barenga 100 bo muri Kaminuza ya mbere nkuru mu Bushinwa ya Peking.

Prof. Justin Lin wahoze ashinzwe iby’icungamutungo muri Banki y’Isi ari na we wanditse igitabo kitwa “The Quest for Prosperity” yakiriye Perezida Kagame agaruka ku rugendo yagiriye mu Rwanda.

Yagize ati "Nashimishijwe cyane n’iterambere ryo mu Rwanda ndetse n’ubushake abaturage bafite mu kwiteza imbere kandi na guverinoma ubona yitaye mu kubakorera. Nizera ko niba Taiwan yabikora, u Bushinwa bukabikora n’u Rwanda rushobora kuva ku rwego w’igihugu gikennye rukagera ku rwego rw’igiteye imbere mu myaka mike iri imbere. Perezida Kagame ni umugabo ushobora kubikora."

Perezida Kagame yasobanuye amateka y’ububanyi hagati y’u Bushinwa na Afurika guhera mu kinyejana cya 15 aho yagabanyijemo ibice bitatu, uhereye muri icyo kinyejana ubwo hariho ubucuruzi na Malindi, hagakurikiraho ubufasha u Bushinwa bwatanze mu kwigobotora ubuhake mu bihugu byinshi muri Afurika ndetse kugeza n’umubano wo mu bihe bya none.

Yagize ati "Nihegeze habaho kwigarurira. Ahubwo umubano w’u Bushinwa n’Afurika waranzwe n’ubuhahirane."

Perezida Kagame yongeyeho ko ibi bidasonaye ko ibihugu byombi byumvukanaga ku bintu byose ahubwo ko hariho uburyo bwo kumvikana byari bifitiye inyungu impnde zombi.

Abanyeshuri bahawe umwanya wo kubaza ibibazo bitandukanye ku iterambere ry’u Rwanda ndetse n’umubano warwo n’umuryango Mpuzamhanga.

Perezida Kagame yagize ati "Kugira ngo igihugu icyo aricyo cyose gitere imbere bisaba ko abaturage b’icyo gihugu bumva ko iterambere ry’igihugu cyabo aribo rireba. Iterambere si ikintu umuntu aterura agahereza undi. Muri iyo nzira yo guharanira iterambere hahoramo akantu kameze nko kutumvikana. Hari abantu bashaka gutanga inkunga, buri gihe baza bakubwira bati murabona rwose twitaye ku iterambere ryanyu turashaka kubafasha muri ibi nibi, hari aho bishobora kuba ari byo ariko ntibyahoraho. Kuko sinumva ukuntu umuntu yaza akakubwira ngo nitaye ku mibereho yawe kurusha uko wowe uyitayeho."

"Twemere ko byabaho ariko simpamya ko byamara igihe kirekire. Uko kwimenyera iterambere ubikora udaheje ibitekerezo by’abandi ukerekanako ntacyo ubahishe. Ukabwira abantu uti ibi nibyo mbona byamfasha, reka tubiganireho, ese koko murabona bitamfasha, ukavuga uti niba ushaka kumfasha shingira ku byo nkwereka kuko nzi ibyo nkeneye. Birareba abaturage bacu, kuko nitwe tuzirengera ingaruka ibyo dukoze bishobora kugira."

Perezida Kagame yabwiye abanyeshuri ko yishimira intambwe iterwa n’imiryango itandukanye mu guhinduka imikoranire n’u Rwanda.

Yagize ati "Uburyo dukoresha mu Rwanda tudapfushije ubusa byinshi, byatumye tugera kuri byinshi kurusha imiryango ivuga ko idutera inkunga."

Mu gitabo yanditse Professor Lin hari aho yashingiye ku byo Perezida Kagame akunze kugaragaza ko inkunga nta terambere yageza ku gihugu keretse abanyagihugu bo ubwabo bahagurutse bakikorera.

Foto/Village Urugwiro

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO