Minisitiri w’Intebe arasaba inzego z’ibanze kwegera abaturage mu kubakemurira ibibazo

Yanditswe na Nsabimana Emile
Kuya 22 Mutarama 2013 saa 06:06
Yasuwe :
0 0

Minisitiri w’Intebe Dr. Habumuremyi Pierre Damien, ubwo ku ya 22 Mutarama 2013 yatangizaga ku mugaragaro ukwezi kwahariwe imiyoborere myiza mu Karere ka Rwamagana yasabye abayobozi bo mu nzego z’ibanze kuva mu biro bakegera abaturage babakemurira ibibazo.
Dr Habumuremyi yabwiye abayobozi ko uku kwezi ari uko kwegera abaturage, abayobozi bagashyiraho gahunda yo gushyiraho ibikorwa bifatika bizakorwa kandi bifitiye akamaro abaturage, birimo kubegera bakumva ibibazo bafite no kurwanya (...)

Minisitiri w’Intebe Dr. Habumuremyi Pierre Damien, ubwo ku ya 22 Mutarama 2013 yatangizaga ku mugaragaro ukwezi kwahariwe imiyoborere myiza mu Karere ka Rwamagana yasabye abayobozi bo mu nzego z’ibanze kuva mu biro bakegera abaturage babakemurira ibibazo.

Dr Habumuremyi yabwiye abayobozi ko uku kwezi ari uko kwegera abaturage, abayobozi bagashyiraho gahunda yo gushyiraho ibikorwa bifatika bizakorwa kandi bifitiye akamaro abaturage, birimo kubegera bakumva ibibazo bafite no kurwanya akarengane gashobora kugirirwa abaturage.

Minisitiri w’Intebe yavuze ko kwimakaza indangagaciro zo kwigira no kwitanga mu kazi bikwiye kurangwa kuri buri wese, ati “Umurimo wose ukwiye gukoranwa umwete kandi ugakorwa neza. Ibibazo byose by’akarengane bigomba kurangira, imitangire ya serivisi igomba kuba umuco ahantu hose.”

Aha ni na ho yahereye asaba abayobozi n’abaturage kwishimira imiyoborere myiza imaze kugerwaho mu gihugu, by’umwihariko asaba abayobozi gukangurira abaturage kwitabira ubwisungane mu kwivuza agira ati “Turifuza ko mu gihugu hose ubwisungane mu kwivuza muri uku kwezi kw’imiyoborere myiza bwazamuka bukagera ku kigereranyo cy’100%.”

Yasabye abaturage kugira uruhare mu kwimakaza umutekano, buri muturage akaba ijisho rya mugenzi we. Kuri ibi Minisitiri w’Intebe yavuze ko hakwiriye kubaho umuyoboro w’umutekano mu baturage mu guhanahana amakuru ajyanye no kwirinda icyahungabanya umutekano w’igihugu. Yagize ati “Abashaka guhungabanya umutekano ni ukubima amatwi, politiki y’iki gihe ni politiki y’ibikorwa ntabwo ari politiki y’amagambo gusa!”

Muri uku kwezi kw’Imiyoborere Myiza kwatangijwe biteganyijwe ko abayobozi bazajya bava mu biro bakajya kuganira n’abaturage aho batuye, bakigira hamwe ibikorwa bifatika bifitiye igihugu n’abagituye akamaro.

Ku rwego rw’igihugu uku kwezi kwatangirijwe mu Karere ka Rwamagana na Minisitiri w’Intebe Dr Habumuremyi Pierre Damien, n’ahandi hose mu gihugu kukaba kwatangijwe.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza