IGIHE.com > Politiki > Amakuru
Gen Makenga avuga ko M23 ishobora kwemera kuva i Goma

Gen Makenga avuga ko M23 ishobora kwemera kuva i Goma


Yanditswe kuya 27-11-2012 - Saa 07:26' na Yahinduwe na Emile Nsabimana

Nyuma y’iminsi igera hafi ku cyumweru Umutwe wa M23 ufashe Goma, umurwa mukuru w’Intara ya Kivu y’Amajyaruguru muri Repubulika Iharanira Demokarasi ya Congo, Umukuru w’ishami rya gisirikare ry’uyu mutwe Gen Sultani Makenga yahaye ikiganiro ikinyamakuru Jeune Afrique ku cyumweru tariki ya 25 Ugushyingo 2012, agaragaza ko M23 ishobora kuwuvamo.

Jeune Afrique : Ubu tuvugana M23 ihagaze ite ?

Sultani Makenga : Turi i Mushaki ku muhanda ujya i Masisi kandi turi ku mpera y’Amajyaruguru n’Amajyepfo ya Kivu. Umujyi wa Minova uracyari mu maboko ya FARDC [Igisirikare cya Leta ya Repubulika Iharanira Demokarasi ya Congo]

Jeune Afrique : Intego yanyu ni iyihe ?

Sultani Makenga : Intego yacu ni ukugera ku mahoro asesuye. Guverinoma ya Kinshasa itandukanya abantu kandi igaheza cyane abavuga ururimi rw’Ikinyarwanda kandi ibi [byakozwe] kuva kera, ntiharanira ubwiyunge. Igihe twakoreraga Guverinoma nk’abasirikare ntitwahabwaga agaciro, ahubwo twarabicyahirwaga. Twavuye muri ako kazi kugira ngo twamagane ibitaragendaga neza. Aho kugira ngo itwumve, Guverinoma yaradukurikiranye ngo idutsembe.

Jeune Afrique : Ubona igisubizo gishobora kuboneka ?

Sultani Makenga : Iyaba Umuryango Mpuzamahanga washoboraga kumva ukuri kw’imiterere y’iki gihugu, birashoboka ko ibintu byahinduka. Gusa ikibazo ntigishobora kubona igisubizo, Guverinoma ya Kinshasa ari yo yonyine tuganira.

Jeune Afrique : Utekereza ko Perezida wa Congo, Joseph Kabila agomba kuva ku butegetsi ?

Sultani Makenga : Simbizi ! Afashe icyemezo cyo kuba Perezida w’Abanyekongo bose, ntitwakongera kugirana ibibazo na we. Ibyo byashoboka ! Mwabonye ingabo zose zigometse mu Burasirazuba bwa Congo. Zose byarangiraga zongeye gufata intwaro nyuma y’imishyikirano. Wizera mu by’ukuri ko igisubizo kivuye mu mishyikirano gishoboka ? Bijya kumera nk’aho ari Jenoside yari iri gutegurwa hano muri Congo !
Turashaka amahoro. Ntitwafashe intwaro kugira ngo dufate intwaro gusa ! Twabikoze kubera ko twari twabonye ko ibisubizo bindi byari byaranze. Mushobora gukomeza kuganira, ariko iyo mutangiye gushinyagurirwa bavuga ngo babahagarike babice, muhungira aho mushobora kurokoka. Ni nka Jenoside yari iri gutegurwa aha muri Congo ! Uko ibintu bimeze ubu, birashoboka ko tuzashobora kugera ku gisubizo.

Jeune Afrique : Mwaba mukiri hafi ya Nkunda ?

Sultani Makenga : Nari Umugaba Mukuru w’ingabo ze wungirije muri CNDP. Ubu ari mu Rwanda. Buri wese yavugaga ko ari we wari impamvu y’umutekano muke mu Burasirazuba bwa Congo bikaba byari bikwiye kumwigizayo kugira ngo hagire igihinduka. Ndatekereza ko ubu buri wese abona ibitandukanye n’ibyo !

Jeune Afrique : Mwaba mukivugana ?

Sultani Makenga : Oya.

Jeune Afrique : Bosco Ntaganda wari umujenerali akaza kuba inyeshyamba yaba agikomeje kugirira akamaro M23 ?

Sultani Makenga : M23 ntiri kumwe na Bosco. Ni ikinyoma cyo kwemeza ibitandukanye n’ukuri. Arashakishwa n’Urukiko Mpuzamahanga Mpanabyaha (CPI). Ibyo dusaba ntaho bihuriye na we. Ikibazo cya Jenerali Bosco ntigihuye na gato n’ibyo dusaba.

Jeune Afrique : Mwaba muzi aho ari ubu ?

Sultani Makenga : Sinabihagararaho ariko ntekereza ko ari mu misozi ya Masisi [Kivu y’Amajyaruguru]. Ntaho mpurira na we.

Jeune Afrique : M23 yafata icyemezo cyo kumufata [agafungwa] ?

Sultani Makenga : Ntituri Polisi ya CPI. Gusa babidusabyeee...

Jeune Afrique : U Rwanda rufasha M23 ?

Sultani Makenga [Aseka] : Oya, u Rwanda rufasha Guverinoma ya Kinshasa. Ikibyemeza : Ubwo twafataga Rutchuru twaguye kuri batayo [bataillon] y’umutwe wa gisirikare udasanzwe w’Abanyarwanda [Bataillon des Forces speciales rwandaises] bari aba FARDC. Iyo [Umunyekongo] uvuga ikinyarwanda agize icyo akora, buri gihe babihuza n’u Rwanda. Ariko Guverinoma ya Congo izi ko atari byo.

Jeune Afrique : Mwigeze muhabwa ubufasha n’impunzi z’Abanyekongo ziri mu Rwanda ?

Sultani Makenga : Yego. Intambara yacu ikorwa ku bwabo, kugira ngo tubashoboze gutaha mu gihugu. Kuki barumuna bacu bari mu nkambi z’impunzi bataza kudutera ingabo mu bitugu ?

Jeune Afrique : Ni bangahe ?

Sultani Makenga : Besnhi kuko ari intambara yabo ! Utekereza ko bishimira kujya gusabiriza mu nkambi z’impunzi ?

Jeune Afrique : Mu byo mukora hari abantu ba M23 bigeze binjira mu Rwanda ?

Sultani Makenga : Oya.

Jeune Afrique : Wowe ?

Sultani Makenga : Oya. Nanone ni ikinyoma cya Kinshasa. Ubwo navaga muri FARDC navuye i Bukavu mu bwato. Nanyuze i Nzulu ku birometero 20 uvuye i Goma. Nyuma nazamutse nerekeza i Nyagongo, Kibumba n’i Runyoni nyuze i Mikeno.

Jeune Afrique : M23 ishinjwa gushyira abana mu gisirikare ku ngufu cyane cyane abana b’abasirikare. Mubivugaho iki ?

Sultani Makenga : Ibyo birego [byo kwinjiza abana mu gisirikare si byo. Umugenzuzi wa HRW [ Human Rights Watch] yabeshywe na Kinshasa. Ibyo birego ni ibinyoma. Umuryango Human Rights Watch ni wo utekereza ko ari byo. Twasabye ko habaho komisiyo ihuriweho n’impande bireba ngo ikore igenzura, kuko tuzi ko umugenzuzi wa HRW yahawe ruswa na Kinshasa. Ubwo twabisabaga iyo komisiyo ntiyagiyeho.

Jeune Afrique : Leta Zunze Ubumwe za Amerika zagushyize ku rutonde rw’abashinjwa ibyaha by’intambara no kutubahiriza ikomanyirizwa ku ntwaro…

Sultani Makenga : Ubwo Kabila na we agomba gushyirwa kuri urwo rutonde mu buryo runaka, ni we umpa intwaro ! Wabonye intwaro ku cyambu cya Goma ? Igihe cyose atugabyeho ibitero dufata intwaro zabo n’ibikoresho bindi bijyana na zo.

Jeune Afrique : Magingo aya mufite abasirikare bangahe ?

Sultani Makenga : Ni ibanga rya gisirikare, ariko ni benshi !

Jeune Afrique : Ibihumbi byinshi ?

Sultani Makenga : Benshi !

Jeune Afrique : Joseph Kabila yaba yaragerageje kubabuza gushinga M23 ?

Sultani Makenga : Kabila amenyereye kwigarurira imitima y’abantu. Yampitishijemo kumpa amfaranga, inzu [nyinshi], imodoka, imyanya yo ku rwego rwo hejuru,...
Yego, igihe nari nkiri ku ruhande rwa Guverinoma. Afite akamenyero ko kuyobya abantu, yarabigerageje. Byashoboka ko yashakaga kungura kugira ngo anyibagize amasezerano yo ku ya 23 Gicurasi 2009 ari na yo yatangije ibyo kuvanga ingabo, izari ingabo za CNDP na NDLR zikajya mu ngabo z’igihugu].

Jeune Afrique : Yaguhitishijemo iki ?

Sultani Makenga : Amafaranga, imodoka, amapeti, imyanya yo ku rwego rwo hejuru, ...

Jeune Afrique : Ni ikihe gisubizo kirambye ubona ? Waba ushaka ubwigenge ?

Sultani Makenga : Nta bwigenge. Ariko kugira igihugu kigizwe n’ibihugu byinshi byafasha mu gukemura ibibazo by’Amajyaruguru ya Kivu.

Jeune Afrique : Ese wakwemera kongera kujya mu ngabo za Congo ?

Sultani Makenga : Congo ntifite ingabo zihamye !

Jeune Afrique : Ushobora gusubira muri FARDC ?

Sultani Makenga : Nanone FARDC si igisirikare. Byose bikwiriye kubakwa bundi bushya !

Jeune Afrique : Ushobora kubigiramo uruhare ?

Sultani Makenga : Yego, aho bazankenera hose.

Jeune Afrique : Perezida wa Uganda Yoweri Museveni ko ashaka kuzana ubuhuza hagati ya M23 na Kinshasa. Urabishyigikiye ?

Sultani Makenga : Museveni afite amahirwe yo kuba azi ukuri kwa Congo. Niba ari umuhuza, ibyo nta kibazo biduteye.

Jeune Afrique : Ku wa gatandatu inama y’Ihuriro Mpuzamahanga ku karere k’Ibiyaga Bigari (CIRGL) yabereye i Kampala, yasabye M23 kuva i Goma mbere y’uko imishyikirano itangira. Muzava i Goma ?

Sultani Makenga : Kuva i Goma si ikibazo. Bigitangira nta n’ubwo twashakaga gufata umujyi. Turi hano kuko Guverinoma yabishatse. Bibaye ari byo bishobora kuzana amahoro muri Congo, M23 yakwemera kuva i Goma.

Jeune Afrique : Ariko integuza irarangira kuri uyu wa mbere ku wa 26 Ugushyingo…

Sultani Makenga : Iyi tariki ntidushishikaje. Uduhagarariye [Pasiteri Runiga] ntiyari mu mishyikirano.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO