IGIHE.com > Politiki > Amakuru
Kubonana kwa Kagame, N’Guesso, Kabila na Museveni; umutekano w’akarere ku yindi ntera

Kubonana kwa Kagame, N’Guesso, Kabila na Museveni; umutekano w’akarere ku yindi ntera


Yanditswe kuya 25-03-2013 - Saa 08:07' na IGIHE

Ku butumire bwa mugenzi wabo wa Congo Brazzaville Denis Sassou N’Guesso, abakuru b’ibihugu barimo Paul Kagame, Yoweri Kaguta Museveni na Joseph Kabange Kabila bagiranye inama ku cyumweru tariki 24 Werurwe 2013, mu mujyi wa Oyo muri Congo Brazzaville, biga ku mutekano w’akarere.

Nk’uko tubikesha itangazo ryashyizwe ahagaragara ku mugoroba w’iki Cyumweru, inama yari mu rwego rw’ibiganiro bimaze iminsi biba ku rwego rw’akarere n’urwego mpuzamahanga binyuze muri Loni, Umuryango w’Afurika Yunze Ubumwe, ICGLR na SADC hagamijwe kugarura ituze mu gace k’uburasirazuba bwa Congo Kinshasa.

Muri iyi nama yahuje abakuru b’ibihugu by’u Rwanda , Uganda, Repuburika Iharanira Demukarasi ya Congo na Congo Brazzaville , iryo tangazo rivuga ko bagiranye ibiganiro ku buryo bucukumbuye, ndetse banahana ibitekerezo kuri politiki n’imibereho y’abaturage mu karere k’ibiyaga bigari, by’umwihariko bibanda ku gace k’uburasirazuba bwa Congo.

Tariki 24 Gashyantare uyu mwaka I Addis Ababa muri Ethiopia hashyizwe umukono ku masezerano y’amahoro, yari akubiyemo ingingo zigamije kugarura ituze muri Congo Kinshasa no mu karere k’ibiyaga bigari, iki gikorwa kikaba cyongeye gushimwa n’aba bakuru b’ibihugu uko ari bane.


Ikibazo cya Centrafrique cyagarutsweho

Muri iyi nama kandi yahuje abakuru b’ibihugu Paul Kagame, Yoweri Museveni, Joseph Kabila na Sassou N’Guesso, bose bagaragaje uburyo batewe impungenge n’ibimaze iminsi bibera mu gihugu cya Centrafrique, aho inyeshyamba zo mu mutwe wa Seleka zamaze kwigarurira umurwa mukuru wa Bangui, ndetse n’umuyobozi w’icyo gihugu kuri ubu akaba yaburiwe irengero.

Aba bakuru b’ibihugu basabye impande zose zirebwa n’ibibera muri Centrafrique gukora ibishoboka ntihagira abaturage b’abanyagihugu n’abanyamahanga babihutarizwamo.

Perezida Denis Sassou N’Guesso watumiye bagenzi be ngo barebere hamwe aho ishyirwa mu bikorwa ry’amasezerano y’amahoro yasinyiwe i Addis Abeba rigeze, ni nawe ushinzwe guhuza impande zombi zishyamiranye muri Centrafrique, ibi bikaba byatumye bagenzi be bamushimira ku ruhare akomeje kugira mu kugarura amahoro mu karere.

Iyi nama yahuje abakuru b’ibihugu byombi ibaye mu gihe mu burasirazuba bwa Congo Kinshasa icyavugwaga kuri ubu ari ugucikamo kabiri k’umutwe w’inyeshyamba za M23, aho igice kimwe kiyobowe na Jean Marie Runiga cyahungiye mu Rwanda nyuma yo gukubitwa inshuro n’igice cya Sultan Makenga, ndetse ni na nyuma y’aho muri iki cyumweru tuvuyemo Gen Bosco Ntaganda ashyikirijwe urukiko mpuzamahanga mpanabyaha rw’i La Haye mu Buholande, aho azatangira kuburanishirizwa kuri uyu wa kabiri.

Abakuru b'ibihugu byo mu karere muri Congo Brazzaville biga ku kibazo cy'umutekano
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO