IGIHE.com > Politiki > Amakuru
Impinduka u Rwanda rukora ni indorerwamo y’Abanyarwanda-Perezida Kagame

Impinduka u Rwanda rukora ni indorerwamo y’Abanyarwanda-Perezida Kagame


Yanditswe kuya 12-03-2013 - Saa 11:48' na IGIHE

Mu kiganiro Perezida Paul Kagame yahaye abanyeshuri bigishwa na Prof Michael Porter bo mu Ishuri ry’Imari muri Kaminuza ya Harvard muri Leta Zunze Ubumwe za Amerika ku wa 11 Werurwe 2013, yabasobanuriye ko impinduka u Rwanda rugenda rugeraho zishingiye ku baturage b’u Rwanda bagena uko ahazaza h’igihugu hagomba kumera kandi bakiyizera mu bushobozi bwo kwiyobora.

Perezida Kagame yabwiye aba banyeshuri ko u Rwanda rwahagaritse kubeshwaho rukigira, abagaragariza ko Abanyarwanda ubu baharanira kugira agaciro. Ati "Abanyarwanda bazi icyo bashaka n’uko bagishaka. Ntibakeneye ubafata ukuboko akababwira ati ‘Ndabageza hariya’. Hari igihe uba ugomba kuvuga uti ‘Ni ukuboko kwanjye ngomba kwigenza... Simbona ukuntu hari uwaha amasomo Abanyarwanda. Nitugira ibibazo tuzarebana mu maso twemeranye icyo tugomba gukora.”

Avuga ku cyerekezo cy’ejo hazaza u Rwanda rufite, Perezida Kagame yabwiye aba banyeshhuri ko Abanyarwanda bakoze ibishoboka byose bagahangana n’ibibazo bya Jenoside yakorewe abatutsi; kandi ko aho u Rwanda rugeze hashimishije. Yongeyeho ko aho ibintu bigeze ibibazo bihari ari ibibazo byiza, ati “Ntitugihangayikishijwe no kuramuka, n’ubuzima cyangwa urupfu. Ibyo twabisize inyuma. Turi kubaka inzego n’ibikorwa remezo, kandi turashora imari mu baturage bacu.”

Umukuru w’u Rwanda yagarutse ku iterambere u Rwanda rwagize mu myaka ishize, abwira aba banyeshuri ko nta Munyarwanda watinyuka gutakaza amahirwe ayo ari yo yose. Yagize ati “Buri munsi tuba dushaka kubona icyatubera ikinyuranyo.”

Perezida Kagame yeretse aba banyeshuri ko inkuru y’impinduramatwara mu bukungu bw’Abanyarwanda ari ukuri, atanga urugero ko abantu miliyoni mu myaka itanu ishize barenze umurongo w’ubukene.

Iki kiganiro cyashorejwe ku isomo ryitwa “U Rwanda: Impinduka mu bukungu”, iri somo rikaba rigaragaza u Rwanda kuva mu kinyejana cya 13, mu bihe bya gikoloni no mu gihe cy’ubwigenge kugeza uko ruhagaze ubu. Ni isomo ryigishwa na Prof Michael Porter, inzobere mu by’iterambere ry’ibihugu.

Perezida Kagame azakomereza uru ruzinduko rw’akazi muri Amerika aha ikiganiro abanyeshuri 500 biga ibya kiyahudi muri Kaminuza ya Hartford Maurice Greenberg Center, akazabaha ikiganiro cyitwa “Icyerekezo 2020”.

Prof Porter na Perezida Kagame mbere y'ikiganiro
Perezida Kagame asuhuza bamwe mu banyashuri ba Prof Porter
Prof Porter na Perezida Kagame bari imbere y'abanyeshuri
Perezida Kagame ari imbere y'abanyeshuri atanga ikiganiro
Perezida Kagame atanga ikiganiro yabwiye abanyeshuri ko ibyo u Rwanda rugeraho ari ibyo Abanyarwanda batekereza
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO