IGIHE.com > Politiki > Amakuru
Ibyabaye ku Rwanda muri 2012 byaduhaye amasomo menshi - Perezida Kagame

Ibyabaye ku Rwanda muri 2012 byaduhaye amasomo menshi - Perezida Kagame


Yanditswe kuya 21-01-2013 - Saa 12:47' na Emile Nsabimana

Mu kiganiro cyabimburiye ibindi Perezida wa Repubulika y’u Rwanda azagirana n’abanyamakuru mu mwaka wa 2013, Perezida Paul Kagame yagaragaje ko mu gihe hatangira umwaka wa 2013 ibyabaye mu mwaka wa 2012 hari amasomo menshi byasigiye u Rwanda ruzagenderaho.

Muri iki kiganiro Perezida Kagame yagaragaje ko umwaka wa 2012 wagenze neza n’ubwo hari ibyawubayemo byasaga n’ibigaragaza u Rwanda nabi, avuga ko cyakora byatanze amasomo ku Rwanda yo kwiga mu migabo n’imigambi y’igihugu.

Abanyamakuru babajije ibibazo bitandukanye ku byaranze u Rwanda mu mwaka wa 2012, bibanda ku ihagarikwa ry’inkunga ryakozwe na bimwe mu bihugu hashingiwe kuri raporo y’Impuguke za Loni yashinjaga u Rwanda gufasha umutwe wa M23 urwanya Leta muri Repubulika Iharanira Demokarasi ya Congo.

Ibi Perezida Kagame yavuze ko byahaye u Rwanda amasomo kandi ko rwabyigiyeho byinshi, mu guhaguruka rugahangana n’ibibazo bibangamiye igihugu.

Asobanura ko ibihugu byahagaritse inkunga ku Rwanda byagendeye kuri raporo yari itarasohoka, Perezida Kagame yagize ati “Ibi ntihari uburyo bwo kubyirinda. Ntibyabayeho nk’uko byari kugenda. Bakoze raporo bayifatiraho ibyemezo itarasohoka."

Iki kiganiro cyanagarutse ku gikorwa cy’Umuryango w’Abibumbye cyo kohereza indege zitagira abapilote mu gucunga amahoro mu Burasirazuba bwa Congo, aho abanyamakuru bashatse kumenya icyo Perezida Kagame abitekerezaho.

Yagize ati “Icya mbere sinabibabuza niba bumva bifasha igihugu cyangwa akarere bazijyanyemo. Jye ikindeba ni uko dukomeza guteza imbere igihugu cyacu.”

Ku kibazo cy’uko u Rwanda na Perezida Kagame bahabwa n’amahanga isura mbi ku kibazo cya Congo, yagize ati “Uko bazakomeza gushyira ikibazo ku Rwanda ni ko kizakomeza kubaho. Ibyo byaba ari ukuyobya ibintu. Turasobanuza tuti ‘Ibyo mushaka gukora muri Congo bizana bite amahoro?’ U Rwanda rufite uruhare mu kugarura amahoro mu karere ariko rufite aho rugarukira.”

Perezida Kagame yongeye kugaragaza ko ikibazo cya Congo nta ruhare uwo ari rwo rwose u Rwanda rugifitemo.

Abanyamakuru babajije icyo yakora igihe Abanyarwanda baba bagaragaje ko bifuza ko yakomeza akabayobora n’ubwo Itegeko Nshinga ry’u Rwanda ritabyemera, Perezida Kagame yagize ati “Njye nambuka urutindo ndugezeho. Tubanze turangize ibyo twakoraga, ibyo bizagira igihe cyabyo.”

Ikiganiro n’abanyamakuru cyo kuri uyu wa 21 Mutarama 2013 cyagarutse no ku buzima bw’Abanyarwanda muri rusange, haba mu bukungu, imyubakire, n’ibindi birebana n’ubuzima bw’abaturarwanda.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO