Hari hashize igihe mu ishyaka PS Imberakuri rivuga ko ritari mu murongo umwe na Leta nta nduru zivugwamo, ubu hashyizwe itangazo ahagaragara ko Umuyobozi waryo Mukabunani yirukanwe, hagashyirwaho ubuyobozi bushya ariko uwirukanwe we yemeza ko abo atabazi kuko birukanwe kera.
Itangazo ryashyizwe ahagaragara PS IMB.001/01/2013, rigaragaza ko mu nama yabaye muri uku kwezi tariki ya 13, hafashwe icyemezo ko ubuyobozi bwari busanzwe buyoboye ishyaka buvuyeho, hashyizweho abayobozi bashya aribo Niyitegeka Augustin wagizwe Umuyobozi w’ishyaka na Pasiteri Hakizimfura Noel wagizwe umunyamabanga mukuru akaba n’umuvugizi w’ishyaka PS Imberakuri.
Muri tangazo bakomeza bagaragaza ko banenga abitwaye nabi bose bashaka gucamo ibice ishyaka n’abiyitirira ko bariyoboye bagamije inyungu zabo bwite, babasaba kwikosora mu gihe kitarenze iminsi mirongo itatu, nyuma y’icyo gihe bakazafatirwa ibihano.
Pasitori Hakizimfura Noel, iryo tangazo ryashyizwe ryasohotse rivuga ko ari we Munyamabanga mukuru akaba n’Umuvugizi w’Ishyaka PS Imberakuri, mu kiganiro twagiranye atangaza ko Chritine Mukabunani, atirukanwe mu ishyaka ahubwo bamagana ibyo akora ngo kuko bitubahirije amategeko. Agira ati Kongere yemewe yo kuwa 17 Werurwe 2010 yashyizeho itsinda riyoboye ishyaka rigizwe na Pasiteri Hakizimfura Noel, Niyitegeka Augustin na Mukabunani Christine. Ibyo kandi na Minisiteri y’ubutegetsi bw’igihugu irabizi.”
Akomeza avuga ko Mukabunani yakoze amakosa ku wa 28 Kanama 2011, ngo kuko yatumije amahugurwa ku bufatanye na Komisiyo y’Ubumwe n’Ubwiyunge akayahinduramo Kongere, ngo akigira Perezida w’ishyaka, atarigeze atumiramo abo bari bafatanyije kuriyobora. Akavuga ko ibyo ari uburiganya kandi ari n’ikinyoma yakoresheje abeshya inzego z’ubuyobozi bw’igihugu. Agira ati “Ibyo yakoze byose ni imfabusa, kandi bibabaje ndetse biteye agahinda ku munyepolitiki witwa ko aharanira inyungu z’abaturage wagombye guhorana ubunyangamugayo.”
Icyo Mukabunani Christine abivugaho
Mukabunani Christine, Perezida wa PS Imberakuri akaba n’Umuvugizi w’Ihuriro Nyunguranabitekerezo ry’imitwe ya Politiki yemewe mu Rwanda, mu kiganiro twagiranye ku birebana n’uko yirukanwe ku buyobozi bw’ishyaka ryabo, yagize ati “Ntunguwe no kumva ibyo bintu. Njye rwose nta byo nzi kuko muri n’aba mbere babimbwiye.”
Kuba itangazo rysohotse rigaragaza ko Niyitegeka Augustin ari we muyobozi mushya na ho Pasiteri Hakizimfura Noel akaba Umunyamabanga Mukuru n’Umuvugizi wa PS Imberakuri, Mukabunani atangaza ko abo bagabo bombi basezerewe mu ishyaka kubera ikibazo cy’imyitwarire itanoze.
Akomeza atangaza ko kuba bavuga ko yakoze ibinyuranyije atumiza amahugurwa akayahinduramo Kongere y’ishyaka, ibyo ari ikinyoma kuko ibyo bakoze byemewe n’amategeko. Agira ati “Nyuma yo kwirukanwa kwa Ntaganda mu ishyaka byabaye ngombwa ko twuzuza inzego. Twatumije Kongere igizwe n’abagize Biro Politiki n’abahagarariye uturere, dutora Komite Nyobozi nshya igizwe n’abantu batanu. Twahinduye n’amategeko yatugengaga kuko ayo twari dufite mbere yasumbanyaga abanyamuryango kandi itari igendanye n’igihe. Ibyo byose ni byo inzego zibishinzwe zagendeyeho ziduha ibyangombwa, Inama y’abaminisitiri iratwemeza, bisohoka mu igazeti ya Leta. Nta makosa twakoze rero !.”
Akomeza avuga ko ibyo Niyitegeka na Hakizimfura bakoze nta gaciro bifite kuko Atari n’abayoboke ba PS Imberakuri. Avuga kandi ko bamusabye ibiganiro ariko ababwira ko bazandikira Komite Nkemurampaka basanga ari ngombwa ko bagaruka, bikazemezwa na Kongere y’ishyaka.
Inzego z’ubuyobozi zibyakira zite ?
Kayigema Anicet, Umunyamabanga Nshingwabikora mu Ihuriro Nyunguranabitekerezo ry’Imitwe ya Politiki yemewe mu Rwanda, mu kiganiro twagiranye yadutangarije ko abavuga ko bakuyeho Mukabunani Christine nta bubasha babifitiye. Yagize ati “Ubuyobozi bwa Mukabunani bwemewe n’amategeko, bariya ntituzi abo bahagarariye.”
Yakomeje adutangariza ko igihe cyose amatora yegereje hari uruhande ruvuka muri ririya shyaka atekereza ko aba ari ugushyushya imitwe y’abantu. Ko niba bafite ibibazo byakemurirwa mu ishyaka ryabo, mu Ihuriro bizamo ari uko ishyaka ubwaryo ribyisabiye mu nyandiko.
Agira ati “Iyo habaye gutana kw’abayobozi b’imitwe ya Politiki cyangwa abanyapolitiki urwego rubishinzwe ni Sena ni na yo ishobora gufata ibyemezo. Hari kandi Urukiko rukuru bakwitabaza iyo batanyuzwe.”
Prof. Shyaka Anastase Umuyobozi w’Ikigo cy’Igihugu cy’Imiyoborere agira ati "Ubusanzwe uretse gukora Politiki no kurera abazavamo abayobozi no kubashyira mu myanya, imitwe ya Politiki ibereyeho guteza imbere imiyoborere myiza." Akomeza avuga ko itagombye kurangwamo amacakubiri kuko na yo ubwayo ikwiye kuba ingoro y’ubuyobozi bwiza n’imiyoborere myiza.
IKINYARWANDA
IKIRUNDI
ENGLISH
FRANÇAIS
Ahabanza
Abo Turibo
Serivisi
Twandikire
Ibirimo
