Uko imyanya y’Abadepite igabanwa hashingiwe ku majwi amashyaka yagize

Yanditswe na Ferdinand Maniraguha
Kuya 3 Nzeri 2018 saa 08:04
Yasuwe :
0 0

Abanyarwanda bagera kuri miliyoni 7.1 babyukiye mu matora y’abadepite mu bice bitandukanye by’igihugu. Ababa mu mahanga bo batoye kuri iki Cyumweru.

Ni amatora ya Kane y’abadepite abaye nyuma ya Jenoside yakorewe Abatutsi.

Imitwe ya politiki itanu irimo FPR Inkotanyi n’amashyaka bafatanyije, Democratic Green Party of Rwanda, PSD, PL na PS Imberakuri hamwe n’abakandida bane bigenga barahatanira imyanya 53.

Kugira ngo ishyaka cyangwa umukandida wigenga batsindire imyanya mu Mutwe w’Abadepite, rigomba kugira nibura 5% by’amajwi y’abatoye neza (hatarimo impfabusa).

Ukurikije abitabiriye amatora y’abadepite uyu mwaka, ishyaka rimwe nibura kugira ngo rihabwe imyanya mu mutwe w’abadepite birasaba ko ribona amajwi asaga ibihumbi 350.

Imyanya ihabwa umutwe wa politiki wagize 5% nuko bibarwa

Ingingo ya 108 y’itegeko rigenga amatora ivuga ko umubare w’imyanya ihabwa buri lisiti (y’ishyaka), uboneka bagabanyije umubare w’amajwi iyo lisiti yabonye n’umubare fatizo w’itora.

Umubare fatizo w’itora uboneka bagabanyije igiteranyo cy’amajwi ya buri lisiti yabonye nibura amajwi 5% n’umubare w’imyanya isigaye havuyemo iy’abakandida bigenga.

Ni ukuvuga ko niba imitwe ya politi yatsinze bateranyije amajwi yose y’abayitoye bagasanga ni miliyoni zirindwi, umubare fatizo w’itora uzaboneka bafashe miliyoni zirindwi bagabanye n’imyanya ihatanirwa.

Urugero ni ba nta mukandida wigenga watsinze ubwo amashyaka yaba ahatanira imyanya 53 yose bityo umubare fatizo ukaba ibihumbi 132.

Ibyo bivuze ko umutwe wa politiki wabonye 5%, yuzuye wabona imyanya ibiri mu Nteko hagasaguka amajwi ibihumbi 86.

Imyanya igenda igabanywa amalisiti hakurikijwe uko umubare w’amajwi ugenda urutana.

Niba hari ishyaka ryatowe n’abantu miliyoni eshatu (ubwo ryaba ryagize hafi 40%), bazagabanya n’umubare fatizo ribone imyanya 22 mu nteko.

Niba ishyaka ryatowe n’abantu ibihumbi 600, bazagabanya n’umubare fatizo w’itora w’ibihumbi 132, ribone imyanya ine.

Icyakora, igihe habonetse umukandida wigenga umwe ugeza kuri 5%, umubare fatizo uzaboneka hafashwe igiteranyo cy’amajwi y’abatoye amashyaka yabashije kugeza amajwi 5%, bagabanye n’imyanya 52 isigaye mu Nteko.

Mu gihe hasigaye umwanya umwe ugomba gutangwa kandi amalisiti menshi yagize umubare ungana w’amajwi asaguka, uwo mwanya uhabwa ilisiti yagize umubare munini w’amajwi asaguka.

Aya majwi babara ni ya yandi asaguka igihe ugabanyije n’umubare fatizo. Urugero niba umutwe wa politiki watowe n’abantu ibihumbi 350, uzahabwa imyanya ibiri ihwanye n’amajwi ibihumbi 264, hasigare amajwi ibihumbi 86.

Byumvikane ko igihe hari abakandida bigenga batowe cyane, imyanya amashyaka ahatanira mu nteko igenda igabanyuka. Igihe hari imitwe ya politiki yabonye amajwi atageze kuri atanu, igiteranyo kugira ngo haboneke umubare fatizo nacyo kizagabanyuka kuko amajwi y’umutwe utagejeje kuri 5% ntabarwa igihe cyo kugabana imyanya.

Abadepite mu Nteko Ishinga Amategeko icyuye igihe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza