00:00:00 IGIHE NETWORK KN KINYARWANDA EN ENGLISH FR FRANCAIS

Ibidasanzwe mu byaranze uruzinduko rwa Tshisekedi i Rubavu na Kagame i Goma

Yanditswe na Ferdinand Maniraguha
Kuya 29 Kamena 2021 saa 07:11
Yasuwe :
0 0

Tariki 26 Werurwe ubwo i Kigali hasozwaga Inama y’abayobozi bakuru b’ibigo izwi nka 2019 ka Africa CEO Forum yabaga ku nshuro ya karindwi, Perezida Félix Tshisekedi wa Repubulika Iharanira Demokarasi ya Congo wari umaze amezi abiri atowe, yahavugiye ijambo rikomeye, ariko igisobanuro cyaryo cyumvikanye kuri uyu wa Gatanu n’uwa Gatandatu ushize tariki 25-26 Kamena 2021.

Ku munsi wa nyuma w’iyo nama yabereye muri Kigali Convention Centre ikitabirwa n’abasaga 1800 mu 2019, Tshisekedi yavuze ko ibyo abanyapolitiki bakwigira byose “ibihugu byacu [u Rwanda na Congo] bizahora bituranye”.

Uwabonye cyangwa wumvise u Rwanda na Congo ku bwa Joseph Kabila, biragoye kumwemeza ukuri kw’amashusho amaze iminsi acicikana ku mbuga nkoranyambaga y’abasirikare babiri, uw’u Rwanda na Congo basuhuzanya, bacunze umutekano mu bwubahane nta n’umwe usagariye undi.

Biragoye kumvisha uwo muntu ko Perezida Tshisekedi yasuye u Rwanda kuwa Gatanu, bugacya kuwa Gatandatu Perezida Kagame na we amusura, bakajyana kureba ingaruka zatewe n’iruka rya Nyiragongo ryanashegeshe u Rwanda mu kwezi gushize.

IGIHE yakusanyije bimwe mu bintu bidasanzwe byaranze uruzinduko rw’abakuru b’ibihugu byombi mu mpera z’icyumweru gishize, bishimangira ko Abanyarwanda n’Abanye-Congo ari abavandimwe kurusha uko bamwe babitekereza.

Ubusabane mu bashinzwe kurinda umutekano

Ingabo z’u Rwanda na Congo mu myaka yashize, zahoraga zirebana ay’ingwe cyangwa se bagahura bakozanyaho bya hato na hato ku mupaka, umwe yakwibeshya akarenga ku rubibi rw’igihugu cye, imirwano ikarota.

Itsinda rishinzwe kugenzura imipaka y’u Rwanda na Congo, Expanded Joint Verification Mechanism (EJVM) ryari ryarahagorewe.

Ryahoraga mu mpaka zo guhosha umwuka mubi, ufite inkomoko mu myaka isaga 20 ishize ubwo Ingabo z’u Rwanda zambukaga muri icyo gihugu cya kabiri mu bunini muri Afurika, zigiye gusenya inkambi z’impunzi zari ziri kwisuganya ngo zigaruke guteza umutekano muke, nyuma y’aho benshi basize bagize uruhare muri Jenoside yakorewe Abatutsi.

Kuri ubu uwo mwuka w’intambara ku mpande zombi warashize, ibyo bikagaragazwa n’amashusho ndetse n’amafoto yakwirakwijwe mu mpera z’icyumweru gishize, agaragaza umusirikare w’u Rwanda n’uwa Congo bahagararanye ku burinzi ntawe usagariye mugenzi we.

Hari andi mashusho yakoze benshi ku mutima, y’umusirikare w’u Rwanda n’uwa Congo ku nkengero z’ikiyaga cya Kivu, aho umusirikare w’u Rwanda asanga uwa Congo akamusuhuza (bimwe urubyiruko rwita gutanga chance), bakaganira gato imbere yabo mu mazi hari ubwato bugenda.

Ni ikimenyetso cy’uko umugani wa Tshisekedi, abanyapolitiki b’ibihugu byombi babishatse batahiriza umugozi umwe mu gushaka amahoro, akaba umusingi w’iterambere ry’abaturage b’ibihugu byombi, aho gushora imari mu ntambara ‘isenya itubaka’.

Umusirikare w'u Rwanda (iburyo) n'uwa Congo bacunze umutekano ubwo Perezida Tshisekedi yasuraga u Rwanda
Abasirikare b'ibihugu byombi bari bacunze umutekano nta nkomyi cyangwa urwikekwe

Uruzinduko ku mpande zombi

Ntabwo ari kenshi Umukuru w’Igihugu kimwe ashobora gusura ikindi, ngo bucye uwo yasuye amwishyura. Akenshi biterwa n’uko imyiteguro ikomeye ibanziriza uruzinduko rwa Perezida, ifata igihe.

Mu mpera z’icyumweru gishize si ko byagenze, kuko ubwo Perezida Tshisekedi yasozaga uruzinduko rw’umunsi umwe yagiriye mu karere ka Rubavu ku ruhande rw’u Rwanda, Perezida Kagame yazindutse kuwa Gatandatu amusura mu Mujyi wa Goma, banajyana kureba ingaruka zatewe n’Iruka ry’Ikirunga cya Nyiragongo.

Ibi ubwabyo bitanga ubutumwa bukomeye. Icya mbere ni uko kwa kwishishanya hagati y’ibihugu byombi kwashize, aho igihe cyose umuyobozi ashakiye gusura mugenzi we, ashobora kubikora kandi bigakunda.

Ikindi ni icyizere Perezida Kagame afitiye ubuyobozi bwa Congo, ku buryo yemera gusura agace nka Goma kari muri Kivu y’Amajyaruguru, yakunze kuvugwamo umutekano muke uterwa n’imitwe yitwaje intwaro irimo n’igamije guhungabanya u Rwanda.

Ni icyizere kandi n’umusanzu ku ngamba Tshisekedi aherutse gufata zo guhashya iyo mitwe, byanatumye ubuyobozi bwa Kivu y’Amajyepfo n’Amajyaruguru bushyirwa mu maboko y’igisirikare.

Perezida Kagame yavuze Igifaransa

Ntabwo ari kenshi Perezida Kagame yagiye yumvikana mu ruhame avuga Igifaransa, inshuro zose yabikoze byabaga bifite igisobanuro gikomeye, yishimye cyangwa ashaka gutanga ubutumwa bukomeye.

Inshuro yibukwa ni tariki 7 Mata 2014 muri Stade Amahoro, ubwo yagarukaga ku ruhare rw’u Bufaransa muri Jenoside yakorewe Abatutsi mu muhango wo Kwibuka Jenoside ku nshuro ya 20.

Perezida Kagame wavuze ijambo mu gihe umubano w’ibihugu byombi wari ukirimo agatotsi, yavuze ijambo ry’Igifaransa ryabaye ikimenyabose aho yagize ati “les faits sont têtus” [Ibimenyetso birivugira].

Indi nshuro ni mu Ugushyingo 2018 ubwo yari Erevan muri Armenia mu nama ya Francophonie.

Mu muhango wo kwishimira intsinzi ya Mushikiwabo mbere y’uko atangira inshingano ze nk’Umunyamabanga Mukuru wa OIF, Perezida Kagame yahishuye uko ari i Erevan yavuze Igifaransa mu kuranga uyu wahoze ari Minisitiri w’Ububanyi n’Amahanga.

Ati “None se n’icya ‘on est ensemble’ cyananira? Louise ‘a dit qu’on est ensemble’.”

Kuba kuri uyu wa Gatandatu yarongeye avugira Igifaransa i Goma, ururimi ubundi adakunze gukoresha dore ko yigeze kuvuga ko rumugora.

Na Tshisekedi ubwe yaratangaye ubwo Perezida Kagame yavugaga ati “Monsieur le president, vraiment je vous remercie” [Nyakubahwa Perezida, ni ukuri ndabashimira].”

Umwambaro mushya ku basirikare barinda Perezida Kagame

Ingabo zishinzwe kurinda Umukuru w’Igihugu [Republican Guards) nazo zaserukanye umucyo mu ruzundiko Tshisekedi yagiriye mu Rwanda n’urwo Perezida Kagame yagiriye muri Repubulika Iharanira Demokarasi ya Congo.

Ahanini izo ngabo zari zimenyerwe mu ipantalo z’umukara n’ishati zijya gusa n’ubururu bw’ikirere, bakarenzaho gillets z’umukara. Hari ubwo kandi bajyaga bagaragara bambaye amakositimu asanzwe.

Mu cyumweru gishize byari byahindutse. Haba i Rubavu n’i Goma, izi ngabo zagaragaye mu mwambaro mushya. Ni ukuvuga amapantalo y’imikara, imipira y’imikara inyuma barengejeho gillets za kaki.

Ni ubwa mbere bari bagaragaye muri iyo myenda, ijya kumera nk’iy’abarinda Minisitiri w’Intebe wa Israel.

Perezida Kagame na Tshisekedi bitegereza ibyangijwe n'iruka rya Nyiragongo ku ruhande rwa Congo. Inyuma hari abarinda Perezida Kagame mu mwambaro wabo mushya uherekejwe na gillet ya kaki
Impuzankano nshya y'abarinda Perezida Kagame yagaragaye mu cyumweru gishize
Aha ni mu 2019 ubwo Perezida Kagame yitabiraga umuhango wo Kwita Izina abana b'ingagi wabereye mu Kinigi. Abamurinda bari bacyambara impuzankano isanzwe
Ifoto igaragaza Perezida Kagame n'abamurinda mu myambaro bari basanganywe, yafatiwe i Gatuna ku mupaka w'u Rwanda na Uganda, ubwo haberaga inama y'abakuru b'ibihugu bine yari igamije guhosha umwuka mubi hagati y'u Rwanda na Uganda

Perezida Kagame yatwaye Tshisekedi mu modoka

Tapi itukura, icyubahiro cya gisirikare n’ibindi ni bimwe bisanzwe bimenyerewe ku mukuru w’igihugu wasuye mugenzi we, icyakora si kenshi Perezida akunze kugaragara ari mu modoka kuri ‘volant’ atwaye mugenzi we.

Mu ruzinduko Tshisekedi yagiriye mu Rwanda kuwa Gatanu, Perezida Kagame yamutwaye mu modoka bagenda baganira ubwo bajyaga gusura ibikorwa remezo byangijwe n’imitingito yakurikiye iruka ry’Ikirunga cya Nyiragongo ryabaye ku wa 22 Gicurasi 2021.

Si kenshi Perezida Kagame akunze kugaragara yitwaye mu modoka cyangwa atwaye mugenzi we wamusuye, icyakora nanone si ubwa mbere. Gusa inshuro nke byabaye hari mu Ukuboza 2016 ubwo umwami wa Maroc, Mohammed VI yasuraga u Rwanda.

Muri Gashyantare 2018 ubwo Perezida Ali Bongo wa Gabon yasuraga u Rwanda, nabwo Perezida Kagame yagaragaye amutwaye mu modoka. Muri Werurwe 2019, Kagame yongeye gutwara mu modoka Uhuru Kenyatta wa Kenya mu ruzinduko rw’umunsi umwe yagiriye mu Rwanda.

Muri Mata uwo mwaka, nabwo Perezida Kagame yatwaye mu modoka Umuyobozi w’Ikirenga wa Qatar, Sheikh Tamim bin Hamad Al-Thani wari wasuye u Rwanda.

Ntabwo ari kenshi abakuru b'ibihugu bagaragara batwaye mu modoka bagenzi babo babasuye. Perezida Kagame yabikoze ubwo Tshisekedi yamusuraga i Rubavu mu cyumweru gishize
Mu mwaka wa 2016 nabwo Perezida Kagame yatwaye mu modoka umwami wa Maroc, Mohammed VI wari wasuye u Rwanda
Aha ni muri Gashyantare 2018 ubwo Perezida Kagame yari atwaye Perezida Bongo mu modoka

Ubufatanye mu gucukura no gutunganya zahabu

Wumvise ibivugwa n’abanyapolitiki batavuga rumwe na Leta ya Congo cyangwa se abandi batifuza ko umubano w’ibihugu byombi wasagamba, watekereza ko gufatanya by’umwihariko mu bijyanye n’iby’amabuye y’agaciro ari sakirirego hagati y’u Rwanda na Congo.

Umuhanda mwiza cyangwa inzu nziza yuzuye i Kigali, uzasanga bavuga ngo ni ‘amabuye ya Congo’. Ni ibintu u Rwanda rwakunze guhakana kenshi nyamara bidasiba kugaragara muri raporo za Loni ku mutekano wo mu Burasirazuba bwa Congo. Icyiza ni uko Leta ya Congo nta na rimwe yo ubwayo irabishinja u Rwanda.

Kubera ayo makuru ahora mu kirere, nta wakekaga ko kuri uyu wa Gatandatu ibihugu byombi bishobora gusinya amasezerano y’ubufatanye mu kwimakaza umucyo mu bucukuzi n’ubucuruzi bwa Zahabu hagamijwe guhashya ubucuruzi bwayo bukorwa n’imitwe yitwaje intwaro ikorera muri RDC.

Ibigo bibiri, Sakima yo muri RDC na Dither SA yo mu Rwanda nibyo bizagenzura urugendo rwose kuva mu gucukura zahabu bizakorwa na Sakima kugeza mu kuyitunganya bizakorwa na Dither SA, hirindwa ko yakomeza kujya mu maboko y’imitwe yitwaje intwaro ikoresha amafaranga yavuye muri ayo mabuye y’agaciro, mu gukomeza guteza umutekano muke.

Uku kurenga ku bivugwa no ku byakabaye bitanya ibihugu byombi ahubwo bigashyira imbere ibibihuza, ni ikimenyetso cy’uko u Rwanda na Congo ari ibihugu ‘bivandimwe’, abaturanyi bahoraho byabishaka bitabishaka.

Perezida Kagame i Rubavu kuwa Gatanu, ubwo yari aje kwakira mugenzi we wa RDC, Felix Tshisekedi
Perezida Kagame na Tshisekedi bitegereza umuhanda wangijwe n'imitingito yakurikiye iruka rya Nyiragongo muri Gicurasi uyu mwaka
Ubwo Tshisekedi yasozaga uruzinduko rwe mu Rwanda ku mugoroba wo kuwa Gatanu tariki 25 Kamena 2021
Mu kiganiro yagiranye n'abanyamakuru ubwo yasuraga Congo, Perezida Kagame yumvikanye avuga Igifaransa
Ibihugu byombi byasinye amasezerano atandukanye arimo n'ubufatanye mu bijyanye no gucukura no gutunganya zahabu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .