Rubavu: Ubuyobozi bwaburiye abakoresha inzira zitemewe bajya cyangwa bava muri RDC

Yanditswe na Mukwaya olivier
Kuya 12 Nzeri 2018 saa 05:23
Yasuwe :
0 0

Ubuyobozi bw’Akarere ka Rubavu bwasabye abaturage kwirinda gukoresha inzira zitemewe mu ngendo zijya cyangwa ziva muri Repubulika Iharanira Demokarasi ya Congo, kugira ngo inzego zibishinzwe zibashe kubatandukanya n’abagizi ba nabi.

Ni nyuma y’uko ku wa Mbere w’iki cyumweru umugabo witwa Rutabana Rugaba Benoit w’imyaka 56 wari utuye mu Kagari ka Busigari mu Umurenge wa Cyanzarwe, yarashwe n’inzego z’umutekano ari kwinjira mu Rwanda anyuze mu nzira itemewe.

Abaturage bavuga ko Rutabana yari asanganywe ibibazo by’imitungo y’umuryango we yagurishije, agahungira muri Congo.

Uwitwa Turinimana Mathieu yagize ati “Yagurishije inzu ya mushiki we ku butekamutwe kubera ko afite ikibazo cyo mu mutwe noneho Gitifu w’umurenge arabihagarika."

"Abaguze nawe bari bamaze iminsi bamwishyuza ahitamo kubahungira muri Congo, ubuzima bumugoye ashaka kugaruka kuko umupaka wari ufunze agaruka asesera bituma bamurasa.”

Ubwo yari mu nteko y’abaturage mu Murenge wa Rubavu kuri uyu wa Kabiri, Umuyobozi w’Akarere ka Rubavu, Habyarimana Gilbert, yakanguriye abaturage kwirinda guca mu nzira zitemewe kuko imipaka ifunguye.

Agira ati “Ndabasabye mwirinde ibintu byo kunyura mu mayira atemewe, aho mwisanga munyura no mu birindiro by’ingabo z’igihugu kandi ziraharinze, uzahanyura azafatwa nk’umwanzi. Ntabwo dukeneye umunyarwanda upfa kandi imipaka ifunguye.”

Akarere ka Rubavu ni kamwe mu gakunda kwambukirizwamo ibicuruzwa bya magendu akenshi biva muri RDC, kubera ko inzego z’umutekano ziba ziri maso, bagahitamo guca mu nzira zitemewe.

Umuyobozi w'Akarere ka Rubavu Habyarimana Gilbert

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza