Kwamamaza

PS-Imberakuri ntiyumva kimwe na Minagri itandukaniro riri hagati y’amapfa n’inzara

Yanditswe kuya 2-08-2016 saa 14:01' na Elias Hakizimana


Ishyaka PS Imberakuri ryatangaje ko politiki y’ubuhinzi mu Rwanda igifite ibibazo bikwiye gukemuka, ngo ari nabyo biri guteza inzara mu duce tumwe na tumwe.

Hashize iminsi mu ntara y’uburasirazuba havugwa Uturere twibasiwe n’amapfa, abandi bakavuga ko ari inzara.

Minisiteri y’ubuhinzi n’ubworozi yamaganye iyo mvugo y’inzara, isobanura ko ibyabaye mu Burasirazuba ari amapfa.

Ubusanzwe mu Kinyarwanda amapfa ni igihe izuba ryavuye ari ryinshi, rikumisha imyaka n’ibimera.Mu gihe inzara ari ibura ry’ibiribwa.

Mu Turere twa Nyagatare na Kayonza, izuba ryavuye ryumishije imyaka, ibiribwa birabura, kugeza aho abugarijwe kurusha abandi guverinoma itanze ibyo kubagoboka.

Mukabunani Christine, Umuvugizi w’ihuriro ry’amashyaka ya politiki mu Rwanda akaba n’umuyobozi mukuru w’ishyaka PS Imberakuri ubwo yari yitabiriye ubutumire bwa kongere ya 6 y’ishyaka PL kuri iki Cyumweru tariki ya 31 Nyakanga 2016, yavuze ko batumva uburyo ahantu havugwa amapfa,nta nzara ihari.

Mukabunani yagize ati ”Ibibazo birahari bitagenda, urugero ni nk’inzara iri mu gihugu aho Minisitiri w’ubuhinzi n’ubworozi numvise atangaza ngo nta nzara ihari ngo hari amapfa, ishyaka PS Imberakuri, rero ryibaza amapfa n’inzara aho bitandukanira kandi mu by’ukuri inzara irahari.”

Akomeza agira ati ” Urebye uko igihugu cy’u Rwanda giteye ntabwo bikwiye ko hakagombye kuba inzara mu baturage, ni politike mbi rero y’ubuhinzi ihari dusaba y’uko izanakosoka kuko ntabwo uko igihugu cyacu giteye, imvura dufite, imigezi dufite n’amazi menshi tubona, ntabwo twakagombye kugira inzara.”

PS Imberakuri ngo isanga imwe mu nzira zo gukemura iki kibazo ari ukubanza kwemera ko politiki y’ubuhinzi igikorwa nabi kandi Abanyarwanda bagafashwa guhinga kijyambere.

Agira ati ”Ikintu cya mbere ni ukwemera ko bigikorwa nabi kuko niba batemera ko iyi politiki ikorwa nabi ntabwo bashobora kwemera ko bikosoka, ikindi nuko Abanyarwanda bakwiye gufashwa guhinga kijyambere bagafashwa uburyo bwo gufata amazi, kuhira, kuko hari ibihugu tuzi by’ubutayu nka Isirayeli kandi bo ni aba mbere mu buhinzi natwe rero dukoresheje amazi dufite n’imvura tubona , babyigisha abaturage bakajya buhira ku buryo nta nzara yakongera kubaho.”

U Rwanda rufite ubuso buhingwa busaga hegitari miliyoni n’igice, ubugera ku bihumbi 589 bukaba bukenera kuhirwa cyane mu gihe cy’impeshyi, ariko hegitari ibihumbi 45 ni zo zishobora kuhirwa gusa, hari gahunda yo kuba nibura huhirwa hegitari ibihumbi 100 mu mwaka wa 2020.

Ngo si ubushobozi bwabuze

Mukabunani avuga ko atari ubushobozi bwabuze ngo harandurwe inzara mu gihugu ahubwo ngo habuze guhindura imikorere.

Ati “Ikintu cya mbere si ubushobozi kuko amazi turayafite, nka Isiraheli kuhira birahenda kuko mu butayu nta mvura bajya bagira, bagira imvura mu minsi 22 mu mwaka, ariko twe tugira imvura nyinshi…ntabwo rero ari ibintu bihenze, icyangombwa gusa ni uguhindura imikorere."

Mukabunani kandi avuga ko gahunda yo kuhirisha imashini yaje itinze kuko ngo iyo bikorwa mbere inzara iri mu gihugu ntiyakagombye kuba ihari.

Mukabunani avuga ko mu Rwanda nta nzara yagakwiriye kuba ihari

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 29 Nzeri 2016
Copyright © 2009 -2014 - IGIHE Ltd - All Rights Reserved