Ntekereza ko Afurika ifite buri cyose ikeneye ngo itere imbere- Kagame

Yanditswe na Kanamugire Emmanuel
Kuya 18 Werurwe 2017 saa 10:31
Yasuwe :
1 0

Ku munsi wa kabiri w’uruzinduko rw’akazi arimo mu Bushinwa, Perezida Kagame yahuye na ba ambasaderi b’ibihugu bya Afurika muri iki gihugu aho bagiranye ibiganiro ku ngingo zitandukanye zirebana n’iterambere ry’uyu mugabane nka kimwe mu byari muri gahunda y’uruzinduko rwe.

Mu butumwa yabagejejeho yasabye ko bakwita ku guharanira ubufatanye buzanira inyungu impande zombi hagamijwe koroshya iterambere umugabane wa Afurika ukeneye.

Umukuru w’igihugu yavuze ko Afurika ikwiye kongera imbaraga no kunoza ubufatanye n’ibindi bice bigize Isi mu nyungu z’impande zombi.

Kuri iyi ngingo, Kagame yasabye abahagarariye ibihugu bya Afurika mu Bushinwa kumva ko uyu mugabane ufite ibikenewe byose ngo ubashe gutera imbere byaba ibishingiye ku baturage ubwabo n’ubundi bukungu bigomba kubyazwa umusaruro aho gukomeza kubeshwaho n’abaterankunga.

Yagize ati “ Ndatekereza ko dufite buri cyose dukeneye ngo dutere imbere, duhereye ku bukungu dufite mu bihugu byacu cyane cyane abantu. Ku bijyanye n’ubundi bukungu, dufite bwinshi ugereranyije n’abandi. Kuki twakomeza kwemera ko abasoreshwa bo mu bindi bihugu ari bo bazaza kutubeshaho? Tugomba kwicunga ubwacu, tugacunga n’imitungo yacu. Tugomba kwisanisha n’abandi ku wego rw’Isi nk’aho ntacyo baturusha kuko ntacyo tubuze.”

Perezida Kagame yavuze ko Afurika ishobora kwifashisha ishoramari riyizanira inyungu nka bumwe mu buryo bwo kwigenga mu bukungu.

Yahamagariye ba amabasaderi bose guhuza imbaraga mu nzego zose z’imitegekere ariko buri wese aharanira inyungu z’igihugu ahagarariye.

Ati “Nidushyira mu bikorwa iyi myumvire, nta kizatubuza kugera ku ntsinzi.”

Perezida Kagame yanagarutse ku mavugurura yakozwe mu Muryango wa Afurika Yunze Ubumwe avuga ko hakenewe ko Abanyafurika bashyira mu bikorwa impinduka zikenewe ngo uyu mugabane utere imbere.

Perezida Kagame yahawe inshingano zo kuyobora amavugurura mu Muryango wa Afurika Yunze Ubumwe, AU mu nama ya 27 yahuje abakuru b’ibihugu na za guverinama, yabereye i Kigali umwaka ushize.

Mu mpera za Mutarama 2017, ubwo yari yitabiriye Inama ya 28 y’Umuryango wa Afurika Yunze Ubumwe (AU), Perezida Kagame yashyikirije abakuru b’ibihugu na za Guverinoma Raporo kuri aya mavugurura, aho yagaragaje ko hakiri ibibazo muri uyu muryango bishingiye ku kuba hatagaragara neza uko imiryango ishamikiye kuri AU igabana inshingano n’abanyafurika bakaba batabona akamaro k’uyu muryango.

Yanavuze ko kenshi abakuru b’ibihugu bakorana inama, bagafata imyanzuro igamije amavugurura bakayumvikanaho, ariko ntishyirwe mu bikorwa.

Perezida Kagame yageze mu Bushinwa ku wa Gatanu tariki 17 Werurwe ari kumwe na Madamu n’abandi bayobozi mu nzego nkuru z’igihugu.

Perezida Kagame yabonaye n’abahagarariye ibihugu bya Afurika ku munsi wa kabiri w’uruzinduko rwe mu Bushinwa
Perezida Kagame asuhuza bamwe mu bitabiriye ibi biganiro
Perezida Kagame yabonanye na ba ambasaderi ba Afurika nyuma y’aho ku munsi wa mbere w’uruzinduko rwe mu Bushinwa yaganiriye na Perezida w’iki gihugu
Perezida Kagame mu kiganiro yagiranye na ba ambasaderi b’ibihugu bya Afurika mu Bushinwa
Perezida Kagame na ba ambasaderi ba Afurika mu Bushinwa nyuma yo kugirana ibiganiro

Amafoto:Village Urugwiro


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza