00:00:00 IGIHE NETWORK KN KINYARWANDA EN ENGLISH FR FRANCAIS

Niba Museveni atarabaye imbata nka Himbara akwiye guhagarika ibikorwa bibi ku Rwanda

Yanditswe na Kabagambe R. Ignatius
Kuya 26 Ukwakira 2021 saa 06:51
Yasuwe :
0 0

Guverinoma ya Perezida Museveni yifuza ko u Rwanda rufata Uganda mu buryo bwihariye. Ku mpamvu z’amateka Uganda yumva ko u Rwanda ruyigomba icyubahiro cyo ku rwego rwo hejuru.

Umwanditsi Brian Mukalazi mu nkuru y’igitekerezo cye ugenekereje mu Kinyarwanda yise "Uganda n’u Rwanda birahanganye: Inkuru y’abavandimwe babiri bari mu mitsi", yasohotse mu kinyamakuru Daily Monitor ku wa 21 Ukwakira 2021, yagarutse mu buryo bweruye ku magambo y’umusirikare wa Uganda uri mu kiruhuko cy’izabukuru wavuze ku byo Museveni akomeje kubwira abaturage be mu ibanga, ko “Twakundaga gufata RPF nk’abana bato, atari n’abavandimwe.”

Uramutse umbajije navuga ko ari imyifatire mibi ariko si ikirego ntanga kandi nta nubwo ari igitekerezo cyanjye hano.

Mu magambo ye ubwe Mukalazi yakomeje avuga ko “iyo asubije amaso inyuma asanga Abanya-Uganda bagitsimbaraye ku buryo NRA yakiriye Abanyarwanda mu gisirikare. Baracyibwira ko Abanyarwanda bakesha Uganda intsinzi yo kubohora u Rwanda mu 1994 ariko ku Rwanda ibi ni ibintu bitakwihanganirwa.

Yakomeje abara inkuru ye avuga ko “hambere, icyo Abanyarwanda bibuka, ahubwo ari ubufasha bukomeye bahaye NRA mu ntambara za Museveni n’uburyo batagiriye ibihe byiza muri iki gihugu.

Uganda nta mpuhwe yigeze igirira RPF ahubwo yishyuraga ideni

Ishusho Mukalazi yatanze ni uko Uganda ihora yibeshya ko intsinzi ya RPF iyikesha Uganda nyamara iyo mitekerereze iracuramye.

Uganda ishaka ko RPF ihora iririmba indirimbo y’amashimwe ku bw’impuhwe z’icyitiriro yahawe hagati y’umwaka wa 1990 na 1994, mu gihe RPF isanga ibyo Guverinoma ya Museveni yabakoreye kwari nko kwishyura ideni. Rwabuze gica!

Nta muntu uzashobora gutsinda muri uku guterana amagambo gufite isura nk’iy’abibaza icyabanje kubaho hagati y’inkoko n’igi.

Reka Uganda ikomeze gushaka ugushimagizwa n’u Rwanda itazigera ibona uretse gusa imikoranire y’impande zombi mu by’ubucuruzi hagamijwe inyungu zisangiwe, mu gihe byaba byemeranyijweho.

Nta kindi gihari cyo gushingiraho, urugero, ni urw’intwaro zatwawe n’abasirikare b’u Rwanda batorotse igisirikare cya NRA mbere y’itariki ya 1 Ukwakira 1990 ubwo berekezaga i Kagitumba.

Mu buryo nk’ubwo u Rwanda ruzasabwa kureka gukomeza kwibutsa Uganda amaraso y’abana barwo baguye mu ntambara ya NRA y’imyaka itanu (1981-1986) na nyuma mu gihe cy’ibitero byo mu Majyaruguru no mu muburasirazuba bwa Uganda yadindije ibikorwa byo kugarura umutekano no kwiyubaka.

Habumuremyi na Museveni batsinzwe 0-5 nka Man U

Tukivuga ku bikwiye guhinduka ku mpande zombi mu rwego rwo kugana mu cyerekezo cyiza cyo kugarura umubano mwiza, ibiri mu ibaruwa ifunguye yandikiwe Perezida Kagame bihise biza mu bitekerezo byanjye.

Ni ibaruwa yanditswe n’umuntu wiyemeje gukoresha izina rya Jean Damascene Habumuremyi ngo yigaragaze nk’umunyarwanda anigira nk’uherereye i Byumba nk’aho ari umuntu utuye mu Rwanda.

Iyo baruwa yatangajwe kuri commandone post, ku wa 22 Ukwakira 2021.
Abanya-Uganda bayuririyeho batanga ibitekerezo bikocamye nk’aho ari umunyarwanda usabana agahato Perezida we gufungura umupaka.

Muri rusange yavugaga ko umukuru w’igihugu cy’u Rwanda ari we uri ku ruhande rutari rwo mu bibazo bigaragara ko bizana amahari hagati ya Kigali na Kampala.

Ikintu kimwe gikwiye gusobanuka neza ku musomyi wese w’iyi nkuru, ni umwanditsi wayo ari Umunya-Uganda mubisi.

Mu kugaragaza uwo ari we yatangiye neza, nk’uko Mancester United byayigendekeye mu mukino yahuriyemo na Liverpool. Nk’uko abakurikiye umukino wabaye ku Cyumweru babibonye (Mwibuke amahirwe yabo abanza yapfushijwe ubusa na Bruno Fernandes).

Mu gice cya kabiri cy’iyi nkuru, mu buryo bumwe n’ubw’uwo mukino, ukwiyoberanya kwa Habumuremyi kwaramutamaje agaragara uwo ari we ariko ntiyatahura ko yiyambitse ubusa.

Ukuri guhari ni uko ubwo yajyaga gusoza izo nkuru ze, we na Museveni yarengeraga yari yatsinzwe 0-5. Isomo ririmo ni uko iyo ushaka gushyira abantu ku murongo, nawe ukora ibiri ku murongo.

Icyo gitekerezo gisa n’ibisetso bitagira isomo bitanga ariko bifitanye ishusho n’iby’iyo baruwa ifunguye ndeste n’umukino wabaye ku cyumweru nimugoroba wahuje amakipe abiri y’ibihangange mu Bwongereza.

Ubwo umusifuzi yahuhaga mu ifirimbi bwa nyuma, Liverpool yasaga n’imaze umwanya mu mukino w’imyitozo aho gukina nk’ihatana. Uko yari byoroshye kuri Liverpool, ni na ko byari byoroheye umwanditsi kwihisha inyuma y’izina rihimbano.

Mu kuberaka ko ibyo yavugaga bidakwiye kwizerwa, reka mbanyurire muri imwe mu mvugo ziteye urujijo za Habumuremyi [nise Katurebe, Nuwamanya cyangwa Byabagambi].

Hari nk’aho yagize ati “Nubwo nemera ko abanzi batagomba guhabwa umwanya, ndatekereza ko twe (u Rwanda) nk’igihugu rimwe na rimwe turasa misile zitayobowe neza. Nizera cyane ko ari twe tugerageza guhindura Uganda umwanzi, ntabwo ari bo”. Ngaho nawe Nyumvira!

Ikibazo mbaza uyu mwanditsi Katurebe-Nuwamanya-Byabagambi wiyita Habumuremyi ni iki:muri Gashyantare 2010, ubwo Perezida Museveni yoherezaga Gen. Salim Saleh na Gen. Kale Kayihura kwakira General Kayumba Nyamwasa ku mupaka ibihugu bihuriyeho ahunze agiye kwifatanya na nyakwigendera Col. Patrick Karegeya ngo bakore umutwe witwaje intwaro urwanya ubutegetsi bw’u Rwanda, ubwo u Rwanda rwarimo rugira Uganda umwanzi?

Mu by’ukuri icyo gikorwa cyakozwe mu buryo bubi kigamije kurwanya u Rwanda.
Niba Uganda itarabaswe n’ibikorwa bibi kimwe na Himbara, ikwiye mu bundi buryo kubihagarika. Ubu ni ubutumwa ku bashyigikiye Katurebe-Nuwamanya-Byabagambi wiyise Habumuremyi.

Ifungwa ry’imipaka ni ikimenyetso, si ikibazo hagati y’u Rwanda na Uganda kandi arabizi.

U Rwanda si rwo rukubura umwanda ruwushyira munsi ya tapi kandi ku bw’iyi mpamvu ikomeye, Uganda ikwiye gukemura ibi bibazo ubwayo nk’uko byagaragajwe n’u Rwanda.

Atari ibyo nta mubare w’inkuru Uganda itangaza mu mazina y’amahimbano ziteze gushyira igitutu ku butegetsi bw’u Rwanda ngo butezuke ku ndangagaciro ya RPF y’ukuri. Biri mu maraso yacu. Kandi ni uko twabaye ntiduteze guhinduka!

Yoweri Kaguta Museveni, Perezida wa Uganda amaze igihe kinini yariyemeje gupyinagaza u Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .