Nyamurinda Pascal yatorewe kuyobora Umujyi wa Kigali: Uko amatora yagenze

Yanditswe na Ishimwe Israel, Rabbi Malo Umucunguzi
Kuya 17 Gashyantare 2017 saa 12:15
Yasuwe : XX
1

Nyamurinda Pascal wahoze ari Umuyobozi Mukuru w’Ikigo gishinzwe Indangamuntu, NIDA, ni we watorewe kuyobora Umujyi wa Kigali, ku mwanya asimbuyeho Mukaruliza Monique uheruka kugirwa Ambasaderi w’u Rwanda muri Zambia.

Nyamurinda yatowe ku bwiganze bw’amajwi 161 mu gihe Umuhoza Aurore bari bahanganye yagize 35, mu matora yabereye mu cyumba cy’Inama cy’Umujyi wa Kigali kuri uyu wa Gatanu, tariki ya 17 Gashyantare 2017.

Uyu mugabo w’imyaka 53, yagiriwe icyizere na benshi mu bagize inama Njyanama kuva ku rwego rw’imirenge, uturere ndetse n’Umujyi wa Kigali bagera ku 196 bari bagize inteko itora.

Uko igikorwa cy’amatora cyagenze umunota ku wundi:

Minisitiri w’Ubutegetsi bw’igihugu Francis Kaboneka asabye umuyobozi mushya gufatanya n’abayobozi asanze kuko "umutwe umwe wifasha gusara", ndetse Ibikorwa byose abaturage bakabigiramo uruhare. Yagize ati "Kuba mumutoye ni byiza, nawe kuba atowe ni byiza, ariko bizaba byiza kurushaho nimukorera hamwe , kugeza no kuri wa muturage wo hasi utuye umujyi wa Kigali. "

13:05: Nyamulinda Pascal atangiye ijambo rye ashimira abamuhaye inshingano zo gufatanya nabo mu buyobozi bw’umujyi wa Kigali, anashimira na Ambasaderi Monique Mukaruliza n’abayobozi yahasize, ku musingi mwiza bubatse uzashingirwaho ku bikorwa bitandukanye.

Ati “Nzi neza ko ubuyobozi bw’uyu mujyi wa Kigali burimo inshingano zikomeye. Tuzashyira imbere inyungu z’abaturage bacu tubinyujije mu nzego zose, imibereho myiza, ubukungu n’ubutabera.”

Yijeje ko azaha agaciro igitekerezo cya buri muturage, afatanyije n’abayobozi n’izindi nzego zirimo iz’umutekano, abikorera n’imiryango itari iya leta, hagamijwe iterambere.

Perezida wa Komisiyo y’Igihugu y’Amatora Prof Kalisa Mbanda amaze gutangaza uwatsinze amatora, ko ari ‘Pascal Nyamurinda.” Ati “Nkurikije ibimaze gukorerwa hano, mu bakandida barimo Nyamurinda Pascal na Umuhoza Aurore, Nyamurinda Pascal yagize amajwi 161 naho Aurore yagize 35, hatoye abantu 196. Ubwo ni ukuvuga ko Nyamurinda Pascal ariwe watorewe kuyobora Umujyi wa Kigali.”

Perezida wa Komisiyo y'Igihugu y'Amatora, Prof Kalisa Mbanda

Perezida wa Komisiyo Igihugu y’Amatora, Prof Kalisa Mbanda yabwiye abajyanama b’umujyi wa Kigali ko batoye umuyobozi ubikwiriye, cyane ko bakoranye mu guhuza amakuru ya NIDA n’ibijyanye n’amatora. Ati “Bamuvuze ibyiza ariko ntibabivuze byose.”

- Nyamurinda agiye guhita arahirira izi nshingano imbere y’umucamanza

Nyamurinda Pascal arahirira inshingano nshya

12:50: Nyamurinda Pascal yatorewe kuyobora Umujyi wa Kigali

Nyamurinda Pascal yatowe ku majwi 161 kuri 35 ya Umuhoza Aurore
Umuhoza Aurore niwe wari uhanganye na Nyamurinda Pascal watorewe kuba Umuyobozi w'Umujyi wa Kigali
Icyumba cy'Inama cy'Umujyi wa Kigali cyari cyuzuyemo abantu baje gukurikirana aya matora

12:35:Abatoye bose hamwe ni abantu 196, ibarura ry’amajwi ritangiye Nyamurinda arusha Aurore kuko yagize 20 undi afite 4.

Abari kubarura amajwi
Perezida wa Komisiyo y'Igihugu y'Amatora, Prof Kalisa Mbanda aganira na Minisitiri w'Ubutegetsi bw'Igihugu, Kaboneka Francis

12:30: Abajyanama bose barangije gutora, hakurikiyeho ibijyanye no kubarura amajwi kugirango hamenyekane umuyobozi mushya w’Umujyi wa Kigali

12:15: Abagize inteko itora bagizwe n’abajyanama batatu muri buri murenge muri 35 igize Umujyi wa Kigali biyongeraho ab’uturere n’ab’umujyi, bose hamwe bakaba ari 213. Mu cyumba cy’Itora hageze 132 barenze kimwe cya kabiri gisabwa kugira ngo amatora abe. Iyi mibare ishobora kwiyongera bitewe n’uko abagize inteko itora bose batarahagera.

-  Abakandida kuri uyu mwanya ni babiri, Nyamurinda Pascal akaba ahanganye na Aurore Umuhoza, amatora akaba agiye kubera mu cyumba cy’Inama cy’Umujyi wa Kigali.

Nyamurinda Pascal wahoze ari Umuyobozi Mukuru w’ikigo gishinzwe Irangamuntu, NIDA
Umuhoza Aurore yabaye umukozi wa Soras imyaka 10

-  Nyamurinda Pascal wahoze ari Umuyobozi Mukuru w’ikigo gishinzwe Indangamuntu, NIDA, yatanzweho umukandida ku mwanya w’Umuyobozi w’Umujyi wa Kigali mu matora agiye kuba kuri uyu wa 17 Gashyantare 2017. Ni we wari watorewe gusimbura Mukaruliza Monique ku mwanya w’Umujyanama w’Umujyi wa Kigali akaba yabanje no kurahira.

-  Umuhoza Aurore yabaye umukozi wa Soras imyaka 10, avamo ajya muri Sonarwa mu biro bishinzwe abakozi no kubahugura, ubu akaba yari akuriye ishami ryo gushaka amasoko muri Sonarwa rikorera ku Kimironko mu Mujyi wa Kigali.

-  Mu bayoboye Umujyi wa Kigali, Mukaruliza Monique,niwe uwuyoboye igihe gito kingana n’amasaha 8184 ahwanye n’iminsi 341 kuko aherutse kugirwa Ambasaderi w’u Rwanda muri Zambia atarangije manda yari yaratorewe kuya 29 Gashyantare 2016.

Mukaruliza Monique aherutse kuganira na IGIHE atangaza ibyo yishimira mu gihe yari amaze kuri ubu buyobozi. Kanda hano usome inkuru irambuye

Nyuma ya 1994 kugeza muri 2016, Umujyi wa Kigali umaze kuyoborwa n’abayobozi 6 barimo aba perefe bawuyoboye ukitwa Perefegitura y’Umujyi wa Kigali. Muri abo ba Perefe harimo Lt Col. (Icyo gihe yari Majoro) Rosa Kabuye (1994- 1997), Musoni Protais (1997-1999) , Kabandana Mariko (1999- 2001).

Muri ba Meya harimo Mutsindashyaka Théoneste (2001-2006), Kirabo Aissa Kacyira (2006-2011), Ndayisaba Fidèle(2011- 2016) na Mukaruliza Monique (2016-2017).

Amafoto: Mazimpaka Jean Pierre


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza