Kagame yakiriye Jock Boyer wamusezeranyije kumenyekanisha u Rwanda binyuze mu mukino w’amagare

Yanditswe na Cyprien Niyomwungeri
Kuya 23 Werurwe 2017 saa 06:30
Yasuwe :
1 0

Perezida Kagame yakiriye uwari umutoza w’ikipe y’igihugu y’umukino w’amagare akaba n’Umuyobozi w’ishuri ry’uwo mukino riri i Musanze, Jock Boyer, wamusezeranyije ko agiye iwabo muri Amerika kumenyekanisha u Rwanda binyuze mu mukino w’amagare.

Mu myaka 10 ishize umukino w’amagare umaze kwandika izina mu mitima y’Abanyarwanda, ibyo bikagaragarira mu birori by’akataraboneka by’irushanwa ryayo ngarukamwaka ‘Tour du Rwanda’, rikurura ibihumbi n’ibihumbi by’abafana ndetse n’abakinnyi b’igihugu ntibabatenguhe.

Kuri uyu wa kane uwari umutoza w’ikipe y’igihugu y’amagare wanagize uruhare rufatika mu iterambere ryayo mu Rwanda, Jock Boyer, Minisitiri w’umuco na siporo, Uwacu Julienne n’Umuyobozi w’ishyirahamwe ry’umukino w’amagare, Ferwacy, Aimable Bayingana bahuye na Perezida Kagame, bamwereka icyerekezo cy’uwo mukino.

Minisitiri Uwacu yabwiye itangazamakuru ko ari ngombwa guteza imbere uyu mukino kuko ibimaze kugerwaho byerekana ko bishoboka kugera kure cyane heza harenze uko bimeze ubu.

Yahakanye ko umutoza Jock Boyer ugiye gusubira iwabo muri Amerika arangije akazi ke mu Rwanda, asobanura ko uburyo yagakoraga aribyo bigiye guhinduka.

Yagize ati “Ubundi yakoraga ku buryo buhoraho ari mu Rwanda, agakora akazi ko gutoza ikipe, gushakisha inkunga zafasha umukino gutera imbere. Ubu igihinduka ni uko azajya akorera kenshi hanze kurusha uko azajya akorera hano.”

Yakomeje agira ati “Jock azasubira muri Amerika agerageze gukoresha inararibonye, ubumenyi n’abantu baziranye mu kurushaho kumenyekanisha u Rwanda binyuze mu mukino w’amagare no gushaka abo dufatanya bashobora gutanga n’inkunga ziza kunganira ririya shuri ry’umukino w’amagare.”

Yongeraho ko mu marushanwa atandukanye ikipe y’igihugu yitabira aho bizashoboka hose azajya aba ari kumwe n’ikipe.

Umutoza Jock Boyer avuga ko umukino w’amagare mu Rwanda umaze kugera ku rwego rushimishije kandi azakomeza gutanga umusanzu we mu iterambere ryawo.

Yagize ati “Nzabasha gutekereza ku mishinga itandukanye, nzabasha gukusanya inkunga nyinshi, nubwo ntazabasha kuba umunsi ku munsi mu ishuri ry’umukino w’amagare mu Rwanda, ariko nzakora ibyateza imbere uwo mukino mu Rwanda kuko bigaragara ko twagera kure harenze aho turi.”

Yishimira ko hari ibitangaza byabaye muri uyu mukino nk’aho hari abakinnyi bagiye mu mikino olimpiki, urwego rwa Tour du Rwanda rukazamuka n’ibindi. Gusa asanga hagikenewe abatoza b’abanyamwuga, abakanishi, impano nshya, gufasha amakipe n’ibindi bizatuma indi myaka 10 iba myiza kurushaho.

Umuyobozi wa Ferwacy, Bayingana Aimable, yatangaje ko ikigiye kwibandwaho ari ukuzamura ubumenyi bw’Abanywaranda mu gutoza amagare, kuyakanika ku buryo bugezweho, no kureba uko uwo mukino watera imbere hakoreshejwe ubukerarugendo.

Yahishuye ko ikigo cya Musanze kigiye gusigara kiyoborwa na Richard Mutabazi wahoze ari Umunyamabanga w’ishyirahamwe ry’umukino w’intoki, Basketball.

Perezida Kagame yakiriye Jock Boyer, bagirana ibiganiro
Umutoza Jock Boyer yavuze ko umukino w’amagare mu Rwanda umaze kugera ku rwego rushimishije kandi azakomeza gutanga umusanzu we mu iterambere ryawo
Jock Boyer, Minisitiri w’umuco na siporo, Uwacu Julienne n’Umuyobozi w’ishyirahamwe ry’umukino w’amagare, Ferwacy, Aimable Bayingana bahuye na Perezida Kagame, bamwereka icyerekezo cy’uwo mukino
Umuyobozi w’ishyirahamwe ry’umukino w’amagare, Ferwacy, Aimable Bayingana, Jock Boyer, Perezida Kagame na Minisitiri wa Siporo n'Umuco, Uwacu Julienne
Jock Boyer wahoze ari umutoza mu mukino w'amagare aganira n'itangazamakuru

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza