EALA yitafatanije n’Abanyarwanda Kwibuka Jenoside yakorewe Abatutsi

Yanditswe na Rene Anthere Rwanyange
Kuya 14 Mata 2013 saa 09:10
Yasuwe :
0 0

Abadepite mirongo ine bari mu Nteko Ishinga Amategeko y’ Umuryango wa Afurika y’Iburasirazuba (EALA: East African Legistative Assembly), basuye Urwibutso rwoa Jenoside rwa Kigali ruri ku Gisozi, basobanurirwa amateka ya Jenoside yakorewe Abatutsi mu Rwanda.
Basobanuriwe amateka ya mbere y’ ubukoloni, mu gihe cy’ubukoloni, muri Leta zabanje, amateka ya Jenoside yakorewe Abatutsi, uruhare rw’itangazamakuru n’urw’imiryango yigenga muri Jenoside yakorewe Abatutsi,u Rwanda nyuma ya Jenoside (...)

Abadepite mirongo ine bari mu Nteko Ishinga Amategeko y’ Umuryango wa Afurika y’Iburasirazuba (EALA: East African Legistative Assembly), basuye Urwibutso rwoa Jenoside rwa Kigali ruri ku Gisozi, basobanurirwa amateka ya Jenoside yakorewe Abatutsi mu Rwanda.

Basobanuriwe amateka ya mbere y’ ubukoloni, mu gihe cy’ubukoloni, muri Leta zabanje, amateka ya Jenoside yakorewe Abatutsi, uruhare rw’itangazamakuru n’urw’imiryango yigenga muri Jenoside yakorewe Abatutsi,u Rwanda nyuma ya Jenoside yakorewe Abatutsi, ubutabera n’ibindi.

Uru rugendo bagiriye mu Rwanda rwo kwifatanya n’abanyarwanda kwibuka ku nshuro ya 19 Jenoside yakorewe Abatutsi mu Rwanda, bavuze ko rwatumye basobanukirwa kurushaho Jenoside yakorewe Abatutsi. Batangaza ko ibihugu byo mu karere bigomba gushyira hamwe mu gukumira Jenoside.

Depite Mumbi Ngaru wo mu gihugu cya Kenya yagize ati “Twabonye amateka ababaje. Jenoside yakorewe Abatutsi mu Rwanda yatubereye isomo mu kurwanya no gukumira icyatera Jenoside mu bihugu byo mu karere , muri Afurika ndetse no ku Isi hose. Ni ukuyirwanya, ntizongere kubaho ukundi.”

Yatanze ubutumwa ku babyeyi b’abategarugori, avuga ko ari isoko y’umuryango, avuga ko bagomba kurera abana neza babatoza umuco w’amahoro n’indangagaciro nziza, zitarangwa n’amacakubiri.

Depite Dan Kidega wo mu gihugu cya Uganda,we yavuze ko ibihugu bigize Umuryango wa Afurika y’Iburasirazuba byafatanya mu kurwanya no gukumira Jenoside, bigafatanya mu gushaka ikibateza imbere.

Mille Sebalu wo mu gihugu cya Uganda wari uhagarariye iri tsinda ryasuye Uwibutso rwa Jenoside rwa Kigali, yashimiye ingabo za FPR Inkotanyi zahagaritse Jenoside yakorewe Abatutsi, asaba ko harushaho kongera ubufatanye mu bihugu byo mu muryango wa EAC mu gukumira Jenoside, hanirindwa icyabahungabanya, bityo hakarushaho gukorwa ibikorwa byiza bifasha abantu kubaho mu mahoro.

Minisitiri Ushinzwe ibikorwa by’Umuryango wa Afurika y’Iburasirazuba Mukaruriza Monique, yavuze ko uru rugendo ruzabafasha mu gutunganya amategeko no gufata ibindi byemezo byo kurwanya Jenoside mu bihugu bigize EAC.

Akomeza agira ati “Ni mu rwego rw’ubufatanye, aho hanateganywa kujya hibukwa Jenoside yakorewe Abatutsi mu Rwanda mu bihugu bigize EAC,bigashyira hamwe mu kuzirikana Jenoside yakorewe Abatutsi no mu kuyirwanya. Ibihugu byose bikabyumva, bigafatira hamwe ingamba zo kuyirwanya.”

Banasabye ko ibihugu bigicumbikiye abakoze Jenoside yakorewe Abatutsi byo mu karere, byabashyikiriza ubutabera, urugero nka Kenya icumbikye Kabuga Felicien ukekwaho kugira uruhare rukomeye mu gutegura, gushyira mu bikorwa no gutera inkunga umugambi wa Jenoside yakorewe Abatutsi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza