00:00:00 IGIHE NETWORK KN KINYARWANDA EN ENGLISH FR FRANCAIS

Amb. Karega yasubije abamwise ‘shitani yigize umuntu’, intasi n’umwicanyi

Yanditswe na Kanamugire Emmanuel
Kuya 22 Gicurasi 2021 saa 04:24
Yasuwe :
0 0

Ambasaderi w’u Rwanda muri Repubulika Iharanira Demokarasi ya Congo (RDC), Vincent Karega, yamaganye ibirego bimaze iminsi bikwirakwizwa ku mbuga nkoranyambaga no mu bitangazamakuru byo muri iki gihugu, ko ari igikoresho cya Leta y’u Rwanda mu bwicanyi, ubutasi n’ubugizi bwa nabi.

Ambasaderi Vincent Karega ari hafi kuzuza imyaka ibiri ahagarariye u Rwanda muri Repubulika Iharanira Demokarasi ya Congo, inshingano nk’izi akaba yarazibayemo no muri Afurika y’Epfo.

RDC ni cyo gihugu yavukiyemo anagikuriramo kuko ababyeyi be bafite inkomoko mu Rwanda ari ho bari batuye akaba yarahavuye afite imyaka 27 agaruka mu Rwanda mu 1995, nyuma y’imyaka mike aba muri Afurika y’Epfo.

Avuga indimi eshatu zikoreshwa muri Congo adategwa zirimo Igifaransa, Igiswayire n’Ilingala naho Igi-Tshiluba n’Ikikongo ni mu buryo bworoheje.

Mu kiganiro aherutse kugirana n’ikinyamakuru Business et Finances cyo muri RDC, Vincent Karega yagarutse ku bamwibasiye ku mbuga nkoranyambaga no mu bitangazamakuru byo muri RDC, umwaka ushize bamugaragaza nka ‘shitani yigize umuntu’, intasi y’u Rwanda, umwicanyi n’ibindi. We yavuze ko ari ibihuha bidafite ishingiro.

Ni ibintu ahanini byazamutse cyane guhera mu 2019 ubwo yagirwaga Ambasaderi w’u Rwanda muri RDC, avuye kuruhagararira muri Afurika y’Epfo.

Mu gihe Karega yari Ambasaderi w’u Rwanda muri Afurika y’Epfo nibwo havuzwe iby’urupfu rwa Patrick Karegeya wari warahunze u Rwanda n’iraswa rya Kayumba Nyamwasa bombi babarizwaga mu mutwe w’iterabwoba wa RNC.

Ni impfu zakunze kwegekwa kuri Leta y’u Rwanda nyamara rukagaragaza ko ntaho ruhuriye nazo, by’umwihariko ko muri icyo gihugu hakunze kugaragara impfu nk’izo n’iraswa rya hato na hato rikozwe n’amabandi.

Abanye-Congo batavuga rumwe na Leta nibo bakije umuriro, bavuga ko Ambasaderi Karega azanywe no guhiga Abanyarwanda bahungiye muri icyo gihugu.

Ambasaderi Karega yasobanuye ko iyo aza kuba afite imyitwarire nk’iyo avugwaho bitari gushoboka ko yemererwa kuba muri izi nshingano kuko inzego zibishinzwe zibanza gukora igenzura rya ngombwa ku muntu watoranyijwe kuba ambasaderi mbere y’uko zemera kumwakira.

Asubiza umunyamakuru bagiranaga ikiganiro yagize ati “Twemere ko ndi umwicanyi, uratekereza ko nari kwemererwa kuba Ambasaderi muri Afurika y’Epfo mbere y’uko nza muri Repubulika ya Demokarasi ya Congo? Sindabona igihugu gishobora kugururira amarembo umuntu ufite imyitwarire itabereye ambasaderi. Ndi umuntu wabaye mu nshingano ziremereye; nabaye minisitiri mu bihe bitandukanye, izina ryanjye kuva kera rirubashywe kuko inzego nabayemo ntizishobora gukandagirwamo n’umunyabyaha nk’uko bivugwa.”

“Mu masezerano ya Vienne, nta gihugu na kimwe ku Isi gishobora kwakira Ambasaderi ufite bene iyo mitwarire.”

Am. Karega yakomeje avuga ko ntacyo yikeka kuko nta zina ry’umuntu n’umwe yishe riragaragazwa nk’igihamya. Ababivuga ngo ni abagamije kumusiga icyasha ataramenya icyo bagamije.

Ati “Iyo mbitekereje mbifata nk’aho ari undi muntu twitiranwa ukora ibyo bintu. Ikigeretse kuri ibyo, ntabwo nemeranya n’abavuga ko Guverinoma yanjye ifite abicanyi cyangwa agatsiko k’abakorera mu mwijima. Dufite leta ifite inzego z’ubuyobozi zihamye, igisirikare n’iz’iperereza zifite inshingano zisobanutse. Nishimiye kuba Umunyarwanda no guhagararira igihugu cyanjye mu gihugu navukiyemo.”

“Sinumva uburyo ibyo byatwara abantu umwanya bigahinduka ikibazo cya Congo ikabinshyiraho. Maze amezi 15 muri RDC, niba hari ibyaha nahakoreye nibigaragazwe.”

Bimwe mu byaranze ubuzima bwa Ambasaderi Vincent Karega

Ambasaderi Karega yavukiye i Katanga hafi ya Lubumbashi mu 1963. Muri kaminuza mu cyiciro cya mbere yize ibijyanye n’ubumenyi mu bya politiki abona impamyabushobozi yamuhesheje uburenganzira bwo gukomeza icyiciro gikurikiyeho mu bijyanye n’ibijyanye n’imiyoborere.

Yabonye akazi bwa mbere ari muri Congo ariko nyuma yimukira muri Afurika y’Epfo, aho yakoze muri sosiyete yakoraga ibijyanye no kohereza ibicuruzwa mu mahanga. Yagarutse mu Rwanda mu 1995 ahita anabona akazi muri Minisiteri y’Uburinganire nk’umukozi usanzwe.

Mu 1998 yabaye ukuriye ibijyanye n’igenamigambi muri Minisiteri y’Uburinganire. Nyuma y’imyaka ibiri (mu 2000) yimukiye muri Minisiteri y’Imari n’Igenamigambi aho yari akuriye ishami rishinzwe igenamigambi na gahunda y’imbaturabukungu igamije kugabanya ubukene ku rwego rw’igihugu (EDPRS).

Mu 2003 yabaye Umunyamabanga Mukuru muri Minisiteri y’Abakozi ba leta n’Umurimo. Mu 2006 yabaye Umunyamabanga wa Leta ushinzwe inganda no guteza imbere ishoramari muri Minisiteri y’Ubucuruzi n’Inganda maze nyuma y’imyaka ibiri ahabwa izindi nshingano nka muri Minisiteri y’ibidukikije n’umutungo kamere. Yabaye Minisitiri w’Ibikorwa Remezo, Ambasaderi muri Afurika y’Epfo na RDC kuri ubu.

Ambasaderi w'u Rwanda muri Repubulika Iharanira Demokarasi ya Congo, yamaganye abamwibasiye bamushinja ibyaha birimo ubwicanyi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .