00:00:00 IGIHE NETWORK KN KINYARWANDA EN ENGLISH FR FRANCAIS

Abayobozi bakomeye basuye u Rwanda bagasiga amateka, ubuzima bugahagarara

Yanditswe na Ferdinand Maniraguha
Kuya 8 Ukwakira 2021 saa 07:33
Yasuwe :
0 0

Urugo ni urugendwa, uwo ni umugani wa Kinyarwanda, icyakora abashyitsi bose si bamwe ku mpamvu zitandukanye. U Rwanda rukimara kubona ubwigenge mu 1962, rwashyize ingufu mu gutsura umubano n’amahanga, ibintu byatumye rufungura amarembo abanyamahanga bararusura ari na ko abayobozi n’abaturage barwo batembera na bo bajya kureba iyo bweze!

Mu myaka hafi 60 ishize, u Rwanda rwasuwe n’abayobozi bakomeye batandukanye gusa hari abahasize urwibutso n’amateka akomeye nka Valéry René Marie Georges Giscard d’Estaing w’u Bufaransa, rwakupye amazi n’umuriro muri Kigali, urwa Muammar Gaddafi rwafunze amashuri, urwa Bill Clinton wagarukiye ku kibuga cy’indege i Kigali n’abandi.

Akenshi igituma izo nzinduko zigira umwihariko, ni uburyo umutekano uba wakajijwe rimwe na rimwe bikabangamira bamwe mu baturage, hatirengangijwe n’inyungu zirenze ibyo zibikurikira nk’amasezerano akomeye ahasinyirwa n’ibindi.

Giscard d’Estaing yageze muri Kigali amazi arabura

Giscard d’Estaing yasuye u Rwanda mu 1979, ahamara iminsi itandatu

Giscard d’Estaing wayoboraga u Bufaransa we n’umufasha we bageze i Kigali tariki 17 Gicurasi 1979, mu ruzinduko rwamaze iminsi itandatu rwahuriranye n’inama ya gatandatu ihuza Afurika n’u Bufaransa (Conference Franco-Africaine).

Niwe mukuru w’igihugu gikomeye wari ugeze mu Rwanda kuva rubonye ubwigenge, bishobora kuba biri no mu byatumye umutekano we i Kigali ukazwa cyane, dore ko Leta ya Juvenal Habyarimana yari imaze iminsi icuditse n’u Bufaransa kandi ibukeneyeho inkunga nka kimwe mu bihugu byari byihagazeho.

Inkuru bijyanye: 1979: Incamake ku ruzinduko rwa Perezida w’u Bufaransa rwahagaritse amaraso ya bamwe muri Kigali

Giscard yageze mu Rwanda ibikorwa remezo nk’amahoteli, amazi n’amashanyarazi bikiri bike cyane. Kubera ko byanahuriranye n’inama yahuzaga u Bufaransa na Afurika yari yitabiriwe n’abakuru b’ibihugu bisaga icumi, imbaraga nyinshi zari zashyizwe mu gutuma abashyitsi bagubwa neza zabangamiye cyane abari batuye mu mujyi wa Kigali.

Kugira ngo abashyitsi mu mahoteli barayemo batabura amazi, byabaye ngombwa ko mu duce tumwe na tumwe tw’umujyi abaturage bafungirwa amazi, abashobewe bashoka ibishanga kuvoma.

Mu gihe kandi abakuru b’ibihugu babaga baza, batembera cyangwa bataha, imihanda imwe yarafunzwe ku buryo hari bamwe baburaga uko bataha mu ngo zabo ndetse hari n’ababaga bagiye ku kibuga cy’indege mu ngendo bakabura uko bagenda indege zikabasiga.

Gaddafi yaje mu Rwanda, amashuri arafunga

Gaddafi yasuye u Rwanda umutekano wakajijwe, amashuri muri Kigali arafunga bajya kumwakira

Muammar Gaddafi ni umwe mu bakuru b’ibihugu bubatse amateka muri Afurika haba mu butunzi, ubuhangage bw’igihugu cye n’imyaka 40 yamaze ku butegetsi, byose byasize Libya mu kangaratete n’ubu itaravamo nyuma y’imyaka 10 yishwe.

Umubano wa Libya n’u Rwanda watangiye kuzamuka Habyarimana agifata ubutegetsi mu 1973, ukomereza aho dore ko Gaddafi yasaga nk’uvuga rikijyana mu bayobozi bo muri Afurika, hakiyongeraho inyota yari afite yo kuyiyobora nk’umugabane bigatuma yiyegereza buri wese.

Uruzinduko rwe mu Rwanda rwabaye ku wa 16 Gicurasi 1985. Icyo gihe amashuri muri Kigali yari yafunze imiryango, radio y’igihugu yiriwe itangaza amakuru y’uruzinduko rwe, imihanda minini ari we yahariwe, Orchestre Abamararungu imuhimbira indirimbo.

Inkuru bijyanye: Ibyo utamenye ku ruzinduko rwa Gaddafi mu Rwanda rwasize yandagaje Mobutu wa Zaïre

Mu muhanda uva ku kibuga cy’indege abaturage bari benshi, bose bashikiye kureba umugabo wafatwaga nka Perezida wa mbere ukize muri Afurika. Abasirikare b’u Rwanda bamugenderaga kure, arinzwe cyane n’abasirikare be kabuhariwe, abakobwa bivugwa ko babaga ari ‘amasugi’, nubwo nyuma haje gusohoka raporo zivuga ko yajyaga abafata ku ngufu.

Gaddafi yamaze iminsi ibiri mu Rwanda, ku munsi wa nyuma asura ikigo cyamwitiriwe i Nyamirambo kirimo umusigiti n’ikigo cy’amashuri cya ESSI Nyamirambo. Mu kujya i Nyamirambo, ngo abagore b’Abayisilamukazi bari bamusasiye amakanga mu muhanda, abantu ari uruvunganzoka ku nkengero z’umuhanda basabwe kuza kureba uwo muntu wafatwaga nk’igihangange muri Afurika.

Bill Clinton yagarukiye ku kibuga cy’indege

Clinton yakiriwe ku kibuga cy'indege ahamara amasaha atatu kuko umutekano mu Rwanda wari utarizerwa

Rumwe mu ngendo z’abakuru b’ibihugu zasize amateka mu Rwanda, urwa Bill Clinton tariki 25 Werurwe 1998 ntirwaburamo. Icya mbere kirugira urudasanzwe ni uko ari we Perezida wa mbere wa Leta Zunze Ubumwe za Amerika wari ugeze mu Rwanda, akaba kandi umwe mu bayobozi bake bakomeye ku Isi wari urusuye nyuma ya Jenoside yakorewe Abatutsi.

Ni uruzinduko rufite amateka kandi kuko ari rwo Amerika yemereyemo uburangare bwayo no gutererana Abanyarwanda muri Jenoside yakorewe Abatutsi, ikiyemeza gukora ibishoboka byose ngo u Rwanda rwongere kuba igihugu gitekanye kandi gifite ubumwe.

Nubwo ari uruzinduko rw’amateka, amasaha atatu yose Bill Clinton yamaze ku butaka bw’u Rwanda, yayamaze mu kibuga cy’indege i Kanombe ari na ho yahuriye n’abayobozi b’u Rwanda, abarokotse Jenoside yakorewe Abatutsi n’abandi bari baje kumwakira.

Impamvu rwabereye ku kibuga cy’indege ni uko Amerika yari yatangaje ko itarizera umutekano w’u Rwanda. Icyo gihe hari hashize iminsi mu bice by’Amajyaruguru n’Uburengerazuba bw’u Rwanda habagwa ibitero by’Abacengezi bari bagizwe n’abasize bakoze Jenoside.

Bush yamaze mu Rwanda amasaha arindwi

George Bush niwe Perezida wa Amerika uheruka mu Rwanda

Itandukaniro rinini hagati ya George Bush na Clinton, ni uko umwe yahamaze amasaha atatu undi akahamagara arindwi, ndetse Bush we akemera kurenga ikibuga cy’indege agasura urwibutso rwa Jenoside yakorewe Abatutsi ku Gisozi, agasinya amasezerano y’ishoramari hagati y’ibihugu byombi, ndetse no gutaha icyicaro gishya cya Ambasade ya Amerika mu Rwanda ku Kacyiru.

Inkuru bijyanye: Uruzinduko rw’amasaha arindwi Bush yakoreye mu Rwanda, rugasiga ishusho nshya y’umubano mu ishoramari

Nk’izindi ngendo zose za Perezida wa Amerika, umutekano muri Kigali by’umwihariko mu nzira Bush yanyuragamo wari wakajijwe. Nirwo ruzinduko Perezida wa Amerika aheruka kugirira mu Rwanda.

Benjamin Netanyahu yahagaritse ubuzima muri Kigali

Uruzinduko rwa Benjamin Natanyahu ni rumwe mu zasize amateka kubera uburyo umutekano wari wakajijwe impande zose i Kigali

Benshi baracyabyibuka ku hashize imyaka itanu gusa ariko Benjamin Netanyahu wahoze ari Minisitiri w’Intebe wa Israel, ni umwe mu banyacyubahiro basuye u Rwanda uruzinduko rwe rugasiga amateka.

Ntabwo yamaze amasaha menshi muri Kigali kuko yahageze ku wa Gatatu tariki 6 Nyakanga akahava uwo munsi ahagana saa kumi n’ebyiri z’umugoroba, icyakora ku muntu wari muri Kigali uwo munsi ntawe utaramenye ko yasuye u Rwanda.

Ubusanzwe imihanda imwe n’imwe minini irafungwa iyo hari umushyitsi ukomeye wasuye u Rwanda, akenshi igafungwa agiye gutambuka kugira ngo umutekano we wizerwe. Umunsi Netanyahu yasuraga u Rwanda, imihanda minini hafi ya yose yafunzwe amasaha yose yamaze mu gihugu.

Inkuru bijyanye: Netanyahu mu Rwanda

Uretse gufunga imihanda ku binyabiziga n’abanyamaguru kwambukiranya imihanda yafunzwe byari bigoye kuko mu bice byinshi abashinzwe umutekano bari bawukajije bidasanzwe.

Uru ruzinduko rwabaye umusingi wo gushimangira umubano w’ibihugu byombi kuko rwashibutsemo Ambasade ya Israel mu Rwanda, ibihugu byombi bikaba biri no gukorana ku yindi mishinga y’iterambere.

Uruzinduko rwa Xi Jinping na Narendra Modi

Aba bakuru b’ibihugu byegeranye u Bushinwa n’u Buhinde, basuye u Rwanda mu minsi yegeranye kuko Perezida Jinping yasoje uruzinduko rwe, abisikana na Minisitiri w’Intebe w’u Buhinde, Narendra Modi.

Xi Jinping yageze mu Rwanda ku mugoroba wo ku wa 22 Nyakanga 2018, ahava ku munsi wakurikiyeho tariki 23 Nyakanga. Umutekano wari wakajijwe ariko bwo hafunzwe umuhanda umwe, uva cyangwa ujya ku kibuga cy’indege i Kanombe uturutse cyangwa werekeza Kacyiru.

Xi Jinping yasoje uruzinduko rwe mu Rwanda ku gicamunsi cyo tariki 23 Nyakanga 2018 ahita yerekeza muri Afurika y’Epfo. Yahavuye abisikana na Narendra Modi w’u Buhinde na we wamaze iminsi ibiri mu Rwanda.

Inkuru bijyanye: Perezida Jinping w’u Bushinwa yakiriwe i Kigali mu ruzinduko rw’iminsi ibiri

Uruzinduko Perezida Jinping na Minisitiri w’Intebe Modi, bagiriye mu Rwanda muri uko kwezi, rwasinyiwemo amasezerano ya miliyoni zirenga 300 z’amadolari, ni ukuvuga miliyari zirenga 260 z’amafaranga y’u Rwanda.

Narendra Modi yasuye u Rwanda hashize amasaha make Perezida Xi Jinping na we avuye mu Rwanda
Perezida Xi Jinping yasuye u Rwanda iminsi ibiri, asiga ibihugu byombi bisinye amasezerano atandukanye y'ubufatanye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .