00:00:00 IGIHE NETWORK KN KINYARWANDA EN ENGLISH FR FRANCAIS

Abashinja u Rwanda ko ruyobojwe igitugu, ibipimo birabanyomoza-Amb. Karega

Yanditswe na IGIHE
Kuya 29 Kanama 2021 saa 06:08
Yasuwe :
0 0

Ambasaderi w’u Rwanda muri Repubulika Iharanira Demokarasi ya Congo, yatangaje ko hari ibipimo bifatika biva mu nzego zinyuranye, byerekana ko u Rwanda ruyobowe neza, bitandukanye n’abavuga ko ruyobojwe igitugu.

Yabigarutseho mu kiganiro yagiranye na Radio Okapi, cyagarutse ku ngingo zitandukanye zirimo umubano w’ibihugu byombi, umutekano mu Burasirazuba bwa RDC, uko uburenganzira bwa muntu buhagaze n’ibindi.

Asubiza ku byerekeye n’uburenganzira bwa muntu mu Rwanda, Ambasaderi Karega, yavuze ko hari ibihuha bikomeza gukwirakwizwa, ko ibintu byacitse ariko ku rundi ruhande hakaba hari imibare n’ibipimo byerekana ikinyuranyo.

Ati “Bamwe bavuga ko u Rwanda rubobojwe igitugu, kubera ko ngo habaho amatora ariko muri manda eshatu hatorwa Perezida umwe. Ni mu gihe hari abandi bavuga ko u Rwanda ruri ku mwanya wa kabiri muri Afurika mu bihugu biyobowe neza. Ku bijyanye n’ibipimo byo gukorera mu mucyo turi ku mwanya wa kabiri ku mugabane, ku byo korohereza ishoramari turi ku mwanya wa kabiri.”

“Mu bijyanye no kubungabunga umutekano w’abantu n’ibyabo turi ku mwanya wa mbere. Kurengera ibidukikije, isuku n’isukura turi ku mwanya wa mbere muri Afurika.

Mu zindi ngeri, Amb. Karega yavuze ko u Rwanda ruza ku isonga harimo guteza imbere uburenganzira bw’abagore aho kugeza ubu ari cyo gihugu rukumbi ku mugabane gifite abagore bangana na 63% mu Nteko Ishinga Amategeko.

Abagore bangana na 50% kandi bari muri guverinoma, 40% mu nzego z’ubutabera. Si aho birangirira kuko mu barimu, abakanishi, abashoferi ubasangamo kimwe no mu zindi nzego zose kandi bafite uburenganzira busesuye.

Yakomeje agira ati “Turebye ku bipimo usanga turi hejuru cyane y’ibihugu bimwe na bimwe byo ku mugabane wa Aziya n’u Burayi. Turi mu bihugu bifite ubukungu budapfa guhungaban kandi turi ku rugero rwo hejuru mu kugabanya ubukene. Icyizere cyo kubaho cyari ku myaka 49 mu 1994, kuri ubu ni hafi 70 mu gihe ibindi bihugu biri mu karere kamwe muri Afurika yo munsi y’ubutayu bwa Sahara bikiri mu myaka 50. Abavuga ko hari igitugu, ko ibi n’ibi bibura, ibipimo birabanyomoza.”

Bivuze ko u Rwanda ari nta makemwa?

Asubiza iki kibazo, Amb. Karega yavuze ko bidasobanuye ko u Rwanda ari nta makemwa kuko no mu bihugu byibwira ko byateye imbere muri demokarasi hatabura ibitagenda.

Ati “Hano mwibwira ko mufite demokarasi ariko igihe kiragera ukumva hari ibinyamakuru byafunzwe, ibyo bibaho, bibaho hose no mu Bufaransa…”

Yagarutse kandi ku makuru akwirakwizwa na bamwe mu banyapolitiki b’abanye-Congo, ko igihugu cyabo cyagurishijwe ku Rwanda, avuga ko nta shingiro afite.

Ati “Tuvuge ko Perezida Tshisekedi afite ishyushyu ryo kugurisha RDC, ese itegeko nshinga rirabimwemerera? Ese niba ayishyize ku isoko, u Rwanda ni twe dufite amafaranga menshi ngo tube twagura RDC? Niba u Rwanda runashaka kugura na Perezida Tshisekedi ashaka kugurisha, itegeko nshinga rigenga buri gihugu ntiribyemera.”

Yongeyeho ati “Amasezerano ya Loni n’aya Afurika Yunze Ubumwe ategeka ko ibihugu byubaha imipaka uko yagenwe n’abakoloni. Kuva ayo makuru yo kugura yatangira guhwihwiswa nta n’umwe wigeze yerekana umubare wa kilometero kare twaguze, igihe byabereye n’aho ibyangombwa by’ubugure biherereye. Kugeza ubu ibyo byangombwa ntabyo dufite, mbese ntitwigeze tugura.”

Usibye abavuga ko u Rwanda rwaguze RDC, hari n’abavuga ko rushaka kugira ibice byayo rwigarurira. Ibi na byo Karega yabihakanye avuga ko nta n’inyungu rubifitemo ugereranyije n’ibiruraje ishinga.

Yasobanuye ko hamwe n’amateka u Rwanda rwanyuzemo n’umutwaro rufite wo kunga abaturage barwo, rudashobora kongeraho undi muzigo w’amoko amagana yo muri RDC.

“Hashize imyaka 27 dushyira imbaraga mu burezi, ubuzima, ibikorwaremezo, nta nyungu twagira yo kongeraho ibindi bice bitari no ku rwego rumwe n’ibyacu mu bijyanye n’ibikorwaremezo. Nta nyungu irimo, ntibishoboka, nta mategeko ahari yatuma bishyirwa mu bikorwa.”

Yavuze ko ikigaragaza ko atari ikibazo kuri RDC , ari uko yaba Perezidansi, inteko cyangwa inama y’abaminisiti itaragira icyo ibivugaho ahubwo ari ibintu bikwirakwizwa ku mbuga nkoranyambaga cyane cyane muri diaspora, mu mijyi nka Bukavu na Goma aho byagaragaye ko ari bo benyegeza umuriro.

“Abadiaspora banyu bakwiza ibihuha bagakabya; n’abacu na bo ni uko. Dufite Abanyarwanda i Bruxelles iyo bavuga inkuru zo mu Rwanda ukeka ko buri bucye ibintu byapfuye. Baravuga ngo nta kigenda, nta burenganzira, inzara iraca ibintu, ariko ibipimo bya Banki y’isi, Loni, FMI, ndetse n’ubuhamya bw’Abanyarwanda ubwabo bavuga bati “Mu myaka 10 navuye aha none aho ngeze ni ho heza.”

Ambasaderi Karega yavuze ko abakwirakwiza ko u Rwanda ruyobojwe igitugu banyuranya n'ibyo ibipimo bigaragaza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .