Urubyiruko mu mihigo yo kuzitabira amatora ya Perezida wa Repubulika

Yanditswe na Cyprien Niyomwungeri
Kuya 5 Nyakanga 2017 saa 03:47
Yasuwe :
1 0

Harabura iminsi 28 gusa ngo Abanyarwanda baba mu gihugu no mu mahanga barenga miliyoni esheshatu berekeze ku biro by’itora bahitemo Perezida wa Repubulika y’u Rwanda uzabayobora mu myaka irindwi iri mbere, akabafasha gukomeza inzira y’iterambere.

Imibare ya Komisiyo y’Igihugu y’amatora igaragaza ko muri miliyoni 6,888,592 biyandikishije kuri lisiti y’itora, abagera kuri 3,128,983 ni ukuvuga 45% ari urubyiruko. Ibi bisobanura neza ko bafite uruhare runini n’inshingano zikomeye muri aya matora zo gushishoza no guhitamo icyerekezo bifuza kuzubakiraho.

Mu Ntara y’Amajyaruguru urubyiruko ruzatora rungana na 46%, mu Majyepfo ni 44%, Iburasirazuba ni 45%, Iburengerazuba ni 47%, Umujyi wa Kigali ni 44% naho muri diaspora (Abanyarwanda baba mu mahanga) ni 28%.

Bamwe mu rubyiruko bavuga ko ubusanzwe bajya banengwa kutitabira ibikorwa mboneragihugu nk’amatora, umuganda, kwitabira ibiganiro, n’ibindi, ariko muri aya matora, siko bimeze, kuko biteguye kugena ahazaza h’igihugu bifuza, bafata icyemezo mu matora yo ku wa 3 no ku wa 4 Kanama uyu mwaka.

Nyiraneza Euphrasie w’imyaka 22 wo mu Kagari ka Vunga, Umurenge wa Shyira mu Karere ka Nyabihu, avuga ko kuba urubyiruko rugize umubare munini w’abazatora, bivuze ko rugomba kuba intangarugero ku bandi baturage, rukitabira amatora kandi rugaharanira ko aba mu mahoro no mu bwisanzure.

Yagize ati “Uretse gutora no kwitabira ibikorwa byose bitegura amatora ku giti cyanjye, mfite n’uruhare rwo gushishikariza bagenzi banjye ibyo bikorwa byose no guharanira ko amatora aba mu mahoro.”

Nsengimana Evariste w’imyaka 24 wiga muri Kaminuza y’u Rwanda, avuga ko ari ku nshuro ya mbere agiye gutora Perezida wa Repubulika kandi yiteguye kugira uruhare mu kwihitiramo Umuyobozi ashaka.

Yagize ati “Nishimiye kuba ngiye gutora Perezida kandi niteguye kugira uruhare mu kwihitiramo umuyobozi. Mfite ikarita ndangamuntu, ikarita y’itora ndetse nanagenzuye neza ko ndi kuri lisiti y’itora.”

Umukandida urubyiruko rwifuza

Komisiyo y’Amatora iherutse gutangaza ko Perezida Paul Kagame na Dr Frank Habineza ari bo bakandida bemewe by’agateganyo, mu gihe Mwenedata Gilbert, Barafinda Sekikubo Fred, Rwigara Diane na Mpayimana Philippe bigenga, batabashije kwemererwa kuko batari bujuje ibyangombwa bisabwa, basabwa ko ku wa 6 Nyakanga bazaba babitanze.

Baramutse bemerewe, baba ari abakandida batandatu bazatangira kugeza ku Banyarwanda imigabo n’imigambi yabo ku wa 14 Nyakanga (itariki itangira yo kwiyamamaza), banabashishikariza kuzabashyigikira ku minsi y’amatora.

Umunyamakuru Tombola Felicie w’imyaka 27, atangaza ko aya matora ari umwanya mwiza wo guhitamo umuyobozi ushoboye, uzaharanira inyungu rusange atarobanuye ku butoni.

Yagize ati : “Ni umwanya wo kureba umuntu ufite u Rwanda ku mutima we, aho kuba inyungu ze bwite, uzashyira imbere gufasha urubyiruko kubona imirimo binyuze mu gutuma abantu bakora ibyo bize.”

Mfitumukiza Moise wo muri Kaminuza y’u Rwanda, Ishami y’Ubumenyi n’Ikoranabuhanga, yongeraho ko amatora ya Perezida wa Repubulika ari igikorwa gikomeye gisaba ubushishozi, akifuza ko umukandida ukwiye ari uwuzita ku burezi, by’umwihariko Kaminuza.

Yarira ati “Numva ukwiye ari ufite ubunararibonye, ushoboye kuba yageze kuri byinshi: Abanyarwanda, ari inyangamugayo, areba inyungu z’Abanyarwanda muri rusange kuko niwe nkingi ya mwamba. Akwiye kandi yita ku burezi kuko niryo rerero ry’Abanyarwanda.”

Gutangaza lisiti ntakuka y’abakandida bemejwe mu matora ya Perezida wa Repubulika bizakorwa ku wa 7 Nyakanga 2017. Guverinoma y’u Rwanda ikaba izashora abarirwa muri miliyari 5.5 z’amafaranga y’u Rwanda mu bikorwa by’aya matora.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza