Ukwiyamamaza kwagenze neza kandi abakandida bubahirije amategeko - NEC

Yanditswe na Anselme Sezibera
Kuya 3 Kanama 2017 saa 06:23
Yasuwe :
0 0

Nyuma y’ibyumweru bitatu abakandida batatu bahatanira umwanya w’umukuru w’igihugu biyamamaza mu Turere 30 tugize igihugu. Komisiyo y’igihugu y’amatora (NEC) iratangaza ko ukwiyamamaza kwagenze neza kandi, n’abakandida bubahirije amategeko.

Umunyamabanga Nshingwabikorwa wa Komisiyo y’igihugu y’amatora, Charles Munyaneza, avuga ko muri rusange ukwiyamamaza kwagenze neza.

Yagize ati “Kuri twebwe tubona byarangiye neza. Nanavuganye n’abakandida bose ndetse n’ababahagarariye bambwiye ko basoje neza ukwiyamamaza mu gihugu cyose.”

Munyaneza avuga ko mu ntangiriro zo kwiyamamaza habanje kubamo utubazo ariko twahise dukosoka.

Agira ati “Uretse mu cyumweru cyambere cyo kwiyamamaza bitangira, nibwo habayemo uguhuzagurika. Cyane cyane muri gahunda yo kwiyamamaza, naho kwiyamamariza ku bakandida bamwe n’abayobozi bamwe bo mu nzego z’ibanze.”

Avuga ko ubu kwiyamamaza byarangiye kandi ngo abakandida bubahirije ibisabwa. Bose bamanura ibintu byose byamamaza nkuko bitegenywa n’itegeko.
Charles Munyaneza avuga ko mu gitondo cyo kuri uyu wa kane, ibintu byose byamamaza byari ahantu hose hagaragara ngo byari byakuweho ahantu hose mu gihugu.

Agira ati “Saa kumi n’ebyiri nazengurutse umujyi wose ntabintu nabonye bikimanitse hirya no hino byamamaza abakandida. No mu turere twose nabajije abakozi bacu ntahantu bikimanitse.”

Munyaneza avuga ariko ko mu masaha ya mugitondo ngo hari amakuru yumvise ko hari imodoka zigifite ibyo birango ariko ngo atari nyinshi.

Abaturage bamwe bavuga ko igihe cyo kwamamaza cyari gihagije ngo nta mpamvu yo kwica amategeko umuntu akomeza kwamamaza kandi byarangiye.

Mukamurenzi Jeanne utuye mu Karere ka Nyarugenge yagize ati "Ubundi igihe cyo kwiyamamaza no kwamamaza NEC yatanze, cyari gihagije. Ntampamvu rero yatuma umuntu yica amategeko ngo akomeze kwamamaza kandi igihe cyatanzwe cyarangiye. Nanjye nubu nari mfite ibyapa ariko nabikuyeho. Ndumva ariko uyu munsi ntamodoka ndabona ikiriho ibirango.”

Mugabo Alfred wo mu Karere ka Kicukiro avuga ko mugitondo yigeze kubona imodoka imwe ifite ibirango by’umukandida.

Ati “ Njyewe aho niriwe nzenguruka ndumva nabonye imodoka imwe mu gitondo yari iriho ibirango by’umukandida. Ariko ahandi hantu hose uretse kuri iyo modoka, ntahandi nigeze nkibona.”

Charles Munyaneza avuga ko abo bari bagifite ibirango byamamaza atari icyaha bakoze kuko ngo baba batatumwe n’umukandida. Gusa ngo ibyiza ni uko babivanaho kuko kwamamaza byarangiye.

Kuri uyu wa Kane nibwo gutora ku batorera mu aahanga byatangiye mu gihe abatorera mu Rwanda bazatora kuri uyu wa 4 Kanama 2017.

Ibikorwa byo kwiyamamaza byose birangira mu masaha 24 mbere yuko amatora aba. Nkuko biteganywa n’amabwiriza ajyenga amatora y’umukuru w’igihugu yo mu 2017 mu mutwe wa 5 mu ngingo ya 47.

Umunyamabanga Nshingwabikorwa wa NEC, Charles Munyaneza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza