Nyanza: Ifatirwa ry’indangamuntu mu bishobora gutuma bamwe batazatora Perezida

Yanditswe na Anselme Sezibera
Kuya 25 Nyakanga 2017 saa 09:17
Yasuwe :
2 0

Hari abaturage bo mu Murenge wa Cyabakamyi mu Karere ka Nyanza bavuze ko bagiye bafatirwa indangamuntu zabo, bamwe kwa muganga, abandi mu nzego zibanze zinyuranye bakagira impungenge ko bishobora kubambura uburenganzira bwo gutora.

Igihangayikishije aba batururage ni akarengane bakorerwa n’inzego zitandukanye zirimo no kwa muganga igihe babuze ubwishyu bagafatirwa ibyangombwa kandi ubundi bazi ko bitemewe, bakibaza uko bizagenda mu gihe habura igihe kitagera ku kwezi ngo habe itora ry’Umukuru w’igihugu.

Nyirandorimana Beyata wo mu mudugudu wa Nyibinombe, Umurenge wa Cyabakamyi, yavuze ko yagiye kwandikisha umwana muri 2015, ushinzwe irangamimerere aramwandika ariko amusubiza igipande cy’ikingiza (ifishi umwana aherwaho inkingo), indangamuntu ye n’iy’umugabowe arazisigarana.

Yagize ati “Etat civil yansigaraniye indangamuntu yanjye n’iy’umugabo, avuga ngo nshobora kuba ntarashyingiwe. Namusobanuriye ko nashyingiwe, arambwira ngo nintegereze arazimpa. Yarasohotse yurira moto arigendera ngo i Nyanza baramuhamagaye. Bwarakeye nsubiyeyo, ambwira ko ziri kwa gitifu. Ngiye kwa gitifu ambwira ko ngomba kwishyura igihumbi. Tubajije ku munsi w’umuganda bavuga ko tugomba kuzihabwa. Nsubiye kwa Gitifu ati ‘Ayo mafaranga ugomba kuyatanga, ubu se ko twegereje amatora, ubu tuzatora nta ndangamuntu dufite?’”
Undi muturage witwa Habimana Jean avuga ko yaje aturutse muri Karere ka Nyaruguru, yaje gufungwa yafashwe mu mukwabo, bamwaka indangamuntu, bukeye irabura kugeza n’ubu.

Ati “Ndifuza ko babona indangamuntu yanjye kugira ngo mbone uko nzitorera umusaza”.

Naho Tuyishime Anita utuye mu Mudugudu wa Kabere mu Murenge wa Cyabakamyi, avuga ko indangamuntu ye yafatiriwe ku Kigo nderabuzima cya Mucubira aje kuboneza urubyaro. Yongeraho ko yari amaze imyaka 10 aruboneza nta mafranga yakwa; kuri iyo nshuro ngo bamwatse amafaranga 5000 arayabura, indangamuntu barayigumana.

Yagize ati “Bampaye indangamuntu yanjye yenda nkajya mbishyura buhorobohoro. Ubu se abandi bazatora koko nta ndangamuntu mfite, nshobore gutora?”

Undi muturage nawe avuga ko indangamuntu ye n’iy’umudamu we zafatiriwe kwa muganga i Mucubira kubera kwibagirwa amakarita ya mitiweli. Umudamu amaze kuvurwa bagiye kureba indangamuntu zabo barazibura.

Ati "Nasubiyeyo kureba indangamuntu zacu bambwira ko umuganga wari uzifite bamwirukanye batazi aho ziri. Nti nonese niba mwaramwirukanye yajyanye n’indangamuntu zacu ? Na Gitifu w’Umurenge yarazibabajije bamusubiza ko batazi aho uwo muganga yazishyize. Ubuse koko abandi bazatore, urugo rwose dusigare kubera kutagira indangamuntu ? Nibadushakire indangamuntu kuko uwo muganga atazijyanye. Turashaka kwitorera umukuru w’igihugu."

Cyambari Jean Pierre ushinzwe Irangamimerere na Notariya mu Murenge wa Cyabakamyi, ntahakana ko mu buyobozi bazi ibi bibazo by’abantu bakwa indangamuntu zigafatirwa, hakaba nizibura

Uyu muyobozi asobanura ko ubundi gufatira indangamuntu y’umuturage bitemewe ati “ Ubundi ntabwo byemewe kugwatira indangamuntu. Ibyo bintu ntabwo byemewe, ababikora baba banyuranye n’icyo itegeko rivuga. Icyo dukora turagenda tugasaba abazifashe kuzisubiza, n’umuturage tukamusaba kuzuza ibyo asabwa.”

Uyu muyobozi arasaba abaturage badafite indangamuntu kwihutira kuzuza ibisabwa birimo icyemezo cya Polisi cy’uko iyo ndangamuntu yatakaye, bityo bagahabwa icyangombwa kiyisimbura kandi gihesha by’agateganyo uburenganzira bwose indangamuntu yabaheshaga, harimo no gutora.

Umuhuzabikorwa wa Komisiyo y’Igihugu mu turere twa Muhanga na Kamonyi, Kabare Nkusi Revocat, ku murongo wa telefone yahamije ko umuturage ufite icyangombwa gisimbura irangamuntu yahawe n’umurenge, kimuhesha uburenganzira bwo gutora iyo asanzwe ari kuri lisiti y’itora.

Amatora y’umukuru w’igihugu mu Rwanda akaba azaba muri kanama ku itariki 3 ku Banyarwanda baba mu mahanga, no ku itariki 4 ku baba imbere mu gihugu.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza