Kigali: Zimwe muri serivisi zahungabanyijwe n’umunsi w’amatora ya Perezida wa Repubulika

Yanditswe na Cyprien Niyomwungeri
Kuya 4 Kanama 2017 saa 07:52
Yasuwe :
0 0

Hamwe mu hatangirwa serivisi zitandukanye mu mujyi wa Kigali, uretse ibitaro, amavuriro n’abacuruzi bakoze nkuko bisanzwe, ahandi nko mu mabanki, mu nzego n’ibigo bya leta byari bigoye kuhabona undi mukozi utari abashinzwe umutekano bambaye impuzankano zibaranga.
Ku bitaro bya Kaminuza bya Kigali (CHUK), imirimo yakomeje nk’uko bisanzwe, abarwayi bakiriwe baravurwa n’abari bafite gahunda [rendez-vous] zirubahirizwa.
Umuyobozi w’ibi bitaro, Theobald Hategekimana, yabwiye IGIHE ko umunsi (...)

Hamwe mu hatangirwa serivisi zitandukanye mu mujyi wa Kigali, uretse ibitaro, amavuriro n’abacuruzi bakoze nkuko bisanzwe, ahandi nko mu mabanki, mu nzego n’ibigo bya leta byari bigoye kuhabona undi mukozi utari abashinzwe umutekano bambaye impuzankano zibaranga.

Ku bitaro bya Kaminuza bya Kigali (CHUK), imirimo yakomeje nk’uko bisanzwe, abarwayi bakiriwe baravurwa n’abari bafite gahunda [rendez-vous] zirubahirizwa.

Umuyobozi w’ibi bitaro, Theobald Hategekimana, yabwiye IGIHE ko umunsi w’amatora utahungabanyije akazi.

Yagize ati “Abakozi bacu bazindukiye mu matora. Uko twebwe twabikoze kugira ngo abakozi bacu baze ku kazi, twabahaye amabaruwa bereka abari ku biro by’itora asaba ko baborohereza bakabafasha bagatora mbere, hanyuma bakaza mu kazi.”

Hategekimana yemera ko amatora ari igikorwa cy’ingirakamaro buri wese agomba kwitabira nk’Umunyarwanda ariko n’umurimo ugakomeza ku barangije gutora.

Gusa ntabwo ari ko byagenze ku nzego za Leta n’amabanki, kuko uretse Banki ya Kigali saa munani yafunguye amashami ane mu mujyi wose wa Kigali, izindi zafunze umunsi wose.

Mukamwezi Julienne wari ugiye kwishyurira abana be amafaranga y’ishuri kuri imwe muri banki zitakoze, yabwiye IGIHE ko byatumye abana be batiga amasomo y’ikiruhuko y’uyu munsi kuko bagombaga kwinjira mu ishuri bitwaje inyemezabwishyu.

Yagize ati “Nari nje hano kuri banki kwishyura amafaranga y’ishuri y’abana bazigira mu kiruhuko none ngo ntibakora, mpasanze abashinzwe umutekano. Nzagaruka ku wa Mbere.”

Hari inzego za Leta zitakoze

Kanamugire Simon wari ugiye kwaka serivisi mu Karere ka Nyarugenge, yabwiye IGIHE ko abashinzwe umutekano ari bo bamwakiriye bakamubwira ko ari konji.

Yagize ati “Nifuzaga serivisi mu bijyanye n’ubutaka hano mu karere ka Nyarugenge ariko bambwiye ko batakoze ngo nzaze ku wa Mbere.”

Umuyobozi wa Komisiyo y’amatora, Prof. Kalisa Mbanda yemeje ko nta konji ihari ku munsi w’amatora.

Ati “Abanyarwanda baba bakeneye gutora hakiri kare bakigira ku mirimo cyane cyane ko nta konje ihari.”

Minisiteri y’abakozi ba Leta n’umurimo (Mifotra), iherutse gusaba abakoresha n’abakozi gushimangira uruhare rwabo mu kwitabira aya matora no gukomeza kugira uruhare mu kubaka u Rwanda no gusigasira ibyagezweho. Gusa ntiyemeje niba ari konji nkuko isanzwe ibikora.

Akarere ka Nayrugenge ntikahaye serivisi abari bazikeneye
Dr Theobald Hategekimana yemeje ko umunsi w'amatora utahungabanyije akazi muri CHUK

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza