Kigali: Urubyiruko rwitwaga ba ″ntibindeba″ rwabaye abahwituzi mu matora

Yanditswe na Uwishyaka Jean Louis
Kuya 12 Kamena 2017 saa 12:07
Yasuwe :
0 0

Urubyiruko by’umwihariko urwo mu mijyi, cyane uwa Kigali, rukunda kuvugwaho umuco wo kutitabira gahunda zinyuranye za Leta ariko ubu rufite ubwitabire bugaragara mu kwiyandikisha no kwikosoza ku lisiti z’itora no kumenya gahunda yayo; rwiyemeza no guhwitura abakuru mu bikorwa bijyanye n’amatora y’Umukuru w’igihugu.

Bamwe mu rubyiruko bavuga ko bamenye akamaro ko kwitabira gahunda za Leta ku buryo ubu bari mu ba mbere bazitabira kandi bakanazitangamo umusanzu ufatika mu gihe cy’itora rya Perezida wa Republika.

Umuhoza Cynthia wo mu Kagari ka Agatare, Umurenge wa Nyarugenge, aba mu itsinda ry’urubyiruko rwo muri aka kagari, yagize ati “Urubyiruko rwinshi ruri kwitabira gahunda y’amatora mu Rwanda. Bamwe muri rwo bagenda bashishikariza abataritabira gahunda y’amatora, kwiyandikisha no kwikosoza kuri lisiti z’itora.″

Umuhoza asanga uru rubyiruko rwaritabiye cyane gahunda y’itora ugereranyije n’uko rusanzwe rwitabira ibikorwa bya Leta, nk’umuganda rusange, kwishyura amafaranga ya mutuweli, n’ibindi. Uyu mwali yishimiye uko urubyiruko rwaje ari rwinshi mu kwikosoza kuri lisiti z’itora yabereye mu midugudu mu minsi ishize ku buryo nta mbogamizi yo gutora rufite.

Ndikubwimana Aimable w’imyaka 25 utuye mu Kagari ka Gatenga, Umurenge wa Gatenga, Akarere ka Kicukiro, we yavuze ko yari afite ikibazo mu myirondoro ye, ariko nyuma akaza kujya kwikosoza bakabihindura.

Ati “Amazina yanjye yari yanditse nabi ariko nagiye kwikosoza muri kiriya cyumweru cyashize kandi byagenze neza nta kibazo.”

Uyu musore avuga ko yafashije na bagenzi be batandatu bari bafite icyo kibazo, abakangurira kujya kwikosoza ku mudugudu na bo birakemuka ku buryo nta nzitizi zo kuzitabira amatora ya Perezida bafite.

Babaye abahwituzi b’abakuru

Umunyamabanga Nshingwabikorwa w’Akagari k’Agatare, Muhawenimana Françoise, yatangaje ko urubyiruko rwo mu Kagari ayoboye rwishyize hamwe rukora itsinda rikora ibikorwa binyuranye ku buryo rwanatanze umusanzu mu guhwitura abandi mu kwikosoza kuri lisiti z’itora bituma bikorwa ku ijanisha rya 98%.

Ati “Urubyiruko rwacu ntabwo rutugora kuko rurateguye neza; bafite amatsinda bahuriramo ku buryo igihe bakenerewe cyose turababona ndetse n’abadufashije gukosora lisiti ni urubyiruko. Iki gikorwa nibo bakitabiriye bwa mbere ndetse banadufasha gukora ubukangurambaga bahwitura abandi baturage; muri rusange baradufashije cyane.”

NEC Ntiyemeranya n’abashinja urubyiruko kuba ba ntibindeba

Komisiyo y’Igihugu y’Amatora ishimangira ko urubyiruko ari inkingi ya mwamba mu bikorwa bitandukanye, bityo ko abantu bakwiye kujya bareka kuruharabika bavuga ko rutitabira gahunda za leta. NEC ivuga ko ari ″ugukabya″.

Umunyamabanga Nshingwabikorwa w’iyi komisiyo, Munyaneza Charles, yagize ati “Mu by’ukuri hari n’igihe dukabya tukavuga ngo urubyiruko ntirwitabira ariko rwitabira ibikorwa rwose ndetse iyo urebye kuri lisiti y’itora yacu 60% ni urubyiruko; bivuga rero ko rwitabiriye ibi bikorwa, bake wenda bataritabira ni bo dushaka gufatanya kugira ngo nabo babyitabire, gusa urebye ahanini baritabira.”

Munyaneza yavuze ko ugereranyije n’abatoye mu 2015 mu matora ya Referendum yagenaga ivugururwa ry’ingingo z’Itegeko Nshinga, usanga mu biyandikishije kuzitabira amatora ya perezida hariyongereyeho urubyiruko rugera ku bihumbi 250 rugiye gutora bwa mbere, ibishimangira ubwitabire bwarwo.

NEC kandi itangaza ko ibikorwa byo kwikosoza kuri lisiti z’itora byitabiriwe cyane kuko nibura byakozwe ku kigero cya 97% mu gihugu hose. Yavuze kandi ko abacikanywe babishoboye bagera ku cyicaro cy’iyo komisiyo kugira ngo ikomeze ibafashe cyangwa se bakabikorera kuri telefoni mbere y’uko hatangazwa lisiti y’itora ntakuka tariki 7 Nyakanga.

Biteganyijwe ko amatora azitabirwa n’abantu bakabakaba miliyoni zirindwi barimo abarenga miliyoni 1.5 bagiye gutora ku nshuro ya mbere.

Ndikubwimana Aimable ashimangira ko urubyiruko rwitabiriye ibikorwa byo kwikosoza kuri lisiti y'itora nk'uko byari byasabwe n'ubuyobozi bwabo
Umunyamabanga Nshingwabikorwa w’Akagari ka Agatare, Muhawenimana Françoise, avuga ko urubyiruko rwe rwitabiriye ibikorwa bijyanye n'amatora ndetse runabikangurira abandi
Umunyamabanga Nshingwabikorwa wa NEC, Munyaneza Charles, avuga ko gushinja urubyiruko kutitabira gahunda za leta ari 'ugukabya'

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza