Ingabire yiteze ibintu bikomeye kuri manda nshya ya Perezida Kagame

Yanditswe na Cyprien Niyomwungeri
Kuya 18 Kanama 2017 saa 08:43
Yasuwe :
0 0

Umuyobozi wa Transparency International Rwanda, Ingabire Marie Immaculée, asanga manda nshya y’imyaka irindwi Perezida Kagame arahirira kuri uyu wa Gatanu, ari igihe cyo gusigasira gahunda nyinshi zatangiye, no gukosora ibitaranoga mu nzego zimwe na zimwe nk’uburezi, ubuzima n’ubutabera.

Kuri uyu wa 18 Kanama nibwo Paul Kagame arahirira kuyobora u Rwanda muri manda izageza mu 2024 nyuma yo kwegukana intsinzi mu matora yo ku wa 3 no ku wa 4 Kanama 2017 agize amajwi 98.79%, agahigika Mpayimana Philippe wagize 0.73% na Dr.Habineza Frank wagize 0.48%.

Mu bikorwa bye byo kwiyamamaza, Perezida Kagame yakunze kubwira ibihumbi by’ababaga bakereye kumutega amatwi ko kumutora ari ugusigasira ibimaze kugerwaho, gukomeza iterambere kuri bose kuko ibimaze kugerwaho ari ikimenyetso cy’ibishoboka.

Mu kiganiro yagiranye na IGIHE, Ingabire uzwi mu guhirimbanira kurwanya ruswa n’akarengane, yavuze ko asanga manda nshya ya Kagame ari ugusigasira gahunda nyinshi zatangiye mu gihugu no kuzongera, ariko hakajyaho n’ingamba zo kunoza ibitaranoga.

Yagize ati “Hakwiye kujyaho ingamba zituma gahunda zo guhindura ubuzima bw’abaturage [Girinka, Ubudehe, VUP] zibuhindura koko ntitubone umuntu uhora afashwa atava mu rwego rumwe ngo ajye mu rundi.”

Akomeza avuga ko hari ibyuho bikwiye gufungwa kugira ngo iterambere rikomeze kwihuta. Atunga urutoki mu burezi aho atanga urugero rw’aho bafunga Kaminuza zaratangiye gukora ababyeyi baratse inguzanyo zo kurihira abana babo.

Ati “Kuki ibi bidasuzumwa mbere yo gutangira mu rwego rwo kwirinda icyo gihombo cy’ababyeyi no gukererwa kw’abana.”

Ingabire akomoza mu rwego rw’ubutabera aho kurangiza imanza hakirimo ikibazo gikomeye. Yemeza ko bidakosotse byaba imbogamizi y’iterambere kuko ntawatera imbere yakorewe akarengane.

Hari icyo asabira abayobozi batarangiza inshingano

Ingabire avuga ko abayobozi batarangiza inshingano bakwiye kujya bakosorwa cyangwa bakava mu nzira ntibakomeze gukerereza Abanyarwanda.

Yagize ati: “Nkuko Perezida Kagame akunda kubivuga, abo bakorana azabaminjiremo agafu cyangwa abakubite agashyi utarangiza inshingano ze ave mu nzira areke kudukerereza.”

Uko abaturage babona iyi manda ya 2017-2024

Abanyarwanda bategereje uyu munsi ukomeye w’intangiriro y’amateka mashya. Bamwe mu baganiriye na IGIHE, bemeza ko manda nshya ya Perezida Kagame ari ikivi gishya cyo kugera kuri byinshi bizubakira ku bimaze kugerwaho.

Nshimiyimana Alexandre umucuruzi w’imyaka 28 utuye mu murenge wa Gatenga mu Karere ka Kicukiro,avuga ko kuri we kurahira kwa Perezida Kagame ari intangiriro y’ibyo yijeje Abanyarwanda ubwo yabasabaga ko bamutora.

Yagize ati “Hari byinshi byakozwe ariko yavuze ko bikwiye kwiyongera. Amashuri, amavuriro, imihanda, amazi, amashanyarazi n’ibindi, niteguye ko ari ugutangira kubishyira mu bikorwa.”

Akomeza avuga ko yifuza ko muri iyi manda serivisi z’ubuzima zihabwa abakoresha ubwisungane mu kwivuza zanozwa kandi ibice bitaragezwamo amazi ahoraho muri Kigali bikayahabwa.

Uwamwezi Christella w’imyaka 34 asanga umunsi w’irahira rya Perezida Kagame ari ugukomeza gushimangira umwihariko w’abanyarwanda mu miyoborere, kurwanya ruswa, kwita ku batishoboye no gukomeza iterambere ku buryo u Rwanda rugera ku ntego z’icyerekezo rwihaye.

Yagize ati “Muri iyi manda niteguye ko ari ugukomeza gukora tukagera ku cyerekezo 2020 tugakomeza no muri 2050. Nkuko yabidusabye ubwo yiyamamazaga tuzafatanya twese dutere imbere ntawe usigaye.”

Komisiyo y’amatora (NEC) yemeza ko amatora ya Perezida wa Repubulika y’u Rwanda yagenze neza igashimira Abanyarwanda ubwitange bagaragaje ngo agende neza.

Mu itangazo ryashyizweho umukono n’Umuyobozi wayo, Prof. Kalisa Mbanda yavuze ko Komisiyo y’amatora ishimira byimazeyo Abanyarwanda ku ruhare bagize mu matora ya Perezida wa Repubulika w’u Rwanda, n’uburyo bayitwayemo muri rusange agakorwa mu mucyo n’umutekano bisesuye.

Umuyobozi wa Transparency International Rwanda, Ingabire Marie Immaculée

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza