#Amatora2017: Ku munsi wa mbere wo kwiyamamaza FPR yagaragaje imbaraga zidasanzwe

Yanditswe na Safari Byuma Alphonse
Kuya 14 Nyakanga 2017 saa 07:35
Yasuwe :
0 0

Kuri uyu wa Gatanu tariki ya 14 Nyakanga, nibwo abakandida batatu bahatanira umwanya w’umukuru w’igihugu batangiye ibikorwa byo kwiyamamaza, aho FPR yagaragaje ingufu zidasanzwe ugereranyije n’uko bimeze ku bandi bakandida bahanganye n’umukandida wayo.

Paul Kagame uhagarariye umuryango FPR inkotanyi, Dr Frank Habineza uhagarariye ishyaka Green Party na Philippe Mpayimana uhatana nk’umukandida wigenga, batangiye ibikorwa byo kwiyamamaza mu baturage.

Ibikorwa byo kwiyamamaza Paul Kagame, yabitangiriye mu Ntara y’Amajyepfo mu karere Ruhango na Nyanza; Dr Frank Habineza abitangirira mu ntara y’Uburengerazuba mu turere twa Rusizi na Nyamasheke naho Philippe Mpayimana yatangiriye mu Karere ka Bugesera.

Abantu bari uruvunganzoka aho umukandida wa FPR Inkotanyi, Paul Kagame yiyamamarije ibyishimo ku maso n’umudiho bikaba bimwe mu byabarangaga ibi byose biherekejwe n’imyiteguro ihambaye kuva mu Mujyi wa Kigali.

Umujyi wa Kigali utatse ibirango by’umuryango FPR Inkotanyi n’amafoto y’umukandida wayo Paul Kagame ariko ntaho wasanga ikigarango cyamamaza undi mukandida bahanganye, ibyasobanuwe n’abanyamuryango bagira bati ‘ni uko dufite ingufu.’

Ubu ku mihanda no mu byapa bimurika (Feux Rouge) hamaze kuzamurwa amabendera n’ibirango bya FPR n’ibitambaro binini byashyizwe ahamanikwa ibyapa binini bigaragaza umukandida wa FPR n’imigabo n’imigabo n’imigambi ye.

Umuyobozi Mukuru w’Umuryango wa FPR mu karere ka Nyarugenge, Kayisiime Nzaramba akaba n’umuyobozi w’aka Karere, avuga ko kurimbisha umujyi ari mu rwego rwo kwitegura ibirori byo gushyigikira umukandida wabo.

Avuga ko kugeza ubu, FPR muri aka Karere yamaze kwitegura mu buryo bwose kuko ngo gushyikira umukandida wabo ari ibirori nk’ibindi byose.

Gusa biragoye kubona ikindi kirango cyamamaza undi mukandida mu mujyi nubwo batabujijwe na bo kubihashyira ndetse bakaba batanabonye abantu benshi babagaragarije ko babashyigikiye mu kwiyamamaza kwabo.

Umunyamuryango wa FPR Inkotanyi, Iyamuremye Cyprien yavuze ko ibi bigagaza ko FPR ishoboye ikaba ari na ko igaragaza itandukaniro mu miyoborere.

Umujyi wa Kigali uzengurutswe n'ibirango bya FPR Inkotanyi bimwe birimo n'amafoto y'Umukandida wayo, Paul Kagame

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza