Abari mu bitaro ntibazabasha kwitorera Perezida wa Repubulika cyangwa gutuma

Yanditswe na Cyprien Niyomwungeri
Kuya 10 Nyakanga 2017 saa 09:45
Yasuwe :
0 0

Komisiyo y’igihugu y’amatora (NEC) yashwishurije abifuzaga ko yashyiraho uburyo bwo gutora bwafasha abanyarwanda bazaba barwariye mu bitaro, cyangwa bafite izindi mpamvu zitabemerera kugera ku biro by’itora ku munsi w’amatora ateganyijwe ku wa 3 no ku wa 4 Kanama 2017.

NEC iteganya ko Abanyarwanda bagera kuri 6,888,592 bazitabira amatora ya Perezida wa Repubulika yo muri uyu mwaka. Gusa hari abavuga ko mu matora yabanje yo mu 2003, 2010 ndetse na referendum yo 2015 hari abatarabashije kuyitabira kuko itariki yageze bari mu bitaro, bafite intege nke n’izindi mpamvu zitabemerera kugera ku biro by’itora.

Izi mpungenge zituma hari abasaba ko NEC yagena uburyo bwo gutora bwihariye kuri abo bantu, yaba kubemerera ko batanga uburenganzira ku bandi (Procuration) bakabatorera cyangwa bakegerezwa ibiro by’itora aho barwariye.

Kantengwa Esperance wo mu Kagari k’Akabuga, Umurenge wa Kiramuruzi, avuga ko muri manda ishize atigeze agira amahirwe yo gutora Perezida wa Repubulika kubera uburwayi, kuko yari arwariye mu bitaro bya Kiziguro biherereye mu Karere ka Gatsibo.

Yagize ati “Ubuheruka nari ndwaye ntabwo natoye. Bemeye kuzana aho gutorera nko ku bitaro cyangwa bakemera ko umuntu yandika urwandiko agaha undi uburenganzira bwo kumutorera, na ba bandi umunsi w’amatora uzagera barwaye babona amahirwe yo kwitorera Perezida.”

Museveni Eliezer ukora akazi ko gutwara moto mu Mujyi wa Kigali, yakoze impanuka ikomeye buri buke Abanyarwanda bakajya mu matora ya referendum ajyanwa mu bitaro bya CHUK, yitabwagaho n’abaganga. Ababazwa n’uburyo yasabye Inteko Ishinga Amategeko kuvugurura ingingo ya 101 ariko mu matora ijwi rye ntabashe kuritanga.

Yagize ati “Ndi mu bajyanye impapuro ku Nteko Ishinga Amategeko ariko ntabwo natoye. Bemeye umuntu akandika, agatanga n’ibyangombwa bakamutorera byaba byiza.”

NEC yabiteye utwatsi

Komisiyo y’Igihugu y’Amatora (NEC) itangaza ko abazaba bari mu bitaro nta mbaraga bafite zo kujya gutora n’abandi bose batazabasha kugera ku biro by’itora ntacyo bateganyirijwe, yaba kwegerezwa aho gutorera cyangwa gutanga uburenganzira abandi bakabatorera.

Bukasa Moise, ushinzwe guhuza NEC n’izindi nzego, yabwiye IGIHE ko abazabasha gutora bazatora, ariko abazaba bari mu bitaro barimo serumu (barembye) bitazashoboka.

Yagize ati “Nta ruhushya rwo gutorerwa ku muntu urwaye. Amatora yo mu Rwanda nta gutanga uburenganzira bwo gutorerwa bibaho, keretse abafite ubumuga runaka. Abari mu bitaro nk’uwaraye arwaye, awakoze impanuka, ntabwo tuzashyira ibiro by’itora ku bitaro”.

Yongeraho ko bitazatuma ubwitabire bugabanuka kuko ubusanzwe burenga 90%, by’umwihariko ku matora ya Perezida wa Repubulika bikaba biba akarusho.

Amabwiriza ku matora ya Perezida wa Repubulika ya 2017, mu ngingo ya 84, asobanura ko uwemerewe kwifashisha umutorera ari umuntu ufite ubumuga bwo kutabona utazi gukoresha inyandiko ya Braille , cyangwa ubumuga bw’amaboko butuma adashobora kwitorera cyangwa kwishyirira urupapuro rw’itora mu gasanduku.

Uyu yemererwa kuzana umwana ufite nibura imyaka 14 ariko utarageza ku myaka 18 y’amavuko, kugira ngo amufashe gutora. Ufashwa gutora kubera ubumuga, agomba kuba nawe ahibereye.

Hari ababyumva ukundi

Nshimiyimana Jean wo mu murenge wa Gitega, Akarere ka Nyarugenge, asanga iki cyemezo cya NEC hari abo kizabuza amahirwe kandi uburwayi ntawe ubuteguza.

Yagize ati “Umuntu nakira bakavuga amatora azajya yibuka ko atitoreye umuyobozi. Bazatekereze uko buri Munyarwanda wese yatora niyo yaba arwaye.”

Mukankuranga Venantie wo mu murenge wa Nyarugenge we yemeza ko iki cyemezo ntacyo gitwaye kuko hari ababa barwaye batabasha no gutekereza neza, kubasaba gutora bikaba nko kubashinyagurira.

Ati “Ubuse umuntu yaba ababara ukamusaba gutora, ndumva nta kibazo rwose, ntabwo ari benshi ku buryo abatora baba badahagije.”

Hari aho byemewe

Mu bihugu nka Leta Zunze Ubumwe za Amerika, u Budage, u Buholandi, Israel n’ahandi biremewe ko uwabisaba yahabwa uburenganzira bwo gutorera aho ari, akohereza ijwi rye rikabarurwa.

Urugero ruzwi cyane ni Nyirakuru wa Barack Obama, Madelyn Dunham, mu 2008 yasabye gutora mbere y’uko umunsi w’amatora nyirizina ugera, arabyemererwa atorera mu rugo rwe, habura umunsi umwe ngo amatora abe yitaba Imana ahaye umwuzukuru we amahirwe yo kuyobora igihugu cy’igihangange.

Mu matora yo mu Rwanda buri muntu aritorera kereka ufite ubumuga runaka, nta gutuma

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza