Ab’i Rwamagana bahanze amaso Guverinoma ku kibazo cy’amazi no kuvugururirwa ibyiciro by’ubudehe

Yanditswe na Anselme Sezibera
Kuya 27 Nzeri 2017 saa 11:49
Yasuwe :
0 0

Abaturage bo mu mirenge ya Munyiginya, Mwurire, Gishari n’indi igize Akarere ka Rwamagana, basaba Leta kubacyemurira ikibazo cy’amazi meza ataboneka mu bice byose no guhindurirwa bagashyirwa mu byiciro by’ubudehe bibakwiye bijyanye n’ubushobozi bwabo.

Nyuma y’uko tariki ya 4 Kanama 2017 Perezida Paul Kagame atorewe kuyobora u Rwanda muri manda y’imyaka irindwi, ahigitse abo bari bahanganye n’amajwi 98,79%, bidatinze akanashyiraho guverinoma iyobowe na Minisitiri w’Intebe Edouard Ngirente, Abanyarwanda biteze ko mu by’ibanze izitaho harimo imibereho myiza y’abaturage, kwimakaza ubukungu, n’iterambere ridaheza mu nzego zose z’ubuzima.

Abaturage bo mu murenge wa Munyiginya na Mwurire bo bagaragaje ibyifuzo byo kwegerezwa amazi asa n’ayabaye ingume muri aka gace ndetse no gushyirwa mu byiciro by’ubudehe bijyanye n’ubushobozi bwabo.

Haragirimana Patrick, wiga mu ishuri ryisumbuye rya Mwurire, ucuruza amazi akura mu bilometero bitatu mu gihe y’ikiruhuko (week-end), yakomoje ku buryo avoma amajerikani ari hagati ya 15 na 30 akoresheje igare.

Yavuze ko ijerekani imwe ayigurisha amafaranga 200 ndetse ko abadashoboye kugura amazi bagana ibishanga bya Rwasama mu Kagari ka Kagarama, Nyakigezi mu Kagari ka Gatika, n’ahandi hose hari ay’ibidendezi.

Sebakunzi Jean Pierre uvomera abaturage na restaurant we avuga ko mu Murenge wa Musha, Akagari ka Gatika aho atuye, amazi meza abonwa n’umugabo.

Yagize ati "Abaturage bategereza ko imvura igwa kugira ngo bareke amazi y’imvura. Mu gihe cy’impeshyi bayashaka mu murenge wa Kimbazi ku birometero bitanu."

Yakomeje avuga ko biteze kubona amazi meza mu midugudu muri iyi manda ya Perezida Paul Kagame. Ati "Perezida Kagame nadufashe kubona amazi meza, kuko aho ari agarukira mu Mujyi wa Rwamagana no mu dusantere dukomeye."

Iki cyizere agihuje n’umuturanyi we Twagiramungu Innocent wagize ati "Twiteze kubona amazi hafi y’ingo zacu. Twabonye amashanyarazi, amazi nayo azaboneka kuko Guverinoma iriho ifite imbaraga n’ubushake. Uwo twatoye arabizi, azadukemurira icyo kibazo."

Abaturage bifuza gushyirwa mu byiciro by’ubudehe bibakwiye

Abatuye mu Murenge wa Mwurire bagaragaza ko ikibazo kiri mu bibagoye harimo kudashyirwa mu byiciro by’ubudehe bihuye n’ubushobozi bwabo.

Bavuga ko harimo kudakoresha ukuri aho usanga abacuruzi, abafite butiki n’ababona umushahara wa buri kwezi bari mu cyiciro cya gatatu kimwe n’abadafite akazi ndetse basaba guhindurirwa impapuro zigahera ku murenge.

N’abo mu Murenge wa Munyiginya bagaragaza impungenge batewe n’ibyiciro by’ubudehe bashyizwemo.

Cyarukamba Cassien yagize ati "Ndi umukene, ndya rimwe ku munsi, nta bwiherero ngira, kuko ibihumbi 24 mpembwa ntibyantunga njye n’abana. Ariko nashyizwe mu cyiciro cya gatatu."

Mutuyimana Edwige yagize ati "Mu mihigo y’inzego z’ibanze usanga yibanda guhashya ubukene mu baturage, bigatuma bashyira abaturage mu byiciro by’ubudehe bitari ibyabo kugira ngo bagaragare neza nyamara abaturage baharenganira."

Akomeza avuga ko kuba mu cyiciro nyacyo bigira inyungu kuko iyo uri mu cya mbere n’icya kabiri, ubona inkunga nyinshi ziturutse hirya no hino, nko kuba wahabwa inka, koroherezwa kubona akazi mu mirimo rusange ya Leta, ndetse no kuba abana bafashwa kwiga ku buntu.

Ikibazo cyo kutishimira ibyiciro by’ubudehe byakunze kugarukwaho haba mu bice by’icyaro no mu mijyi.

Leta ikaba iteganya ko abari mu cyiciro cya mbere cy’ubudehe barihirwa ubwisungane mu kwivuza, kubona inguzanyo yo gukora ubucuruzi buciriritse n’ibindi.

Abaturage batuye mu mirenge ya Munyiginya, Mwurire, Gishari mu Karere ka Rwamagana bafite ikibazo cyo kubona amazi meza
Abafite ibigango nibo babafasha kuyabona bayakuye ku masoko ya kure

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza