Umuhanzi Kizito Mihigo, azwi cyane mu ndirimbo za Kiriziya Gaturika mu Rwanda. Yahimbye indirimbo zirenga magana atatu (300) zihimbaza Imana, kandi ziririmbwa mu missa hirya no hino mu Rwanda.
Tariki ya 25 Nyakanga 1981, Kizito yavukiye i Kibeho muri Nyaruguru, umwe mu mirenge izwiho ubukiristu bwihariye mu Rwanda. Mu mwaka w'1994, yahuye na Jenoside yahitanye umubyeyi we, na benshi mu muryango we.
Mu mwaka w'1996, Kizito yagiye kwiga mu Iseminari Ntoya ya Butare Karubanda, aho yatangiye kugaragariza impano idasanzwe ya Muzika Ntagatifu.
Mu mwaka wa 2003, yagiye kwiga mu mashuri kabuhariwe ya Muzika mu Bufaransa. Mu mwaka wa 2008, yabonye impamyabumenyi mu ishuri rya Muzika: Conservatoire de Musique de Paris. Kuva mu kwezi kwa mbere kw'umwaka wa 2009, uyu muhanzi yigisha muzika mu mashuri yisumbuye mu gihugu cy'Ububiligi.
Mihigo Kizito
Kuva mu mwaka wa 2003, amaze kugera i Burayi, umuhanzi Kizito Mihigo yihaye ubutumwa bw'iyogezabutumwa mu banyarwanda bo ku mugabane w'Uburayi, ubutumwa bwo kubabarirana, bw'Ubwiyunge, n'Ubumwe. Ibyo bikorwa ni nabyo yashatse gusangiza abanyarwanda muri iyi minsi, ubwo yagiraga igitaramo kidasanzwe muri Centre Christus i Remera, ku itariki ya 5 z'uku kwezi, guhera i saa kumi n'ebyiri z'umugoroba. Icyo gitaramo yari yacyise UT UNUM SINT, bisobanura ngo: "Bose babe umwe"
Cyari kigizwe n'indirimbo yahimbye n'izindi z'abahanzi ba Kiriziya banyuranye, zivuga amahoro n'urukundo, Kubabarira, kwiyunga n'Ubumwe. Hagati y'indirimbo kandi, uyu muhanzi yatanze ubuhamya bw'Umukiristu ubabarira, n'Ukwemera kugaragarira mu rukundo rwa mugenzi wacu.
Abari muri icyo gitaramo cyamaze amasaha atanu, batangaje ko banyuzwe, ariko basaba gukorerwa ikindi gitaramo nk'icyo.
Niyo mpamvu umuhanzi Kizito yateguye ikindi gitaramo tariki ya 27 Ukuboza, kugira ngo yongere atange ubwo butumwa bw'amahoro, kandi abacitswe n'igitaramo cyo ku itariki ya 5, na bo babashe kwiyumvira ibyo byiza by'Imana.
Uyu muhanzi kandi, avuga ko afitiye u Rwanda imishinga myinshi mu Rwego rwa Muzika, rw'imbyino, ndetse n'amakinamico.
Abifuza kumenya amakuru arambuye kuri uyu muhanzi, bashobora gusura urubuga rwe rwa internet rukurikira: www.organistecompositeur.com
MIGISHA Magnifique & Patrick KANYAMIBWA
