00:00:00 IGIHE NETWORK KN KINYARWANDA EN ENGLISH FR FRANCAIS

Yves Rwibutso wasubukuye umuziki nyuma y’imyaka 5, yavuze ibigeragezo byigeze kumutera kwiheba

Yanditswe na Uwiduhaye Theos
Kuya 4 Ukwakira 2021 saa 09:19
Yasuwe :
0 0

Rwibutso Yves, umuririmbyi w’indirimbo zihimbaza Imana umaze igihe kinini muri Canada yasohoye amashusho y’indirimbo nshya yise ‘‘Urukundo rwawe’’ igaruka ku rukundo rw’Imana, anatangaza ko yagarutse mu muziki nyuma y’imyaka itanu yari ishize acecetse.

Rwibutso mbere y’uko ava mu Rwanda, yabaye umunyamakuru, umukinnyi w’ikinamico, umuvugabutumwa, umusizi, umushyushyarugamba (MC), umuririmbyi n’umwanditsi w’ibitabo.

Uyu muhanzi ari no mu bagize uruhare mu guteza imbere ibiganiro n’umuziki bifatiye ku iyobokamana kuri radio zo mu Rwanda binyuze mu mwuga w’itangazamakuru yakoraga.

Mu kiganiro na IGIHE yavuze ko yabanje gusubira kwiga bigatuma aba aretse umuziki ho gato kugira ngo yite ku masomo ye. Uyu muhanzi kuva mu 2016 yigaga ibijyanye na Social Work (amasomo ajyanye no kwita ku mibereho myiza y’abaturage) muri University Of Calgary, iherereye mu Ntara ya Alberta mu Burengerazuba bwa Canada.

Yagize ati “Kimwe muri byo ni uko wasangaga ngomba gukora akazi kandi nkaniga kuva ku wa mbere kugera ku cyumweru. Nabonaga rero kubibangikanya na muzika mu gihe nanashakaga amanota meza ashobora kumfasha kwemererwa gukomereza amaso mu kindi cyiciro byari bigoranye cyane. Iyindi mbogamizi nagize ni uko nta ba Producers bashobora gukora ibintu mu buryo nabyifuzaga bari batuye aho mba.”

Uyu muhanzi wasohoye indirimbo yise ‘‘Urukundo rwawe’’ yavuze ko kuyihimba byaturutse ku gusenga kuko yayihimbye mu 2010, ubwo yari ari mu masengesho nyuma y’ibihe bitoroshye yari arimo.

Ati “Icyo gihe nari mu bihe bitanyoroheye kandi byiyongeraga ku bindi bisa n’aho bitahavaga. Nari imfite byinshi nifuza kugeraho, hari imishinga itandukanye nageragezaga. Hanyuma, igihe cyose nibwiraga ko ibintu byajyaga kugenda neza, ahubwo nkisanga mu makuba ndetse n’imishinga yanjye yose irushaho gusubira inyuma.”

Yavuze ko hari ubworozi yari afite bukagenda bupfapfana ndetse atangira kubona ko ibintu biri kumukomerana.

Ati “Hari ubworozi nari mfite buza kugira igihombo kandi nashyizemo imbaraga zishoboka. Inkuba yakubise inka zimwe, izindi zifatwa n’uburwayi. Abamfashaga kurebera iyo mishinga nari nizeye nabo barampemukira ibi by’umusubirizo. Amatungo magufi nayo yaje kugenda akendera amwe yibwe ayandi kubw’uburwayi budasobanutse. Icyo gihe kandi naje guhura n’imvune y’akaguru ubwo nanyereraga nkwagwa ku madarage yo kukibuga k’indege mu gihugu kimwe cyo ku Mugabane w’i Burayi nari natemebereyemo.”

Yavuze ko icyo gihe Yvess Rwibitso wakuze ari imfubyi arwana n’ubuzima yagize igikomere gikomeye yemeza ko hari igihe byasaga naho bimutera gushidikanya niba ubuzima bwiza yifuzaga ndetse n’iterambere bwite yifuzaga azabigeraho.

Ni nabwo yafashe umwanya w’amasengesho yo kwiyiriza iminsi 21 ku munsi wa 10 Imana imuha ijambo ryanditse muri 1 Yohana 4: 9, Esiteri 4:14 na Zaburi 143:8 aba ari naho akura inganzo yo guhimba iyi ndirimbo yashyize hanze yise ‘‘Urukundo rwawe’’.

Uyu muhanzi nyuma yo kugaruka mu muziki agiye gushyira hanze album ye ya kabiri ndetse n’indirimbo zizaba ziyiriho zose zamaze gukorwa abifashijwemo Producer Prince Ombeni Kamoso. Arimo no kwandika igitabo cye cya kabiri yifuza kuzamurikira Abanyarwanda nyuma y’icyo yashyize hanze mu 2010 cyitwaga “Narose Nkabya Inzozi”.

Yves Rwibutso yamenyekanye mu biganiro by’iyobokamana kuri Radio zitandukanye mu Rwanda zirimo Authentic na Radio10. Yanamamaye mu ndirimbo nyinshi zirimo iyo yise ‘‘Shikama mu Kwizera’’ yanitiriye album ye ya mbere.

Yves Rwibutso yagarutse mu muziki nyuma y'imyaka itanu yari amaze yarawusubitse
Rwibutso ari gutegura kumurika album ye ya kabiri
Yvess Rwibutso ni umwe mu bateje imbere igice cy'imyidagaduro cyane ishingiye ku iyobokamana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .