Pst Nsabayesu Aimable n’umuryango we basubiyemo indirimbo “Umbe hafi” ifite amateka yihariye

Yanditswe na Ishimwe Israel
Kuya 29 Mutarama 2021 saa 06:26
Yasuwe :
0 0

Pasiteri Nsabayesu Aimable yahuje imbaraga n’umuryango we na bamwe mu bo yigishije muzika basubiramo mu buryo bushya indirimbo “Umbe hafi” yaririmbwe bwa mbere na Korali Bethania yo muri ADEPR Gihundwe mu Karere ka Rusizi.

Indirimbo “Umbe hafi” yahimbwe na Pasiteri Nsabayesu mu gihe yari akiri Umutoza wa Korali Bethania. Yakunze kumvikana cyane kuri radiyo zitandukanye, inaririmbwa mu biterane by’ivugabutumwa mu Rwanda kuva mu myaka isaga 20 ishize. Abayumvise bahamya ko yubatse ubugingo bwabo, inabasubizamo imbaraga.

Pasiteri Nsabayesu mu bundi buzima busanzwe ni Impuguke mu byerekeye Muzika akaba ari n’umwe mu bategura bakanatanga amasomo mu mashuri ya Muzika harimo irya Nyundo rikorera i Muhanga.

Mu kiganiro cyihariye na IGIHE, yavuze ko igitekerezo cyo gusubiramo iyi ndirimbo yakigize agamije kuyongeramo ayandi majwi n’incurango ijyanye n’isengesho no gushyira imirongo imwe n’imwe mu zindi ndimi zirimo Icyongereza, Igifaransa, Igiswahili n’Igishinwa.

Yavuze ko yahisemo gukora iyi ndirimbo muri iyi minsi kugira ngo asabire kandi ahumurize abantu muri ibi bihe Isi yose yugarijwe n’icyorezo cya COVID-19.

Yagize ati “Ibyansunikiye cyane kongera kuririmba iyi ndirimbo ni ukwakira inkuru mbi kenshi kandi nyinshi z’abantu nzi neza ba bugufi, inshuti za hafi, abo twabanye mu buzima busanzwe no mu murimo w’Imana, abakomeye n’aboroheje, abari mu Rwanda no mu bindi bihugu bitandukanye bari mu bibazo bikomeye kubera iki cyorezo n’ingaruka zacyo.’’

Yavuze kandi ko muri ibyo bibazo harimo kurwaza abantu bikagorana kubasura, gupfusha abantu mwabanye, mwasangiye akabisi n’agahiye ntubone uko ubaherekeza, ihungabana ry’ubukungu n’umubare w’impfubyi, abapfakazi, abafite ubumuga, abasheshe akanguhe n’abandi batishoboye bakeneye gufashwa muri iki gihe.

Indirimbo “Umbe hafi” yubakiye ku isengesho ry’umuntu usaba Imana kumuba hafi kuko amakuba amuri bugufi kandi akaba atabasha kuyikiza.

Yubakiye ku nkuru ya Dawidi wasenze muri Zaburi 71:12 avuga ati “Mana ntumbe kure, Mana yanjye tebuka untabare”. Muri Zaburi 22:11 ho hagira hati “Ntumbe kure kuko amakuba ari bugufi kandi ari nta mutabazi.”

Pasiteri Nsabayesu yavuze ko nk’uko Muzika Nyobokamana ivoma mu isoko y’Ijambo ry’Imana, muri ryo harimo ingero nyinshi z’abanyuze mu bikomeye ariko bakaza gutabarwa n’Imana kuko bayiyambaje.

Yakomeje ati “Nizera ko abazumva iyi ndirimbo bose cyane abari mu bibazo nk’ibyo, bazarushaho gusubizwamo imbaraga cyane ko nta kibazo kitagira iherezo. Uhereye mu Bushinwa aho iki cyorero cyatangiriye, ugakomeza no mu bindi bihugu ukagera n’iwacu, buri wese akwiye kwisunga Imana mbere ya byose.’’

Pasiteri Nsabayesu asanzwe kandi atanga ibiganiro n’amasomo yerekeye Muzika harimo kwigisha no guhugura abaririmbyi n’abacuranzi ndetse muri ibi bihe ari kwifashisha ikoranabuhanga na radiyo zitandukanye.

Uyu mugabo yishimira ko umuhamagaro we wo guteza imbere abanyempano awufatanya n’umuryango we. Umufasha we ni umuririmbyi mwiza kuva akiri muto ndetse umukobwa wabo w’imyaka 15 witwa Acsah na we amaze iminsi akora indirimbo nyinshi zirimo “Imana nsenga”, ababyeyi be baririmbye kera ku munsi w’ubukwe bwabo.

Pasiteri Nsabayesu yashimiye cyane abamufashije n’abo bafatanya buri munsi mu muhamagaro wo guteza imbere muzika.

"Umbe hafi" yaririmbwe na Korali Bethania yashinzwe bwa mbere muri ADEPR, yasubiwemo mu buryo bugezweho

Reba indirimbo "Imana nsenga" ya Acsah n’ababyeyi be

Pst Nsabayesu Aimable n’umufasha we n'umwana we basubiyemo indirimbo “Umbe hafi” ifite amateka yihariye muri ADEPR
Acsah w’imyaka 15 amaze iminsi akora indirimbo nyinshi zirimo “Imana nsenga”
Ari mu banyempano batanga icyizere ku hazaza ha muzika ihimbaza Imana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .