Patient Bizimana umaze igihe acecetse, yanzitse n’indirimbo nshya buri kwezi

Yanditswe na Dusabimana Aimable
Kuya 14 Nzeri 2017 saa 12:07
Yasuwe :
0 0

Nyuma y’igihe umuririmbyi umaze gushinga imizi mu buryo bukomeye mu ndirimbo zo kuramya no guhimbaza Imana, Bizimana Patient, adashyira ibihangano bishya ahagaraga, yongeye gusohora indirimbo nshya isobanura ko nta kiguzi cy’urukundo rw’Imana.

Patient Bizimana wakunzwe bidasanzwe mu ndirimbo ze nka ‘Iyo neza’, ‘Amagambo yanjye’, ‘Menye neza’ n’izindi; ahamya ko Imana yamugiriye ubuntu butangaje mu buzima bwe kuba yaramuhaye impano ikomeye yo kubwiriza ubutumwa bwayo binyuze mu ndirimbo ndetse zikaba umusemburo mu mitima y’ababa bacitse intege.

Uyu muhanzi w’imyaka 30 y’amavuko amaze no kumenyekana mu bitaramo ngarukamwaka akora bikitabirwa mu buryo bukomeye.

Nyuma y’igihe adashyira ahagaragara indirimbo nshya yongeye kwanzika akora indirimbo nshya yise "Uwaruvuga" ikurikiranye n’iyitwa "Nongeye Ndaje" ifite amashusho yafatiwe mu gitaramo, uburyo bukunze kwifashishwa n’abahanzi bakomeye mu muziki wo kuramya no guhimbaza Imana ku Isi.

Mu kiganiro yagiranye na IGIHE, uyu muhanzi yavuze ko yatangiye gutegura album nshya ebyiri azamurika mu gitaramo ngarukamwaka ategura kizwi nka ’Easter Celebration’, imwe izaba igizwe n’indirimbo z’amashusho ndetse n’ikubiyeho ayafatiwe mu bitaramo bitandukanye yagiye aririmbamo mu buryo buzwi nka ’Live Recording’.

Yagize ati "Tumeze neza, nari maze igihe ncecetse, ndi mu bihe bya kwigaruramo imbaraga. Niyo mpamvu nari maze igihe nta ndirimbo nshyira hanze, nta kintu na kimwe nshyira hanze ariko kuva muri uku kwezi kugeza ku itariki ya Pasika, muri iki gihe cyose nzajya nshyira indirimbo nshya ahagaragara buri kwezi."

Yongeyeho ati "Indirimbo ngiye kwibandaho muri iki gihe ni izifasha abakunzi banjye by’umwihariko n’abakunzi b’indirimbo zihimbaza Imana. Indirimbo zibafasha kwegera intebe y’Imana."

Patient Bizimana avuga ko ari muri urwo rwego yashyize hanze iyo yise "Uwaruvuga".

Yagize ati "Ni indirimbo ivuga ukuntu urukundo rw’Imana utarubonera amagambo, ko utabona ibisingizo bikwiye byo kuruvuga kuko ni urukundo rutagereranywa."

Patient Bizimana uri mu bahanzi bakomeye mu muziki wo kuramya no guhimbaza Imana mu Rwanda, avuga ko nubwo urugendo rwo kuwagura barimo rugikenewemo ingufu, hari byinshi byagezweho byo kwishimira.

Ati "Ku giti cyanjye, mbona muzika ya Gospel mu Rwanda igana aheza nubwo hakiri byinshi byo gukora ariko turizera Imana ko aho tuvuye n’aho tugeze, nta gushidikanya imbere ni heza cyane."

Akomeza avuga ko icyo ashimira abakurikirana ibikorwa bye n’abandi bahanzi bakora umuziki wo kuramya no guhimbaza Imana ari uburyo bababa hafi, inama zibashyiramo imbaraga zo gukomeza umurimo ndetse n’uburyo bitabira ibitaramo bakanagura umuziki wabo.

Uyu muhanzi avuga ko impamvu atangiye gusohora indirimbo nshya nyamara igitaramo cyo kuzimurika kibura amezi menshi ngo kibe, ni ukugira ngo abantu benshi bazimenye, bazumve, kugira ngo icyo gihe kizagera bazizi neza, babashe gufatikanya kuramya.

Yavuze ko nubwo nta gitaramo cye bwite ari gutegura mu bihe bya vuba, hari ibindi bikorwa bitandukanye yiteze kugaragariza abakunzi b’umuziki we birimo gukora amashusho mashya ndetse akazagenda agaragara mu bitaramo bitegurwa n’abandi n’ibindi bikorwa bitandukanye byiyongera ku myiteguro ya album ahugiyemo.

Patient Bizimana washyize ahagaragara indirimbo ya mbere mu ruhererekane rw’izo azaririmbana n’abazitabira igitaramo cye kuri Pasika umwaka utaha, amaze kumurika album zindi ebyiri z’amashusho zirimo iyo yise "Iyo Neza" n’indi yitwaga "Ubwo Buntu". Izo ziyongeraho izindi eshatu zikozwe mu buryo bw’amajwi.

Mu gitaramo Patient Bizimana yaherukaga gukora cya Easter Celebration 2017, yatunguye umubyeyi we amusaba ko baririmbana indirimbo ikunze gukoreshwa muri Kiliziya Gatolika yajyaga amwigisha mu buto bwe, ayiririmba mu buryo bwashimishije imbaga y’abasaga ibihumbi bitanu bacyitabiriye muri Kigali Convention Centre.

Nongeye Ndaje, imwe mu ndirimbo zizagaragara kuri album nshya ya Patient ya ’Live Recording’

Patient Bizimana amaze kumenyekana cyane mu bitaramo bikomeye akora birimo n'icya Easter Celebration

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza