00:00:00 IGIHE NETWORK KN KINYARWANDA EN ENGLISH FR FRANCAIS

Korali Ukuboko kw’Iburyo yasohoye “Si ku Kidendezi gusa’’, ivuga ko imirimo y’Imana itagira imipaka

Yanditswe na IGIHE
Kuya 29 Kamena 2021 saa 10:28
Yasuwe :
0 0

Nyuma y’uko indirimbo “Ikidendezi’’ ikunzwe bidasanzwe mu Rwanda no mu mahanga, Korali Ukuboko kw’Iburyo yo muri ADEPR Gatenga yakoze igice cyayo cya kabiri yise “Si ku kidendezi gusa.”

Iyi ndirimbo y’iminota itandatu n’amasegonda 39, yubakiye ku butumwa bushimangira ko imirimo ya Yesu Kirisitu itarangiriye ku kidendezi ubwo yakizaga umurwayi kuko kugeza n’uyu munsi agikora ibitangaza.

‘‘Si Kukidendezi gusa’’ ikubiyemo ubutumwa buhumuriza abantu ko mu makuba n’ibibazo bahura nabyo, Imana itabibagiwe kuko isaha yayo iyo igeze iratabara.

Umuyobozi wa Korali Ukuboko kw’Iburyo, Kwizera Seth, yatangaje ko icyatumye bakora iyi ndirimbo bashakaga kubwira abantu ko Yesu agikora imirimo ikomeye.

Yagize ati ‘‘Kugera n’uyu munsi Yesu Kirisitu aracyakora ibitangaza. Mu bihe nk’ibi Isi yose yugarijwe n’icyorezo cya COVID-19, abantu ntibakwiye gukuka umutima ahubwo bizere Umwami Yesu kuko uko yari ari kera n’ubu niko akiri kandi niko azahora iteka ryose (Abaheburayo 13:8).’’

‘‘Ikidendezi’’ ni indirimbo yigaruriye imitima ya benshi mu Rwanda, yanarenze imipaka ikundwa n’abatumva Ikinyarwanda cyane cyane muri Afurika y’Uburasirazuba.

Nyuma yo gukundwa bihebuje, Korali Ukuboko kw’Iburyo yahisemo no kuyishyira mu Giswahili iyita ‘Kisima’ kugira ngo n’abanyamahanga bumve ubutumwa buyirimo.

Iyi ndirimbo irimo ubutumwa buboneka muri Yohana 5: 1-9 ahari inkuru y’umurwayi wari umaze imyaka 38 ku Kidendezi cya Betesayida, cyihindurizaga maze utanzemo abandi barwayi agakira, we kuko atagiraga umuterera mu Kidendezi yamaze imyaka myinshi ategereje gukira. Igihe cyarageze Yesu rimwe ahanyuze amenya ko arwaye igihe kirekire amukiza atagombye kwiterera mu kidendezi.

Korali Ukuboko kw’Iburyo ni imwe mu nkuru mu Itorero ADEPR mu Rwanda kuko yashinzwe ahagana mu 1989. Igizwe n’abaririmbyi barenga 150.

Kuva yashingwa yakoze ibikorwa binyuranye, itegura kandi yitabira ibitaramo bitandukanye mu Rwanda no muri Uganda.

Igitaramo gikomeye Korali Ukuboko kw’Iburyo iheruka gutegura ni icyabereye muri Dove Hotel cyiswe “Ikidendezi Live Concert” cyabaye ku wa 1 Ukuboza 2019 gihuruza imbaga ku buryo abenshi batabashije kubona aho bicara bagikurikiranira hanze y’icyumba cya Dove Hotel ku Gisozi.

Korali Ukuboko kw’Iburyo izwi mu ndirimbo zihimbye mu magambo y’ubuhanga, umuziki unoze n’injyana iryoheye ugutwi. Yamenyekanye mu ndirimbo zirimo ‘‘Ikidendezi’’, ‘‘Ibyiringiro by’ubuzima’’, ‘‘Imitima yacu’’, ‘‘Kulo’’, ‘‘Imirimo’’, ‘‘Urukumbuzi’’, ‘‘Urihariye’’, ‘‘Imitima’’, ‘‘Kuva Kera’’, ‘‘Nafurahiya’’ n’izindi nyinshi zigaruriye imitima ya benshi mu bakunzi b’umuziki uhimbaza Imana.

Korali Ukuboko kw’Iburyo ikorera umurimo w’ivugabutumwa ry’indirimbo muri Paruwasi ya ADEPR Gatenga
Korali Ukuboko kw’Iburyo imaze imyaka isaga 30 ikora ivugabutumwa kuko yashinzwe mu mwaka wa 1989, igizwe n’abaririmbyi basaga 150
Korali Ukuboko kw’Iburyo yamenyekanye cyane mu ndirimbo zirimo “Ikidendezi’’, yaririmbye iyo yise "Si ku kidendezi gusa''
Ifite abacuranzi b'abahanga
Korali Ukuboko kw’Iburyo ni imwe mu zikomeye mu muziki waririmbiwe Imana mu Rwanda no mu Karere ka Afurika y’Iburasirazuba

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .