00:00:00 IGIHE NETWORK KN KINYARWANDA EN ENGLISH FR FRANCAIS

Kalimba Julius yasohoye indirimbo ‘Intsinzi’ yakoranye na Prosper Nkomezi uherutse kurokoka impanuka

Yanditswe na IGIHE
Kuya 1 Ukwakira 2021 saa 07:07
Yasuwe :
0 0

Nubwo icyorezo cya Covid-19 cyadindije imishinga ya benshi barimo n’abahanzi, abaramyi Kalimba Julius na Prosper Nkomezi bari mu batararyamye ngo biyorose ahubwo bagerageje gukora umuziki mu bushobozi bwabo mu guhembura imitima ya benshi.

Aba bahanzi kuri ubu banahuje imbaraga bakorana indirimbo bise “Intsinzi”, yasohokanye n’amashusho yayo.

Kalimba si izina rishya mu muziki uhimbaza Imana kuko yamenyekanye mu myaka yashize aho yakunzwe mu ndirimbo zitandukanye zirimo “Ntibeshya”, “Ntatsindwa” n’izindi.

Nyuma y’amezi abiri asohoye indirimbo yise “Nyiringabo”, Kalimba ubu yamaze gushyira hanze “Intsinzi” yakoranye na Prosper Nkomezi.

Kalimba yabwiye IGIHE ko indirimbo ye nshya ivuga ku ntsinzi y’i Gologota ubwo Yesu Kirisitu yacunguraga abatuye Isi.

Yagize ati “Ni indirimbo itwibutsa intsinzi twaboneye i Gologota ku bw’amaraso ya Yesu. Na n’ubu Yesu aracyadutsindishiriza muri byinshi bigoye tunyuramo hano mu Isi, mwisunge kandi umwambaze nawe urabona intsinzi.”

Kalimba yamamaye muri za 2008 ubwo yakoraga ibitaramo bikomeye ndetse bihenze ku bijyanye no kubyinjiramo. Yakoraga ibitaramo bikitabirwa bikomeye kubera indirimbo ze zaryoheye/ziryohera benshi. Ibi bizwi cyane n’abasengeraga Remera Miracle Centre no mu zindi nsengero zari zikomeye icyo gihe yataramiyemo.

Igitaramo kitazava mu mitwe ya benshi ni icyo Julius Kalimba yatumiyemo Judith Babirye (ubu ni Umudepite muri Uganda) wari ufite izina rikomeye mu Karere mu muziki uhimbaza Imana abikesha indirimbo ye “Yesu Bera Nanjye”.

Icyo gitaramo cyabaye tariki 14 Nzeri 2008. Kwinjira byari 1000 Frw ku banyeshuri, 2000 Frw mu myanya isanzwe na 5000 Frw muri VIP. Cyari gihenze cyane ukurikije uburyo mu matike yo kwinjira hari harimo n’iya 5000 Frw kandi muri icyo gihe yari menshi cyane.

Kalimba Julius yaje kumara igihe kinini kigera ku myaka irindwi atagaragara mu muziki ku mpamvu yirinze gusobanura byimbitse. Mu mwaka wa 2017 ni bwo yawugarutsemo, yishimirwa na benshi bamweretse ko bamukunda cyane mu gitaramo yakoze cyo kwereka abakunzi be ko agarutse mu muziki. Ni igitaramo yise “Come back Live Concert” cyabereye i Kanombe mu Itorero God is able, ku wa 25 Kamena 2017.

Prosper Nkomezi wakoranye indirimbo na Kalimba Julius, ari mu bahanzi bakunzwe cyane mu muziki wo kuramya no guhimbaza Imana, akaba akunzwe by’ikirenga mu ndirimbo “Ibasha gukora”, “Sinzahwema”, “Urarinzwe” n’izindi.

Tariki 26 Nzeri 2021 ubwo Prosper yari avuye kuri Magic FM, yasimbutse urupfu mu mpanuka ikomeye yakoze, imodoka yari atwaye iribirindura ariko Imana ikinga ukuboko uyu muhanzi ntiyagira icyo aba usibye ko yakomeretse gato.

Kalimba Julius (ibumoso) yasohoye indirimbo ‘Intsinzi’ yakoranye na Prosper Nkomezi uherutse kurokoka impanuka
Kalimba yamenyekanye mu ndirimbo zirimo “Ntibeshya”, “Ntatsindwa” n’izindi
Prosper Nkomezi akunzwe mu ndirimbo zirimo “Ibasha gukora”, “Sinzahwema” na “Urarinzwe”

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .