00:00:00 IGIHE NETWORK KN KINYARWANDA EN ENGLISH FR FRANCAIS

Ambasaderi wa Australie muri EAC yacyeje impano ya Vestine na Dorcas

Yanditswe na Uwiduhaye Theos
Kuya 20 Kamena 2021 saa 07:21
Yasuwe :
0 0

Ambasaderi wa Australie muri Afurika y’Uburasirazuba, Luke Williams, yashimye impano itangaje ya Vestine & Dorcas bamaze kwigwizaho igikundiro kubera indirimbo zihimbaza Imana.

Abinyujije ku rukuta rwe rwa Twitter yanditse agaragaza ko aryohewe n’impera z’icyumweru kubera indirimbo y’aba bana yitwa ‘Nahawe Ijambo’.

Yanditse ati “Muri weekend ndi kumva indirimbo ya Vestine na Dorcas. Abantu babiri bafite impano bo mu Rwanda bafitiye ubutumwa Isi. Muyishimire.”

Iyi ndirimbo ya Vestine na Dorcas ni yo ya mbere bahereyeho gusa yarakunzwe mu buryo bukomeye ndetse abasaga miliyoni eshatu bamaze kuyireba. Irimo ubutumwa buvuga ku muntu wahuye n’ibigeragezo ariko akaza gutabarwa n’Imana, akaba ayishima mu buryo bukomeye.

Mu minsi ishize basohoye iyo bise ‘Papa’ yaje ari iya kabiri mu rugendo rwabo rwa muzika ndetse nayo yarakunzwe.
Ishimwe Vestine Taricy yavutse tariki 2 Gashyantare 2004, ubu yiga mu mwaka wa Gatatu w’amashuri yisumbuye. Kamikazi Dorcas we yavutse ku wa 28 Kamena 2006. Yiga mu mwaka wa kabiri w’amashuri yisumbuye, bombi bavuka kuri Uzamukunda Elizabeth na Nizeyimana Mazimpaka.

Bavuka ari batandatu mu rugo iwabo, harimo abakobwa bane n’abahungu babiri. Baririmba muri Goshen Choir yo muri ADEPR i Musanze. Batangiye kuririmba ku giti cyabo mu 2018, mbere yo gushyira hanze indirimbo yabo ya mbere mu mpera z’umwaka ushize.

Ubu bari gufashwa mu muziki na Murindahabi Iréné. Bahuriye na Niyo Bosco mu nzu ifasha abahanzi yitwa M. Irene Entertainment.

-  Reba indirimbo yitwa Papa baheruka gushyira hanze

Vestine na Dorcas bari mu bana bazamukanye ingoga mu muziki uhimbaza Imana
Luke Williams ahagarariye Australie muri Afurika y'Uburasirazuba. Aha yari kumwe na Perezida Paul Kagame

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .