Wari uzi ko ibyo ukora ari ingaruka z’ibyo utekereza

Wari uzi ko ibyo ukora ari ingaruka z’ibyo utekereza


Yanditswe kuya 14-06-2012 - Saa 10:35' na Umurerwa Emma-Marie

Burya ibyo dutekereza nibyo bivamo ibyo dukora, ushoboye kugenzura no gutegeka ibyo utekereza, imikorere , imivugire n’imyitwarire yahinduka, ariko burya uko utekereza niko uri, ibi bigaragara mu gitabo cy’Imigani 23 :7 ku bemera Bibiliya.

Nk’uko Bibiliya ikomeza ibivuga ngo byaba byiza buri wese ashoboye kurinda ubyinjira mu mitima we, cyangwa ibyinjira mu bitekerezo bye. Umwami Salomoni yavuze ijambo ryiza aho yagiraga ati : « Rinda umutima wawe kuruta ibintu byose birindwa kuko muri wo ariho iby’ubugingo bikomoka. Ibi bigaragara mu gitabo cy’Imigani 4 :23.

Yakobo nawe yatwigishije ko ibyaha bitangirira mu bitekerezo(Yakobo 1:13-5). Bityo ibyo uhaye ikaze mu bwonko bwawe cyangwa mu mutima wawe igihe kirekire, igihe kiragera ukabishyira mu bikorwa.

Ibyinjira mu mutwe biza ari nk’ibitekerezo bikazabyara ibikorwa. Bya bikorwa bimaze igihe kirekire ubigenderamo bikabyara akamenyero. Ibyo wamenyereye gukora bigeraho bigahinduka imiterere yawe.Ya miterere yawe niyo ivamo uwo uzaba we.

Buri wese agomba kwitondera ibyo atekereza, kuko burya uko utekereza niko uri, mu rwego rwo kugirango dutegeke ibyo dutekereza, byaba byiza tutagiye duha ikaze ibibonetse byose ngo byinjire mu mitima yacu, ahubwo tugashungura tukareba ibyatugirira umumaro bikawugirira n’abandi akaba aribyo twemerera bikinjira.

Shaka uko wakuzuza mu biterezo byawe ibintu bigira umumaro, byubaka kandi bifite icyo byakungura bikungura n’abandi.

Ibisigaye, iby’ukuri byose, ibyo kubahwa byose, ibyo gukiranuka byose, ibiboneye byose, iby’igikundiro byose, n’ibishimwa byose, nihaba hariho ingeso nziza kandi hakabaho ishimwe, abe aribyo mwibwira ( Abafilipi 4:8).

Nurangiza usenge iri sengesho uti : "Mana undememo umutima wera, unsubizemo umutima ukomeye". (Zabuli 52:12).

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO