Korali Peniel izamurika album y’amashusho mu gitaramo yatumiyemo Impanda ya ADEPR SEGEM

Yanditswe na Ishimwe Israel
Kuya 24 Kamena 2017 saa 10:19
Yasuwe :
2 0

Korali Peniel imaze imyaka 18 ikora umurimo w’ivugabutumwa rinyuze mu ndirimbo mu Itorero rya Pantekote ADEPR mu Rurembo rw’Iburasirazuba igiye kumurika album ya mbere y’amashusho, izaba igizwe n’indirimbo zigera kuri 11.

Iyi Korali ibarizwa mu Itorero ry’Akarere ka Kayonza, Paruwase ya Kabarondo ku Mudugudu w’Ishimwe igiye gushyira ahagaragara aya mashusho nyuma y’imyaka itatu isohoye album y’amajwi.

Iki gitaramo cyatumiwemo Korali Impanda yo ku Mudugudu wa SEGEM, ifite amateka akomeye muri ADEPR kizaba tariki ya 2 Nyakanga 2017.

Izi ndirimbo ziri kuri album nshya bizeye ko zizababera inzira yagutse yo kurushaho kwamamaza ubutumwa bwiza kugeza ku mpera z’isi.

Umuyobozi wa Korali Peniel, Habiyakare Pierre Vincent, yatangarije IGIHE ko imyiteguro imeze neza kandi bizeye ko Imana izabana nabo mu gitaramo.

Yagize ati “Turashima Imana kuko igenda itwiyereka buri munsi. Nyuma yo kumurika umuzingo wa mbere w’indirimbo z’amajwi mu 2014, ubu twarangije n’uw’amashusho twitegura kumurika mu minsi iri imbere.”

Peniel izifatanya na Korali Impanda n’izindi zikorera ivugabutumwa ku Mudugudu w’Ishimwe; muri iki umwigisha w’ijambo ry’Imana ni Pasiteri Habimana Bernard.

Mbere yo kumurika album yayo ya mbere y’amashusho, Korali Peniel izatanga ubwisungane mu kwivuza ku bantu 100 mu gikorwa kizaba ku munsi ubanziriza imurikwa ryayo.

Korali Peniel yatangiye umurimo w’ivugabutumwa ry’indirimbo kuya 6 Kanama 1999. Yatangiye ari itsinda ry’abanyeshuri batandatu baririmbaga mu rusengero. Mu 2009 bamaze kwaguka nibwo bahawe izina rya Peniel.

Korali Peniel yaje guhita ifungura amarembo yemerera abandi bakirisitu babishaka batari abanyeshuri kwifatanya mu kuririmba.

Iyi Korali n’ubwo yahuye n’imbogamizi mu gutangira, batatu mu baririmbyi bayitangije bakitaba Imana, yongeye kwiyubaka kuri ubu ifite 53 biganjemo urubyiruko.

Abaririmbyi ba Korali Peniel igiye gushyira ahagaragara album y'amashusho

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza