Internet irakataje! Uko Kate Clinton Ndikumagenge yayobotse Instagram mu ivugabutumwa

Yanditswe na Ishimwe Israel
Kuya 10 Gashyantare 2021 saa 09:31
Yasuwe :
0 0

Uko iminsi ishira ni ko umubare w’imbuga nkoranyambaga wiyongera ndetse abatari bake barushaho gukangukira kuzikoresha aho bahura n’abandi b’impande zose z’Isi bagasangira amakuru n’ibitekerezo bitandukanye.

Mu mbuga nkuranyambaga zikoreshwa cyane kurusha izindi twavuga nka Facebook, YouTube, Instagram, Snapchat, Twitter zifite abazikoresha babarirwa muri za miliyari.

Uko Isi igenda ikataza mu ikoranabuhanga, ni nako umubare munini w’abayituye ugenda ukururwa naryo. Usanga bamwe bahugiye mu kurivomaho ubumenyi, abandi bakaryigiraho imico ishobora kubaganisha mu irimbukiro, dore ko yabaye umudugudu aka ya mvugo imaze kumenyerwa!

Mu gihe hari umubare munini by’umwihariko urubyiruko usanga ruhugiye ku mbuga nkoranyambaga rureba ibidafite umumaro hari n’abandi batari bake bahihibikanira kwiyungura ubumenyi mu ngeri zitandukanye nko muri Siyansi, ikoranabuhanga, ubuvumbuzi, iyobokamana n’ibindi bishobora kwagura intekerezo zabo.

Mu myaka yo hambere, imbuga nkoranyambaga zakoreshwaga nk’uburyo bwo kwishimisha ariko ubu zifite umumaro munini kuva ku guhaha ubumenyi, kubyazwa amafaranga binyuze mu kwamamaza kugeza ku gukoreshwa nk’inzira y’ivugabutumwa.

N’ubwo bitamenyerewe cyane kubona urubyiruko ku mbuga nkoranyambaga rwigisha cyangwa rushakisha ahari ubutumwa bwiza bw’Ijambo ry’Imana, Umunyarwandakazi Kate Clinton Ndikumagenge, yateye intambwe wavuga ko itinyura abandi, atangira kuyobora abamukurikira ku rubuga rwa Instagram inzira y’agakiza binyuze mu kwamamaza ubutumwa bwiza mu nyigisho atambutsaho mu mashusho.

Uyu mukobwa umaze igihe kitari gito atambutsa ubutumwa bwa Yesu Kirisitu ku rubuga rwa Instagram, yise inyigisho ze “Preeminent Touch”.

Yagize ati “Gutangira uyu murimo navuga ko ari Umwuka Wera wanganirije hanyuma ndemera ndubaha, niyemeza kubikora. Kubyita ‘Preeminent Touch’ bivuze ‘gukorwaho gusumba ukundi gukorwaho kose’, nashakaga kubihuza no gukorwaho n’Umwuka Wera.”

Yakomeje avuga ko n’ubwo Umwuka Wera yamuganirije akamwemeza kuvuga ubutumwa ariko bikwiye kuba inshingano za buri mukirisitu wese nk’uko bigaragara mu gitabo cya Mariko 16:15-16, aho buri wese asabwa kwamamaza inkuru nziza y’agakiza.

Kate Clinton utuye mu Mujyi wa Ottawa muri Canada yavuze ko yahisemo gukorera ivugabutumwa ku mbuga nkoranyambaga mu buryo butamenyerewe cyane, agamije gufasha urubyiruko kurushaho kwegerana n’Imana cyane ko rwihariye n’igice kinini cy’abazimaraho umwanya.

Ati “Icyo nabwira urubyiruko n’abantu bose muri rusange ni uko Yesu abakunda kandi nta gihombo kiri mu kumukorera.’’

Uyu mukobwa akoresha amazina ya ndikumagenge_ kuri Instagram aho anyuza inyigisho mu ndimi zirimo Icyongereza, Igifaransa n’Ikinyarwanda. Amashusho y’izo anyuza ku rukuta rwe, aba atuganyijwe mu buryo bw’umwihariko butuma atarambira uyareba kandi ubutumwa buyarimo bukagusha ku ntego.

-  Reba inyigisho Kate Clinton Ndikumagenge yise “Conversation with the future”

-  Ibinyoma bitatu

Kate Clinton Ndikumagenge yahisemo gukoresha Instagram mu ivugabutumwa rigamije guhindura benshi mu bakoresha imbuga nkoranyambaga
Atanga ubutumwa butandukanye buganisha abantu ku guhindura imikorere ikaba myiza
Kate Clinton Ndikumagenge atambutsa ubutumwa bwa Yesu Kirisitu binyuze mu nyigisho yise “Preeminent Touch”
Kate Clinton atuye mu Mujyi wa Ottawa muri Canada

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .