Kwamamaza

Abigomwe ibyabo bazahabwa ibibiruta inshuro ijana babikiwe n’ubugingo buhoraho

Yanditswe kuya 5-09-2016 saa 07:07' na Rejoice Africa Ministries


Abantu b’Imana (abakiristu), iyo witegereje usanga bamwe na bamwe gukurikira Yesu no kwemera kuba abagaragu n’abigishwa be babiterwa n’impamvu n’inyungu zinyuranye.

Hari ubwo bemera kwakira agakiza kubera ko bazi yuko bazakaboneramo ibitangaza bikomeye, imibereho myiza itangaje, amahoro asesuye, ubutunzi bwinshi, urubyaro, icyubahiro n’ibindi byinshi bijyanye n’umunezero gusa.

Nibyo rwose kubaha Imana ni iby’igiciro kitagereranywa hari ibyiza byinshi uhabonera, uretse na biriya tuvuze haruguru, kubaha Imana bitanga n’amahoro yo mu mutima no kunyurwa utabona ahandi.

Nyamara ariko kandi nkuko Yesu ubwe abyihamiriza, arikumwe n’abigishwa be abasobanurira iby’iyi nzira y’umusaraba we nkuko tubibona mu butumwa bwiza uko bwanditswe na Matayo, Yesu yababwiye amagambo akomeye ati «Umuntu nashaka kunkurikira yiyange yikorere umusaraba we ankurikire, kuko ushaka kurengera ubugingo bwe azabubura ariko utita ku bugingo bwe ku bwanjye azabubona.» (Matayo 16.24-25).

Muri iyi nzira y’agakiza turimo nk’abakiristu, Yesu atwerurira ko atari imibereho y’umunezero gusa ahubwo haromo no guhatana no kurwana na Satani umwanzi wacu n’imyuka mibi. Ni byinshi bimwe na bimwe duhura na byo mu gukurikira Yesu: ibyago, amakuba, inzara n’ingorane z’uburyo bwinshi.

Hari ubwo mu mibereho yawe nk’umukiristu, wireba ukabona ni wowe uhorana ibigeragezo bidashira kandi nyamara uko wisuzumye ugasanga ntacyo umutima wawe ugushinja muri ibyo bihe cyatuma uvuga ko ari ingaruka z’icyaha zikugeraho, ari naho bamwe muri twe twihutira gushaka abadusengera ngo ni imivumo karande yo mu miryango abandi ngo ni abadayimoni babateye bagashaka ko babasengera ngo babohoke, ariko tukibagirwa ko agakiza k’Imana atari ak’igihe cy’umunezero gusa, ahubwo hari nubwo Imana ibyemera kakaba n’ak’igihe cy’ibigeragezo n’amakuba.

“Hahirwa umuntu wihanganira ibimugerageza kuko namara kwemerwa azahabwa ikamba ry’ubugingo iryo Imana yasezeranije abayikunda.” (Yakobo 1.12)

Inyigisho zigoretse iyo zigusanze mu bigeragezo zirakuyobya

Hari ubwo Imana yemera ko ikigeragezo runaka kikugeraho kugira ngo wige umenye uko ukwiye kwitwara muri ibyo bihe nk’umwana wayo ikunda. Ibi birajyana nuko iyo uri muri ibyo bihe by’ikigeragezo uhura n’inyigisho ziyobya, aho bamwe mu bigisha, bigisha amagambo ashingiye ku nyungu zabo bwite, bakigisha bavuga ko umukiranutsi w’Imana adashobora kugeragezwa, umukiranutsi w’Imana ngo ntashobora gukena, ntashobora kurwara, umukiranutsi w’Imana ntiyagendesha ibirenge cyangwa gusonza kandi ngo isi n’ibiyuzuye ari ibyayo, umukiranutsi w’Imana ngo imigisha yose iri imbere ye.

Yego simbihakana rwose imigisha y’Imana irahari pe. Ariko Bakundwa bene Data, ndabibutsa ko iyo migisha nubwo ari twe yagenewe ariko tutayihabwa uko twishakiye kuko Imana ni Imana izi ubwenge butangaje. Ni Imana ishobora kubona yuko nikugomororera iyo migisha yose uzahita ugwa ukayibagirwa, ukayitera umugongo ikakubura bityo bigatuma yanzura kudahutiraho.

Hari aho iyo migisha tuyihererwa

Nta handi duhererwa iyo migisha ni mu bushake bw’Imana. Muri ubwo bushake bw’Imana rero ntabwo akenshi naho uzahasanga ari mu mudendezo gusa Oya! Aho naho turahageragerezwa, aho naho turaharwanyirizwa, mu bushake bw’Imana hari nubwo dukubitika rwose abantu bakatwibazaho, yewe hari n’igihe kigera natwe ubwacu tukibaza ku Mana, gushidikanya kukaza tugatangira kuvuga tuti: “Imana ntihari, Imana ntibaho” n’ibindi.

Mu byukuri si uko Imana idahari kuko ituretse nk’uko tubyibwira twashira nta n’umwe Satani yarebera izuba. Ikibazo kinini gihari nuko abantu b’Imana benshi ntibashaka kugeragezwa ahubwo barashaka kubaho mu mudendezo wuzuye nkaho twageze iyo tugana kandi ntibishoboka. Mu gihe cyose tukiri muri iyi si, ibi ntibizashoboka ko tuba mu mudendezo wonyine gusa gusa.

Ni ngombwa ko habaho n’igihe cyo kugeragezwa kugira ngo bidukebure tutibwira ko twageze iyo tujya tukirara, bityo uku kugeragezwa kwacu gutume turushaho gukomeza kugira inyota yo gushaka Imana no gukomeza kwifuza Gakondo yacu yo mu ijuru aheza twabikiwe n’Uwiteka Imana idukunda. Muri Bibiliya mu gitabo cy’Imigani 3: 11-12 niho dusoma ngo: “Mwana wanjye ntuhinyure igihano cy’Uwiteka kandi ntiwinubire y’uko yagucyashye kuko Uwiteka acyaha uwo akunda nkuko umubyeyi acyaha umwana we yishimira.”

Bibiliya Ijambo ry’Imana itubwira neza ngo “Abo bose bapfuye bacyizera bari batarahabwa ibyasezeranijwe ahubwo babirebaga biri kure cyane bakabyishimira bakavuga ko ari abashyitsi n’abimukira mu isi, abavuga batyo baba berekana ko bashaka Gakondo. Kuko iyo baza gukumbura aho bavuye baba barabonye uburyo bwo kuhasubira ariko noneho barashaka Gakondo yo mu ijuru iruta icyo gihugu bavuyemo kuba cyiza, nicyo gituma Imana idakorwa n’isoni zo kwitwa Imana yabo.” (Abaheburayo 11.13)

Kutizera bitera gusubira inyuma mu mutima, intege nke zitera gusubira inyuma mu mutima, ubukene nabwo bwatera gusubira inyuma, kubura urubyaro bitera gusubira inyuma mu mutima, yewe n’ubutunzi bwinshi nabwo bushobora kugutera gusubira inyuma, ubupfakazi n’ubupfubyi, intambara z’uburyo bwose byagutera gusubira inyuma mu mutima.

Nyamara nshuti bavandimwe, twebweho twirinde gusubira inyuma kubw’ibyo duhura nabyo, haracyasigaye igihe gito cyane kandi uzaza ntazatinda, umukiranutsi w’Imana azabeshwaho no kwizera nyamara nasubira inyuma umutima w’Imana ntuzamwishimira.

“Ariko twebweho abizera ntidufite gusubira inyuma ngo turimbuke ahubwo dufite kwizera kugira ngo tuzakize ubugingo bwacu.” (Abaheburayo 10.37-39)

Nubwo bimeze bityo hari ihumure tugendana

Uku gukurikira Yesu nubwo yabwije abantu ukuri ko atari buri muntu wese ubasha kwemera kwihanganira ibibazo, ibigeragezo n’ingorane biri muri iyo nzira, Yesu Kristo yatanze ihumure nk’isezerano ridakuka ku bantu bose bazemera kwihanganira ibyo bibazo biri mu nzira yo kumukurikira.

Ahumuriza abantu abivuga ubwo umwigishwa we witwa Petero, Bibiliya ivuga ko yari umwe mu bigishwa bakundaga kubaza ibibazo Yesu, maze Petero ashize amanga abaza Yesu uko abemeye gusiga ibyabo bakamukurikira icyo bizabamarira. Yesu wari ufite ibisubizo byuje ubwenge butangaje yamusubije igisubizo cyiza ati « Umuntu wese wasize urugo cyangwa bene se, cyangwa bashiki be, cyangwa nyina, cyangwa abana, cyangwa amasambu kubw’izina ryanjye uwo azahabwa ibibiruta inshuro ijana kandi azaragwa n’ubugingo buhoraho » (Matayo 19.27-29)

Icyo nkundira iyi Mana twakurikiye nuko nubwo yakwemera ko ugeragezwa ntishobora kukureka burundu ngo igutere umugongo, ahubwo uko urushaho kuyegera nayo igenda iguha imbaraga zo kubikomeramo kugeza ubwo ubisohotsemo nk’intwari inesheje.

Nshuti Bavandimwe, ndabarema umutima rwose yuko aho tugana (mu ijuru) hari ubutunzi bw’agaciro kuruta ubwa hano turi, hari icyubahiro tuzahabwa n’iyi Mana twakurikiye kiruta cyane icyo duhora dushakashaka buri munsi. Umubabaro agahinda ibyago gusonza n’ibindi bitubabaza ntibizibukwa ukundi.

Mureke dukomere mu nzira y’Imana, nubwo bigoye dukomeze tujye imbere hari ingororano ziri imbere ku bizera. Renza amaso ibyo ubona ubu, uharanire gusingira icyo Kristo yagufatiye aribwo bugingo buhoraho. Haranira gushakashaka icyo Umwami Mana ashima abe aricyo ukora, uharanire kubaha Imana iminsi yose nubwo bitoroshye, ariko burya nasanze nta kiruta kubaha Imana mu bibaho byose. Amen

Ijambo ry’Imana muritegurirwa n’umuryango w’ivugabutumwa witwa Rejoice Africa Ministries

Wifuza kugira icyo utubwira ku ijambo ry’Imana usomye, twandikire kuri Email yacu: [email protected]


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 1 Ukwakira 2016
Copyright © 2009 -2014 - IGIHE Ltd - All Rights Reserved