Abavugabutumwa b’imahanga basobanuriwe ihuriro ‘Harvest Africa’ ryavutse mu iyerekwa ry’Umunyarwanda

Yanditswe na Tombola Felicie
Kuya 8 Gicurasi 2017 saa 03:04
Yasuwe :
5 0

Abakozi b’Imana baturutse mu bihugu bisaga 15 byo muri Afurika n’indi migabane bahuriye i Dar es Salaam muri Tanzania basobanurirwa impamvu y’ihuriro ’Harvest Africa’, ryavuye mu iyerekwa ryagizwe n’Intumwa y’Imana Nkurunziza François ukuriye amatorero ya Bethel mu Rwanda.

Harvest Africa ni huriro rya gikirisitu rigamije kugeza ubutumwa bwiza ku Banyafurika, rikanatuma Afurika yinjira mu cyo Imana yagambiriye kuri yo nk’uko Intumwa y’Imana Nkurunziza yabyeretswe.

Harvest Africa yatangiye muri 2015 ihuza abayobozi b’amatorero ya gikirisitu ngo bakomeze bahurize hamwe impano zabo, banagire icyerecyezo kimwe ku buryo Afurika yabwirizwa ubutumwa bwiza ndetse ikava no mu bibazo bitandukanye ifite (ubukungu, politiki,….) binyuze mu ijambo ry’Imana.

Ubwo iri huriro ryabaga ku nshuro ya gatatu muri Tanzania, ku itariki ya 3 n’iya 4 Gicurasi 2017, Umuyobozi w’amatorero ya Bethel mu Rwanda, Intumwa y’Imana Nkurunziza François; n’umugore we Bishop Thérèse Umugiraneza, basobanuriye abitabiriye iryo huriro umwihariko wa Harvest Africa n’impamvu abayobozi b’amatorero bakwiye gukorera hamwe mu guhuza imbaraga muri iryo huriro.

Intumwa y’Imana Nkurunziza yagize ati “Ku banyapolitike, ibibazo by’umugabane wa Afurika babijyanisha n’amateka y’ubucakara n’ubukoloni ariko kuri twebwe abakozi b’Imana Ihoraho dufite imbagara zo guhindura no gukuraho ibibazo umugabane wa Afurika ufite.

“ Muri Bibiliya tuzi neza ko amateka atubwira ko igihugu cya Isiraheli cyagiye kiva mu bibazo kandi kigatsinda intambara nyinshi biturutse ku ijambo ry’umuhanuzi w’Uwiteka, wahoraga iruhande rw’umwami amugira inama nziza zafasha igihugu. Uru nirwo rufunguzo amatorero ya gikirisitu yakabaye afite muri iyi minsi ariko ikibabaje usanga amatorero adashyira hamwe, ibyo bigatuma itorero ridatera imbere mu bihugu byinshi.”

Yaboneyeho kugaragaza ko umugabane wa Afurika ari wo wakiriye ubutumwa bwiza mbere y’indi migabane, bikaba bifite ubusobanuro mu ivugabutwa Abanyafurika bakwiriye gukora.

Ati “ Inkone y’umunya –Ethiopia yakiriye ijambo amaze kumenya ukuri kw’ijambo ry’Imana. Ntabwo byabaye impanuka kugira ngo Mose ayobore ubwoko bw’Imana abukure mu Misiri abujyana mu gihugu cyasezeranijwe. Ntabwo ari impanuka kugira ngo Yesu igihe yari umwana ahungishirizwe n’ababyeyi be muri Afurika. Izi ngero n’izindi nyinshi mwasanga muri Bibiliya zerekana umugambi w’Imana ku mugabane wa Afurika. Ni yo mpamvu iki ari cyo gihe kugira ngo abagabo n’abagore bakorera Imana mu nzego zitandukanye bahaguruke basarure imirima yeze, ariyo roho z’Abanyafurika bataka kandi banyotewe n’agakiza ngo bagarurirwe amahoro n’ibyiringiro. Iri huriro ntabwo ryitaye cyane k’ubwinshi bw’imibare y’abantu ahubwo ryitaye ku bantu bashobora kuzana impinduka.”

Muri iryo huriro kandi, haganiriwe ku bimenyetso bigaragaza ko Isi igenda igana ku musozo ndetse abakozi b’Imana bakaba bafite igihe gito cyo gusarura roho z’abantu igihe kitaragera ngo barimbuke by’iteka ryose.

Iri huriro rigenda ribera mu bihugu bitandukanye hagamijwe gufasha igihugu cya ryakiriye kuzamuka mu by’Umwuka.

Uwitabiriye iryo huriro aba yitezweho kugarukana impinduka muri sosiyete , mu itorero abarizwamo no ku gihugu ndetse akagira n’umugambi wa hindura umubagane wa Afurika agendeye ku ndangagaciro za gikirisito arizo urukundo, ubumwe, ukwizera, ibyiringiro n’izindi.

Mu biganiro bitandukanye abakozi b’Imana bitabiriye iryo huriro bagiranye n’itangazamakuru bagaragaje ko bafite ubushake bwo kwinjira muri iryo huriro ndetse no gushyira hamwe impano n’ubushobozi bw’uburyo bwose kugira ngo umugabane wa Afurika usarurwe.

Intumwa y’Imana Nkurunziza Françoi i Dar es salaam mu ihuriro ritegura 'Harvest Africa'
Abavugabutumwa basobanuriwe ko Afurika ishobora kwikemurira ibibazo binanyuze mu ijambo ry'Imana
Abavugabutumwa baturutse mu bihugu birenga 15
Intumwa y'Imana Nkurunziza iganira n'itangazamakuru muri Tanzania

Indi nkuru wasoma: Intumwa y’Imana Nkurunziza yayoboye abavugabutumwa muri Tanzania mu ihuriro ritegura ’Harvest Africa’

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza