Kwamamaza

"Bamwe mu biyita abakozi b’Imana ntibagitegereza umuhamagaro wayo"

Yanditswe kuya 25-10-2016 saa 19:07' na Emma-Marie Umurerwa


Umuvugabutumwa Hakizimana Justin, usengera mu Itorero rya Pantekote ryo mu Rwanda (ADEPR) avuga ko mu Rwanda hari bamwe mu biyita abakozi b’Imana bavuga ko bahamagawe nayo, kandi abenshi muri bo bihamagara bakabeshyera Imana.

Ibi yabitangaje nyuma y’amakuru yakunze gucicikana y’abantu biyitirira inshingano z’umurimo w’Imana bakizamura mu nzego, bakiyita abakozi b’Imana, abavugabutumwa, abapasiteri, n’abandi bagamije kwishakira indonke.

Umuvugabutumwa (Evangeliste), Hakizimana Justin yatangarije IGIHE ko hari abiyitirira uyu murimo ariko washishoza neza ugasanga si Imana yabahamagaye.

Yagize ati "Muri iki gihe abantu ntibagitegereza ko Imana ibahamagara, nonese ntuzi ko umuntu asigaye yishakira umuntu uza kumwimika? Umuntu araryama, bwacya ati ’ndi pasiteri kandi ntawe umuhakanya, undi ati ndi Apôtre, cyangwa Bishop kandi na we ntihagire umuhakanya, kuko nta n’inama bijya kwigirwamo ngo bisuzumwe."

Yakomeje agira ati "Kuri ubu umuntu niwe wishakira umwimika, ubu abantu ni bo biyita ibyo baba byo, nta Mana ibibita rwose […] nta we ukimenya niba koko ari Imana yabahamagaye cyangwa ari bo babirwaniye gusa cyangwa babyigize."

Mu bice bitandukanye by’Igihugu hari abantu bavuga ko bahamagawe n’Imana, bamwe bafite insengero bayoboye, abandi bavuga ko ari abavugabutumwa, bamwe muri bo bavuga ko basengera abarwayi bagakira, abagore babuze urubyaro bakarubona, ndetse bagakora n’ibitangaza bitandukanye.

Muri aba bavuga ko bahamagawe, hari abakora ibikorwa bisa n’iyicarubozo, ubujura n’ibindi bituma abantu babibazaho cyane.

Mu mwaka wa 2015, mu Murenge wa Ndera mu Karere ka Gasabo aho bita ‘Cyaruzinge‘ havuzwe umugabo wafatanyaga na nyina gusengera abarwaye indwara bavuga ko zikomoka ku badayimoni, akabavura mu izina rya Yesu yabateretseho imbabura iriho amakara yaka.

Nyuma y’iminsi mike, Polisi yamutaye muri yombi imushinja gukorera iyicarubozo umugore bivugwa ko wari ufite uburwayi bwo mu mutwe, yavugaga ko arimo kumusengera yarangiza akamusukaho amakara ashyushye mu bitugu avuga ko arimo gutwika abadayimoni bamurimo.

Hari n’abavuga ko basengera impapuro z’isuku abaziriye bagakira indwara. Bishop Deo Niyonzima, uyobora Umuryango witwa “Bohoka Center International" ufite icyicaro mu Murenge wa Kimironko mu Karere ka Gasabo, ni umwe mu batangarije IGIHE ko afite iyo mpano yo gusengera “Papier Serviette” abantu baziriye barwaye bagakira, abandi bakabona ibitangaza bitandukanye.

Bamwe mu baganiriye na IGIHE icyo gihe batangaje ko bakimara kurya izo mpapuro bahise batangira kuribwa mu nda.

Mu Rwanda habarizwa amadini asaga 1500, usanga afite imyemerere itandukanye mu byo yizera ndetse n’uburyo abayayoboye bazamurwa mu nzego.

Umuvugabutumwa Hakizimana Justin, yemeza ko bamwe mu bakozi b’Imana badakorera ku muhamagaro wayo

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 2 Ukuboza 2016
Copyright © 2009 -2014 - IGIHE Ltd - All Rights Reserved