Umunyempano Babou Melo yahurije abahanzi bakunzwe mu gitaramo ategerejwemo i Kigali

Yanditswe na IGIHE
Kuya 23 Ugushyingo 2019 saa 11:40
Yasuwe :
0 0

Umuhanzi Habimana John Babou wamamaye mu muziki uhimbaza Imana nka Babou Melo yatumiye abahanzi bafite ibihangano bikunzwe mu gitaramo yahaye intego yo gutanga igitambo gishimwa n’Imana.

Iki gitaramo cyiswe “A Living Sacrifice of Worship [ASW]” giteganyijwe kubera kuri Light Church Kabuga ku wa 24 Ugushyingo 2019, guhera saa Munani z’amanywa.

Babou Melo yagitumiyemo abahanzi barimo Arsene Tuyi, Christian Irimbere, Danny Mutabazi, Serge Iyamuremye na T.I.C Drama Team. Umwigisha w’ijambo ry’Imana ni Bishop Munyaneza Amon.

Uyu muramyi w’imyaka 20 y’amavuko amaze imyaka ibiri mu rugendo rw’umuziki wo kuramya Imana. Yamenyekanye mu ndirimbo nka “Amagambo yawe”, “Ntahinduka”, “Wandemeye ishimwe” n’izindi.

Mu kiganiro n’itangazamakuru, Babou Melo, yavuze ko iki gitaramo yagihaye intego yo gusaba abantu gukoresha imibiri nk’inzu z’umwuka.

Ati “Kuki tudashobora gukoresha imibiri yacu nk’ibitambo bizima ku Mana ariko kuyikorera tuyiramya no guhimbaza izina ryayo. Nifashishije ijambo Pawulo yabwiye Itorero ry’i Roma arikangurira gutanga imibiri yabo nk’ibitambo bizima (Abaroma 12:1).”

ASW ifite intego yo kwiyegereza urubyiruko n’ababa mu bikorwa byo kwishimisha ntibibuke guha Imana umwanya Imana mu buzima bwabo.

Babou Melo yakomeje ati “Benshi turara mu tubyiniro tukabyina tugakora ibintu bitandukanye. Kuki amaguru yacu atabyinira Imana? Kuki akanwa kacu kataririmbira Imana? Kuki amaboko yacu atazamurira Imana icyubahiro niba dushobora kubikora ahandi?’’

Yavuze ko ku nshuro ya mbere ategura iki gitaramo cyo gutanga igitambo kizima gishimwa n’Imana cyagenze neza yiyemeza kukigira ngarukamwaka.

Babou Melo yateguye iki gitaramo nyuma y’amezi agera kuri ane asinye amasezerano y’imikoranire na Sky Label ifasha abahanzi bahimbaza Imana.

Mu mishinga yahuriweho n’’impande zombi harimo uwo gusohora indirimbo yise ‘Wandemeye ishimwe’ no gutegura iki gitaramo.

Umuyobozi wa Sky Label, Gakwaya Jean de Dieu, yavuze ko yahisemo gukorana na Babou Melo ahanini kuko yujuje ibyo bifuzaga mu muhanzi bagomba gukorana.

Yakomeje ati “Babou ni umuhanzi ufite imyitwarire myiza, arakikijwe n’ubuhamya bw’itorero burabyemeza.”

Babou Melo yatangiye kuririmba afite imyaka irindwi y’amavuko, abyinjiramo nk’umwuga mu 2017. Yabanjirije ku ndirimbo ‘Amagambo yawe’, yanumvikanye mu yitwa ‘Ingabire’ yahuriyemo n’abandi bahanzi.

Kwinjira mu gitaramo “A Living Sacrifice of Worship” ni 3000 Frw muri VIP na 2,000 Frw mu myanya isanzwe.

-  Reba hano indirimbo ya Babou Melo yitwa Wandemeye ishimwe

Babou Melo ari mu bahanzi bakunzwe mu bazamukanye imbaraga mu muziki uhimbaza Imana
Danny Mutabazi yamamaye mu ndirimbo zirimo ’Binkoze ku mutima’, ’Ufite uwo mwana’, ’Calvary’, ’Getsemani’, ’Ineza yawe’, ’Ntiyasinziriye’ na ’Ntiwanyihakanye’
Umunyempano Babou Melo yahurije abahanzi bakunzwe mu gitaramo ategerejwemo i Kigali

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza