Korali Shalom, Dominic na Dusabe barataramye imitima ya benshi irahembuka (Amafoto)

Yanditswe na IGIHE
Kuya 6 Ugushyingo 2017 saa 10:00
Yasuwe :
1 0

Korali Shalom ikorera umurimo w’ivugabutumwa mu Itorero rya Pantekote mu Rwanda, Paruwase ya Nyarugenge yakoze igitaramo cy’ivugabutumwa cyanyuze imitima y’abacyitabiriye kuri uyu wa 5 Ugushyingo 2017.

Iyi Korali yafatanyije n’abahanzi bari mu bakunzwe muri ADEPR barimo Dominic Ashimwe, Alexis Dusabe hamwe n’Itsinda ryo kuramya no guhimbaza Imana (Ntora worship Team) riyoborwa n’umuhanzi Papy Clever.

Igitaramo ngarukamwaka cyabaga ku nshuro ya kane mu bitegurwa na Korali Shalom, icya 2017 cyiswe ‘ Yesu Turagukurikiye Live Concert ’ cyabereye muri Kigali Serena Hotel, cyitabirwa n’abaturutse impande zitandukanye.

Kuva kuri Ntora Worship Team yari irangajwe imbere na Pappy Clever yaserutse mu ndirimbo zitandukanye zo kuramya zirimo Good is good ya Doen Moon; Way maker ya Sinach; Sinzahwema kwamamaza ya Gisubizo Ministries, abacyitabiriye bizihiwe cyane n’ibihe bidasanzwe byagaragayemo.

Abahanzi bakunzwe cyane na bo bongeye gushimangira impano zabo. Alexis Dusabe yanyuze benshi mu bihangano bye byakanyujijeho mu myaka yo hambere birimo indirimbo yitwa ’Urukumbuzi’ mu gihe na Dominic Ashimwe uri no mu myiteguro yo kumurika album mu ntangiriro z’umwaka utaha na we yeretswe urukundo by’ikirenga mu ndirimbo ’Ndishimye’ n’izindi.

Korali Shalom yari itegerejwe na benshi yageze ahirengeye iseruka bidasanzwe mu myambaro yiganjemo ibara ritukura ndetse yishimirwa cyane muri buri ndirimbo yaririmbiye imbere y’imbaga yari muri Serena Hotel.

Abaririmbyi ba Korali Shalom bagoroye amajwi binyura ababarirwa mu bikumbi bitabiriye igitaramo

Muri iki gitaramo Korali Shalom yafatiyemo amashusho y’indirimbo nshya z’amashusho yitegura gushyira ahagaragara.

Umuyobozi muri Korali Shalom, Charles Ngamijimana, yatangaje ko banyuzwe n’imitegurire n’uburyo iki gitaramo cyitabiriwe n’abantu benshi batigeze bakangwa n’ibihe birimo imvura.

Yagize ati ” Imyiteguro yagenze neza, Imana ibana natwe ku buryo nta kirogoya izo ari zo zose zabayeho ngo igitaramo kigende nabi. Twabishimiye Imana. Ikindi ni ukubona abantu baza kumva ivugabutumwa Imana yaduhaye ngo turibwire ubwoko bwayo, byadukoze ku mutima. Ikindi cyadukoze ku mutima twese nka Shalom ni uburyo abantu birekuye imitima yabo ikamenekera Imana, bakayiramya bisanzuye.”

Korali Shalom imaze imyaka 32 itangiye umurimo w’ivugabutumwa mu buryo butandukanye, ikaba imaze gukora album enye z’amajwi, iya mbere y’amashusho biteganyijwe ko izajya hanze umwaka utaha wa 2018.

Korali Shalom ifite abaririmbyi b'abanyempano
Shalom imaze imyaka 32 ishinzwe ni ubuheta mu makorali y’i Nyarugenge nyuma ya Hoziana
Prof. Kigabo Thomas na Pasiteri Gatanazi Justin (uwa kabiri uturutse iburyo ari na we wayoboye iki gitaramo), bareba uko abaririmbyi bayobora umwanya wo kuramya no guhimbaza
Korali Shalom yatangiye mu 1983 ari iy’abana bato imaze kwaguka mu bikorwa by'ivugabutumwa
Korali Shalom yo muri ADEPR Nyarugenge yakoze igitaramo cyitabiriwe n’abantu benshi bagataha bahembutse
Korali Shalom yanyuze abitabiriye igitaramo cyayo
Alexis Dusabe yongeye kwizihirwa na benshi mu ndirimbo ze zakunzwe mu myaka yashize nka 'Urukumbuzi'
Pappy Clever yongeye kugaragaza ko afite impano yo kuramya no guhimbaza Imana
Pappy Clever ni we wari uyoboye Ntora Worship Team yaririmbye indirimbo zirimo Way Maker ya Sinach
Prof. Kigabo Thomas na Pasiteri Gatanazi Justin (uwa kabiri uturutse iburyo ari na we wayoboye iki gitaramo), bareba uko abaririmbyi bayobora umwanya wo kuramya no guhimbaza
Abitabiriye igitaramo bafashijwe cyane
Ntora Worship Team iririmba iti "Nkunda kumva amakuru y'umurwa"
Dusabe Alexis areba uko bagenzi be bitwara ku ruhimbi
Umuvugabutumwa Prof. Kigabo Thomas yari yaje gushyigikira Korali Shalom ibarizwa mu itorero asengeramo
Dominic Ashimwe yamenyekanye mu ndirimbo zihimbaza Imana kuva mu myaka ya 2009
Dominic yongeye kwishimirwa cyane mu ndirimbo ye 'Ndishimye'
Ashimwe aritegura kumurika album ye izaba yitwa ‘The Victory’ mu ntangiriro za 2018
Umuyobozi wa Groove Awards Rwanda, Pasiteri Kaiga John, yafashijwe aha Imana icyubahiro
Dominic waririmbye benshi bagafashwa yasabye abitabiriye igitaramo kumusengera ngo album ye izagende neza
Umuhanzi Rabbin Isaac uririmba no muri Korali Hoziana yafashijwe ajya mu mwuka

Amafoto: Moses Niyonzima


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza