Korali Gologota yatumiye Bethania iri mu zikuze muri ADEPR mu giterane gikomeye i Kigali

Yanditswe na Ishimwe Israel
Kuya 7 Kanama 2019 saa 08:31
Yasuwe :
0 0

Korali Gologota ikorera umurimo w’ivugabutumwa ry’indirimbo i Nyagatovu mu Mujyi wa Kigali yateguye igiterane cy’iminsi ine yatumiyemo Bethania ibarizwa i Gihundwe mu Karere ka Rusizi aho yandikiye amateka yo kubonera izuba nk’iya mbere mu itorero rya ADEPR.

Iki giterane cyiswe “Uwiteka niwe Buhungiro Live Concert’’ giteganyijwe gutangira ku wa 8 Kanama kigasozwa ku wa 11 Kanama 2019. Gifite intego iri muri Zaburi 46:2 havuga ngo “Imana ni yo buhungiro bwacu n’Imbaraga zacu, ni umufasha utabura kuboneka mu byago no mu makuba.”

Korali Gologota ibarizwa kuri ADEPR Nyagatovu muri Paroisse ya Rukurazo yagitumiyemo Bethania iri mu zikuze muri ADEPR, Holy Nation Choir yo mu Gatenga n’izindi zirimo Korali Rangurura y’i Gihogwe na Korali Rehoboti yo kuri ADEPR Rukiri II.

Aya makorali yatoranyijwe kubera uburyo ibihangano byayo byahembuye benshi, by’umwihariko Bethania yamamaye mu ndirimbo zirimo “Njya nezezwa no gukora umurimo”, “Urugamba”, “Umbe hafi”, “Kwiringira Uwiteka”, “Urukundo ruhebuje” na “Ishyanga rikomeye.”

Umuyobozi wa Korali Gologota, Rwirangira Aimable, yatangaje ko intego y’icyo giterane ari ukwamamaza ubutumwa bwiza no kubwira abantu bose ko ku Mana ari ho hari ubuhungiro bwizewe.

Yagize ati “Iki giterane tumaze igihe kinini tugitegura tunagisengera kandi twizeye neza ko tuzagikuramo iminyago myinshi. Twizeye ko abazacyitabira bazasobanukirwa ubuhungiro bw’ukuri.’’

Abazitabira iki giterane cyagutse bazataramana na Bethania mu minsi ibiri ya nyuma.

Korali Betaniya ifite amateka yihariye n’inararibonye mu murimo wo kubwiriza ubutumwa bwiza mu ndirimbo kuko ari na yo yashinzwe bwa mbere nyuma y’ivuka rya ADEPR. Yatangiye gukora uwo murimo mu 1965 ibarizwa i Gihundwe.

Ibitaramo itumirwamo byitabirwa n’abatari bake ahanini kubera abenshi mu bayinyuzemo n’ababakomokaho babarizwa mu Mujyi wa Kigali.

Mu bigisha batumiwe barimo Pasiteri Uwambaje Emmanuel wari umaze igihe mu mahanga aho yiga mu Bubiligi n’abavugabutumwa barimo Edissa na Mugabo.

"Uwiteka niwe Buhungiro Live Concert" izabera kuri ADEPR Nyagatovu; biteganyijwe ko ku wa Kane no ku wa Gatanu igiterane kizatangira saa 16:30 gisozwe saa 20:00, mu gihe mu mpera z’icyumweru kizatangira saa 14:00 kugeza saa 18:00 z’umugoroba.

-  Reba hano indirimbo Nakwitura iki ya Korali Gologota

-  Reba Umbe hafi ya Korali Bethania yashinzwe bwa mbere muri ADEPR

Korali Gologota ikorera umurimo w’ivugabutumwa ry’indirimbo muri ADEPR Nyagatovu iri mu zikunzwe muri ADEPR
Korali Bethania iri mu zifite amateka akomeye muri ADEPR yatumiwe mu giterane i Kigali
Korali Holy Nation yo mu Gatenga yamamaye mu ndirimbo zirimo “Uri ingabo”, “Umusaraba”, “Dusubije amaso inyuma”, “Ibihe Nsenga Uwiteka” yatumiwe muri iki giterane
Korali Gologota yatumiye amakorali akunzwe muri ADEPR mu giterane cy’iminsi ine kizabera i Nyagatovu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza