Itorero Four Square Gospel Church rigiye guhuriza urubyiruko mu giterane ruzigishirizwamo kwiteza imbere

Yanditswe na Tombola Felicie
Kuya 6 Werurwe 2018 saa 12:44
Yasuwe :
3 3

Ku nshuro ya kane, Itorero Four Square Gospel Church ishami rya Kimironko, ryateguye igiterane ngarukamwaka cy’iminsi ine, kizibanda cyane mu guhugura urubyiruko kugira ngo rubashe kwiteza imbere.

Iri torero rimaze imyaka 12 rikorera mu Rwanda, rifite amashami hirya no hino mu gihugu, ubuyobozi bwaryo butangaza ko muri iyi minsi usanga abantu iyo bamaze kumva ko ari abakozi b’Imana biyicarira bakumva ko ibindi bizizana , nyamara Bibiliya igaragaza ko benshi basengaga bakanakora.

Mu kiganiro IGIHE yagiranye n’Umuyobozi Mukuru w’iri torero mu Rwanda, Bishop Dr. Fidèle Masengo, yatangaje ko iki igiterane kizatangira ku itariki 14 kigasozwa ku ya 18 Werurwe 2018, kikazibanda ku rubyiruko.

Yavuze ko urubyiruko muri iryo torero rugize 60%,abenshi bakaba bararangije kaminuza bityo bakeneye guhwiturwa kuko gukorera Imana ntawe bibuza gukora akazi gasanzwe.

Insanganyamatsiko y’iki giterane igaruka ku ‘guhagurutsa urubyiruko no kurutegura mu buryo bw’umubiri ubw’umwuka no mu bukungu.’

Bishop Dr Masengo ati “ Turashaka ko urubyiruko rwacu ndetse n’abandi bo hanze bazaza kwitabira, buri wese azamenya ko igihe cyose umuntu akiri mu mubiri ko byanze bikunze hari ibyo akenera kandi agomba kubikorera.”

Yongeyeho ati “ Twasanze ko akenshi mu madini atandukanye dutegura abantu mu buryo bw’umwuka tukibagirwa ku bategura mu mubiri no kubabwira ku byo umubiri ukeneye ndetse n’uburyo bigerwaho.”

Bishop Dr. Masengo avuga ko kuba umuntu yavuga ko ari umunyamwuka, atagira icyo kurya, atagira isuku,atagira inkweto hari nubwo bituma n’abamureba bakemanga ubwo butumwa avuga.

Yavuze ko ababyiruka bakwiye kwivanamo ko umukozi w’Imana aba ari umuntu udakora ,wumva ko azasenga ibindi bikizana.

Muri iki giterane hazabaho kandi kumenyana ndetse hatangwe n’ubuhamya bw’urubyiruko rwiteje imbere bugaragaza ko ibyo kwiteza imbere bishoboka.

Hazaba hari inzobere zigisha muri kaminuza ndetse n’abandi bakora ubugenzuzi mu mishinga itandukanye no mu mabanki akaba aribo bazatanga ibiganiro mu matsinda, ngo abantu bihangire imirimo, bizigame kandi bisobanukirwe.

Umuyobozi ushinzwe itangazamakuru n’itumanaho akaba n’umuhuzabikorwa w’icyo giterane mu rusengero Four Square Gospel Church ishami rya Kimironko, Mugwema Wilson, yatangaje ko nk’urubyiruko basanze iki giterane ari ngombwa , itorero rikabashyigikira.

Umwihariko muri iki giterane ni uko abazaba bakurikiranye inyigisho za mu gitondo z’ibijyanye no kwiteza imbere basabwa kwiyandikisha mbere aho uru rusengero rukorera Kimironko bakavuga n’iminsi bazabonekaho kugira ngo itorero rizamenye abo rigenera amafunguro igihe bazaba bifuza no kuza kwitabira amateraniro ya nimugoroba.

Iki giterane cy’iminsi ine kizaba kirimo abavugabutumwa baturutse muri Repubulika Iharanira Demokarasi ya Congo na Kenya ndetse n’abo mu Rwanda.

Hazaba hari n’abaririmbyi nka Gisubizo Ministries, Alarm Ministries, True Promises,Healing Worship Team n’abandi baririmbyi bo muri iri torero.

Ibiterane byagiye bibanziriza icy'uyu mwaka byitabiriwe ku rugero rwo hejuru
Bishop Dr Fidèle Masengo, Umuyobozi Mukuru w'Itorero Four Square Gospel Church mu Rwanda
Umuyobozi ushinzwe itangazamakuru n’itumanaho akaba n’umuhuzabikorwa w’icyo giterane mu rusengero Four Square Gospel Church ishami rya Kimironko, Mugwema Wilson

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza