Gukomera cyane abantu bakandamya ni ibintu bidafite agaciro- Apôtre Gitwaza

Yanditswe na Kanamugire Emmanuel
Kuya 26 Werurwe 2018 saa 09:52
Yasuwe :
3 3

Umuyobozi Mukuru wa Zion Temple Celebration Centre, Apôtre Dr Paul Gitwaza, yakomoje ku bintu abantu bafite byinshi baramya birimo amazina akomeye bigatuma na we ubwe bamuramya ariko asobanura ko atari byo bifite agaciro.

Apôtre Dr Paul Gitwaza yakomoje kuri iyi nyigisho mu gitaramo Alarm Ministries yamurikiyemo album ya 10 n’iya kane y’amashusho yiswe ‘Turakomeye’ kuri uyu wa 25 Werurwe 2018, yari yatumiwemo nk’umwigisha.

Yifashishije ijambo yasomye mu gitabo cya Yesaya 6, 1-8 n’icy’Ibyahishuwe 5,1-5, yasobanuye ko Yesu yagiriye akamaro ijuru, isi n’ikuzimu asubiza ikibazo cyabajijwe mu isezerano rya kera n’irishya"Ndatuma nde, ni nde watugendera ?; ni nde ukwiriye kubumbura igitabo… ?" ndetse ahuza abantu n’Imana kugira ngo babashe kuyiramya.

Apôtre Gitwaza yavuze ko Imana yari ifite ubukene bwo kubura amashimwe y’abantu, kuko nta mwana w’umuntu waramyaga Imana (byakorwaga n’abamalayika gusa).

Yagize ati "Hari ubukene bukomeye kuko abahungu n’abakobwa bo mu Isi baramyaga ibindi bintu, Imana igira agahinda iravuga ngo ‘natuma nde ngo ajye kubwira abantu ngo bandamye, bampimbaze, banyumve?"

"Nubwo Imana yari yihagije mu ijuru yari ifite ubukene, ubukene bw’Imana si ubw’amafaranga, inzu, ibiryo, icyubahiro, ni ubw’amashimwe y’abantu. Biroroshye ku bantu kuramya byose. Abahinde baramya ikintu cyose; baramya inka, ihene, ikintu cyose babonye barakiramya; bafite Imana 3000."

Yakomeje agira ati "Isi rero irahuze muri byinshi. Abantu baramya ibyubahiro, baramya ama-titre, tukaramya ibiki… na ba Bishop, na ba Apôtre, ngakomera cyane abantu bakandamya. Ibyo byose ni ibintu abantu baramya bidafite agaciro. Ariko ubukene buri mu mutima w’Imana ni ukubona ni ukubona abantu bayiramya bayishima, bayihimbaza mu kuri no mu mwuka."

Umuyobozi Mukuru wa Zion Temple Celebration Centre, Dr Apôtre Paul Gitwaza, ubwo yigishaga ijambo ry'Imana mu gitaramo cya Alarm Ministries

Igitaramo cya Alarm Ministries cyari cyitabiriwe n’imbaga y’abantu bari buzuye mu ihema rya Serena Hotel.

Iri tsinda ryageze ku ruhimbi ryakiranwa ibivugirizo bivanze n’impundu nk’ikimenyetso cy’uko ryari rifitiwe amatsiko n’abakunzi baryo.

Imiririmbire ya Alarm Ministries yiswe iya gihanuzi yari yiganjemo gusimbagurika haba mu ndirimbo z’Ikinyarwanda, Icyongereza n’Igiswahili ari na ko abitabiriye igitaramo bavuza induru z’ibyishimo.

Mu gice cya mbere Alarm Ministries yanyujijemo izimya ibyuma bya muzika maze mu majwi atuje iririmba indirimbo zigera kuri ebyiri za ‘Ambassadors of Christ’, imwe muri Chorale z’inshuti zayo, ikunzwe ku butaka bw’u Rwanda no mu Karere ruherereyemo.

Igice cya kabiri ari na cyo cyamurikiwemo album ‘Turakomeye’ abagize Alarm Ministries baserutse bahinduye imyambarire aho abagore bose bari bakenyeye naho abagabo bambara amakositimu.

Alarm kandi yifatanyije n’itsinda rimaze kwamamara mu ndirimbo zo kuramya no guhimbaza Imana rya Healing Worship Team naho Chorale Shalom yo muri ADEPR Nyarugenge yari yatumiwe ntiyabashije kuboneka.

Umuyobozi wa Alarm Ministries, Mazeze Charles, yatangaje ko banyuzwe n’uko igitaramo cyitabiriwe mu buryo bushimishije ndetse ashimira abaterankunga batandukanye batumye gitegurwa neza.

Alarm Ministries ihuriyemo abaririmbyi b’amadini n’amatorero atandukanye yo mu Rwanda, imaze imyaka irenga 19 itangijwe.

Yatangiye ari itsinda rigizwe n’abantu batarenga batandatu babarizwaga muri Rehoboth yo muri Restoration Church; baje kugira umuhamagaro wo kuryagura mu kurushaho kuvuga ubutumwa bifatanya n’abandi baririmbyi batandukanye ku buryo imaze kugira abantu bakabakaba ijana barimo abaririmba n’abakora ibindi bikorwa bitandukanye.

Patient Bizimana yari yitabiriye iki gitaramo
Bishop Rugagi wasaga n'ufite akanyamuneza ku maso muri iki gitaramo
Alain Numa, umukozi muri MTN Rwanda
Mbanza Chance ni umwe mu baririmbyi bakomeye muri Alarm Ministries
Alarm Ministries yaserutse mu miririmbire yanyuze abari bitabiriye igitaramo cyayo
Igitaramo cya Alarm Ministries cyari cyitabiriwe n'imbaga y'abantu bari buzuye Ihema rya Serena Hotel
Abaririmbyi ba Alarm Ministries bazwiho kuririmba basimbagurika iyo batangiye gufashwa
Abaririmbyikazi bo muri Alarm Ministries mu miririmbire n'imyambarire mishya
Abagabo na bo bagarutse mu gice cya kabiri bahinduye imyambarire
Umuyobozi w'itorero ry'igihugu, Bamporiki Edouard, yari yitabiriye iki gitaramo

Amafoto: Niyonzima Moses


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza