ADEPR yatangiye urugamba rwo kurwanya ibiyobyabwenge inifashishije bibiliya

Yanditswe na Prudence Kwizera
Kuya 24 Gashyantare 2018 saa 12:35
Yasuwe :
0 0

Urubyiruko rwo mu Itorero rya ADEPR rwakoze urugendo rwo kwamagana ibiyobyabwenge mu Karere ka Nyagatare, hanaremerwa abatishoboye borozwa amatungo magufi ku bantu 20, hanatangazwa ko ADEPR idacecetse ku bibazo byugarije igihugu.

Ku bufatanye n’abaturage n’inzego za Leta zirimo Ubuyobozi bw’Akarere ka Nyagatare na Gatsibo, Ingabo na Polisi y’u Rwanda; uru rubyiruko rwamaganye ibiyobyabwenge hifashishijwe imirongo ya Bibiliya itandukanye bagenda basubiramo mu gihe baba bakora urugendo rwo kubyamagana.

Umwe mu mirongo ya Bibiliya yifashishijwe ni uri mu Abefeso 5:3 ugira uti “Ariko gusambana n’ibyonona byose no kurarikira ntibikavugwe rwose muri mwe nk’uko bikwiriye abera."

Uyu munsi kandi wanaranzwe no gutwika ibiyobyabwenge byafashwe n’inzego z’umutekano aho biba bijyanwa hirya no hino ngo bicuruzwe.

Umujyanama mu by’Imali n’Ubuyobozi muri ADEPR, Rev. Nsengiyumva Patrick, yatangaje ko bikwiye ko n’uruhare rw’umukirisitu rukwiye no kugaragara mu bikorwa biteze imbere igihugu mu bufatanye bw’inzego zose.

Ati “Twashimye ko hariho ubufatanye, ibikorwa dukora tubikorera abanyarwanda kugira ngo twiyubakire itorero n’igihugu muri rusange, Urubyiruko ni imbaraga z’igihugu, tugomba kururinda. Ibyo bisobanura ko igihugu ndetse n’imiryango yanyu bibatezeho byinshi.”

Rev. Nsengiyumva Patrick wanahoze ayobora urubyiruko muri ADEPR, yakomeje agira ati "Biranejeje ko Itorero ryacu ridacecetse ku bibazo byugarije igihugu by’umwihariko urubyiruko."

Rev. Nsengiyumva Patrick yanatangaje ko hanatanzwe amatungo magufi 20 ku rubyiruko 20 rutishoboye bifite agaciro 441,500 Frw mu rwego rwo kubafasha kwigira.

Abayoboke ba ADEPR bakoze urugendo rwaranzwe n'amagambo yo muri Bibiliya yamagana ibiyobyabwenge
Bafatanyije n'ubuyobobozi gutwika ibiyobyabwenge biherutse gufatwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza