Abaramyi Gentil na Adrien Misigaro basesekaye muri Kenya aho bategerejwe mu gitaramo gikomeye

Yanditswe na IGIHE
Kuya 11 Ukuboza 2019 saa 11:18
Yasuwe :
0 0

Abaririmbyi b’ibihangano binyura abihebeye indirimbo zihimbaza Imana, Gentil Misigaro na Adrien Misigaro bageze muri Kenya aho bitabiriye igitaramo gikomeye bateguye muri iki gihugu.

Gentil Misigaro na mubyara we Adrien Misigaro bageze mu Mujyi wa Nairobi muri Kenya ahagana saa tanu z’ijoro ryo ku wa 10 Ukuboza 2019.

Igitaramo bateguye muri iki gihugu cyiswe “Buri Munsi Live Concert in Kenya-Nairobi” cyitiriwe indirimbo aba bombi bahuriyemo yitwa “Buri Munsi’’, yagize igikundiro mu Rwanda no mu mahanga ya kure.

Biteganyijwe ko kizabera muri Calvary Convenant Centre iherereye ahitwa Komarock Section One kuva saa Cyenda z’amanywa yo ku wa 15 Ukuboza 2019.

Gentil Misigaro na Adrien Misigaro bazafatanya n’abandi bahanzi bakunzwe muri Kenya.

Kwinjira muri “Buri Munsi Live Concert in Kenya-Nairobi” ni amashilingi 200 mu myanya isanzwe mu gihe iy’icyubahiro ari amashilingi 500 akoreshwa muri Kenya.

Gentil Misigaro yabwiye IGIHE ko biteguye neza gutaramana n’abo muri Kenya. Ati “Imyiteguro y’igitaramo iri kugenda neza, mu gitondo twakoze umwitozo wa mbere wo gusubiramo indirimbo.’’

Yakomeje ashima urukundo beretswe n’abatuye muri Kenya avuga ko bishimira kuzabana na bo mu gitaramo.

Gentil Misigaro agiye gutaramira muri Kenya nyuma y’uruherekane rw’ibitaramo ’Biratungana Tour’ amazemo iminsi yakoreye muri Canada, Leta Zunze Ubumwe za Amerika, u Bubiligi, u Bufaransa, u Bwongereza, u Buholandi, Australia n’ahandi.

Aba basore bamaze kwamamara mu muziki wo kuramya no guhimbaza Imana baheruka gusangira urubyiniro mu Mujyi wa Kigali mu gitaramo cyiswe‘Hari Imbaraga Rwanda Tour’ cyabaye ku wa 10 Werurwe 2019.

Iki gitaramo cyateguwe na Gentil Misigaro cyabereye muri Kigali Conference & Exhibition Village [Camp Kigali]. We na mubyara we Adrien Misigaro bafatanyije kuririmba indirimbo zirimo ‘Yesu ndiye Dereva’, ‘Hano ku Isi’, ‘Buri munsi’, ‘Biratungana’, ‘Iyo mbimenya’ na ‘Hari Imbaraga’ banakoranye.

Gentil Misigaro yageze muri Kenya aho ategerejwe mu gitaramo
Misigaro Adrien azwi cyane mu ndirimbo nka ‘Umuntu usanzwe’, ‘Nzagerayo’ na ‘Ntacyo nzaba’ yakoranye na Meddy
Misigaro Adrien yageze mu Mujyi wa Nairobi
Gentil Misigaro yahuje urugwiro n'abamwakiriye muri Kenya
Byari ibihe by'akanyamuneza...
Abaramyi Gentil na Adrien Misigaro bafitanye isano rya hafi basesekaye muri Kenya aho bategerejwe mu gitaramo gikomeye

-  Reba hano indirimbo “Buri Munsi” ya Gentil Misigaro na Adrien Misigaro


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza