Abaramyi bakomeye mu Karere bagiye guhurira mu gitaramo i Kigali

Yanditswe na Ishimwe Israel
Kuya 8 Nzeri 2017 saa 10:30
Yasuwe :
0 0

Abahanzi bakomeye mu Rwanda no muri Afurika y’Iburasirazuba n’abayobozi b’amatsinda yo kuramya no guhimbaza Imana bagiye guhurira i Kigali mu gitaramo cyateguwe n’umuramyi, Fabrice Nzeyimana ukomoka mu Burundi.

Ni igitaramo giteganyijwe ku Cyumweru, tariki ya 10 Nzeri 2017, biteganyijwe ko kizabera kuri CLA (Christian Life Assembly) i Nyarutarama kuva saa kumi za nimugoroba.

Uyu mugoroba wo kuramya uzabanziriza inama y’iminsi itatu yiswe ‘Over Flow Africa Conference’ yateguwe n’itsinda rikorera mu bihugu birimo Kenya, Uganda, u Burundi n’u Rwanda (Heavenly Melodies Africa) igamije guhuriza hamwe abaramyi batandukanye mu kurushaho kwimakaza ubwami bwo guhimbaza butajegajega.

Umuyobozi wa Heavenly Melodies, Fabrice Nzeyimana, yatangaje ko iyi nama ishamikiye ku mahugurwa azahabwa abaramyi n’abafite aho bahuriye n’ivugabutumwa izahuriramo abaturutse mu bihugu bitandukanye.

Yagize ati “Over Flow Africa Conference irimo ibice bibiri harimo igitaramo kizahuza abaramyi n’Abanyarwanda bakongera gufata umwanya wo kuramya no guhimbaza . Iki gitaramo kizagaragaramo umuco wa Kinyafurika, kizaba ari intangiriro y’amahugurwa y’iminsi itatu azahabwa abapasiteri, abaramyi n’abahanzi batandukanye azajya abera kuri CLA.”

Yatumiwemo abashumba n’abaramyi bazwi mu Rwanda no mu mahanga. Aba barimo Umunya-Kenya, Timothy Kaberia, watangije ijoro ryo kuramya, Aflewo; Pasiteri HumKay ukomoka muri Uganda, Pasiteri David Ewagata uzaturuka muri Kenya, Rachael Nanyangwe wo muri Zambia. Aba biyongeraho abandi bahanzi bazwi mu Rwanda barimo Aimé Uwimana, Dudu T Niyukuri, Kavutse Olivier n’umugore we Amanda Fung, Pastor Gaby n’abaririmbyi bagize Heavenly Melodies Rwanda.

Fabrice Nzeyimana n'umugore we Maya Nzeyimana ni bo batangije Heavenly Melody

Izi nama abaramyi bazitezeho kwaguka mu ivugabutumwa ry’indirimbo

Iyi nama izatangira ku Cyumweru tariki 10 Nzeri isozwe kuya 12 Nzeri 2017. Biteganyijwe ko ku wa mbere no ku wa Kabiri iyi nama izajya itangira mu gitondo kuva saa moya kugeza saa sita n’igice; aho abaramyi n’abashumba b’amatorero atandukanye bazajya bahugurwa bakanungurana ibitekerezo ku murimo w’Imana.

Ayo mahugurwa ari ku rwego mpuzamahanga azabera kuri CLA, afite insanganyamatsiko igira iti “The Place of worship in the local church”, bishatse kuvuga ‘Ahantu ho guhimbariza Imana mu nsengero zacu’. Nyuma y’ibi biganiro, hazajya hakorwa imigoroba yo kuramya no guhimbaza kuva saa kumi n’ebyiri kugeza saa mbili z’ijoro.

Umuhanzi Ngamije Gabriel [Pastor Gaby] uzwi cyane kubera ibikorwa by’umugoroba wo kuramya “Christocentric Worship Night”yatangarije IGIHE ko izi nama ari ingirakamaro cyane ndetse bakazazungukiramo byinshi.

Yagize ati “Ubusabane bw’abaramyi n’abahanzi kimwe n’abandi bose babafasha muri uyu murimo bizana ubumwe no kungurana ibitekerezo mu bikorwa bya buri munsi. Ni umwanya wo kurushaho kunguka mu by’umwuka biciye no mu ijambo ry’Imana kuko hazaba hatumiwemo abigisha batandukanye.”

Pastor Gaby Ngamije (aha ari kumwe na mushiki we Claire Semugeshi) ari mu bahanzi batumiwe muri iki giterane

Yakomeje agira ati “Iki gikorwa ni ingenzi cyane kuko ijambo niryo twubakiyeho twese. Mu gitabo cy’Umubwiriza 10:10 haravuga ngo ‘Intorezo iyo igimbye nyirayo ntayityaze, aba akwiriye kuyongera amaboko, ariko ubwenge bugira akamaro ko kuyobora.’ Iyi nama izaba yatumiwemo abaramyi mpuzamahanga n’abashumba tuzayikuramo n’ubumenyi buzadufasha kurushaho gutyaza impano zacu.”

Ibi biganiro byitezweho kwagura uruganda rwo guhimbaza Imana, byemerewe kwitabirwa n’abayobozi b’amatsinda yo kuramya no guhimbaza; abahanzi, abacuranzi n’abakora ku buhanga bw’ibyuma. Ababyifuza biyandikisha banyuze ku rubuga http://www.hmafrica.com/event-registration/.

Heavenly Melody yatangiye ku wa 15 Gicurasi 2005, abayigize bifuza ko uku guhura kwaba urubuga aho abaramyi n’abashumba bacocera ibibazo bakunze guhura na byo mu matorero n’uburyo byabonerwa umuti.

Fabrice Nzeyimana na Maya Nzeyimana nibo bateguye amahugurwa yagenewe abaramyi
Rachael Nanyangwe ukomoka muri Zambia mu bazaririmba mu gitaramo kizahuriza hamwe abaramyi benshi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza